കൊച്ചി : സംസ്ഥാനത്തെ പ്രമുഖനായ മന്ത്രിയുടെയും ചില ഇടത് എം.എല്.എമാരുടെയും അവരുടെ ബന്ധുക്കളുടെയും സ്വത്തുവിവരങ്ങളെപ്പറ്റി എന്ഫോഴ്സ്മെന്റ് ഡയറക്ടറേറ്റ്(ഇ.ഡി.) അന്വേഷണമാരംഭിച്ചു. സ്വര്ണക്കടത്തുകേസുകളില് അറസ്റ്റിലായ സ്വപ്ന സുരേഷിന്റെയും മറ്റു പ്രതികളുടെയും മൊഴികളുടെ അടിസ്ഥാനത്തിലാണ് നീക്കം. മന്ത്രിയുടെ മകന്റെ സമ്പാദ്യങ്ങളും ഇഡി. അന്വേഷിക്കുന്നുണ്ട്.
സി.പി.എം. സംസ്ഥാന സെക്രട്ടറിയായിരുന്ന കോടിയേരി ബാലകൃഷ്ണന്റെ മക്കളുടെയും ബന്ധുക്കളുടെയും സ്വത്തുക്കള് സംബന്ധിച്ച് ഇ.ഡി. നേരത്തേ തന്നെ അന്വേഷണം തുടങ്ങിയിട്ടുണ്ട്. ഒരു മന്ത്രിയുടെ മകന് കോടിയേരിയുടെ മക്കളായ ബിനീഷും ബിനോയിയും തമ്മില് ബിസിനസ് ബന്ധങ്ങള് ഉള്ളതായും ഇ.ഡി കണ്ടെത്തിയിട്ടുണ്ട്. ഇതാണ് ഈ മന്ത്രിപുത്രനിലേക്ക് അന്വേഷണമെത്താന് കാരണമായത്.
മന്ത്രിപുത്രന് ബിനീഷ് കോടിയേരിയുടെ ദുബായ് ഹോട്ടല് ബിസിനസില് പങ്കാളിത്തമുണ്ട്. കേരളത്തില് മൂന്നാറിലും വയനാട്ടിലും തോട്ടങ്ങള് ഉള്ളതായി പ്രാഥമിക അന്വേഷണത്തില് കണ്ടെത്തിയിട്ടുണ്ട്. കര്ണാടകയിലെ ചില സ്ഥലങ്ങളിലും ഭൂമി വാങ്ങിയിട്ടുണ്ട്. പല വസ്തുക്കച്ചവടങ്ങളില് ഇടനിലക്കാരനായി മന്ത്രിപുത്രനും ഉണ്ടായിരുന്നു. ഇടനിലനിന്നും തര്ക്കങ്ങളില് മധ്യസ്ഥത നടത്തി വന് സമ്പാദ്യമുണ്ടാക്കിയെന്നുമാണ് ഇ.ഡിയുടെ കണ്ടെത്തല്.
മലയാള സിനിമയിലെ പ്രമുഖ നടന്റെ ദുബായിലെ ബിസിനസില് കോടിയേരിയുടെ മക്കളും മന്ത്രിപുത്രനും പങ്കാളികളായിരുന്നു. പാര്ട്ണര്ഷിപ്പ് വേര്പെടുത്തിയപ്പോള് കോടിയേരിയുടെ മക്കളും മന്ത്രിപുത്രനും വച്ച ആവശ്യങ്ങള് നടന് നിരസിച്ചു. ഇതോടെ ഇവര് ശത്രുതയിലായി.
കഴിഞ്ഞവര്ഷം മന്ത്രിയും കുടുംബാംഗങ്ങളും ചൈന സന്ദര്ശിച്ചിരുന്നു. ചൈനീസ് ഉല്പന്ന നിര്മാതാക്കളുമായി ഇവര് ചര്ച്ചകള് നടത്തിയിരുന്നു. ചൈനയില് നിക്ഷേപം നടത്തിയിട്ടുണ്ടോയെന്നും ഇ.ഡി പരിശോധിക്കുന്നുണ്ട്. ചൈനീസ് യാത്ര പ്രമുഖ അബ്കാരിയുടെ സ്പോണ്സര്ഷിപ്പില് ആയിരുന്നു.
ജെബി പോള്
