വര്ക്ക് ഫ്രം ഹോം ജോലിക്കാര്ക്കായി കമ്പനികള് ഏര്പ്പെടുത്തുന്ന കടുത്ത നിബന്ധനകള്ക്കെതിരെ രൂക്ഷവിമര്ശനവുമായി രംഗത്തെത്തിയിരിക്കുകയാണ് ഒരു യുവതി. അടുത്തിടെ താന് പങ്കെടുത്ത ഒരു അഭിമുഖത്തില് കമ്പനി മുന്നോട്ടുവെച്ച നിബന്ധനകള് തന്നെ ഞെട്ടിച്ചുവെന്ന് യുവതി സോഷ്യല് മീഡിയയില് പങ്കുവെച്ച വീഡിയോയില് പറയുന്നു. ജോലിസമയത്ത് വെബ് ക്യാമറ എപ്പോഴും ഓണാക്കി വെക്കണമെന്നും കാര്യക്ഷമത പരിശോധിക്കാന് ഓരോ പത്ത് മിനിറ്റിലും സിസ്റ്റം സ്ക്രീന്ഷോട്ടുകള് എടുക്കുമെന്നുമാണ് കമ്പനി അറിയിച്ചത്.
മനുഷ്യരെയല്ല, മറിച്ച് യന്ത്രങ്ങളെയാണോ നിങ്ങള് ജോലിക്കെടുക്കുന്നത് എന്ന ചോദ്യത്തോടെയാണ് യുവതി വീഡിയോ പങ്കുവെച്ചത്. പത്ത് മിനിറ്റില് ഒരിക്കല് സ്ക്രീന്ഷോട്ടുകള് എടുക്കുന്നത് സ്വകാര്യതയിലേക്കുള്ള കടന്നുകയറ്റമാണെന്നും ഇത് മാനസികമായി വലിയ പീഡനമാണെന്നും അവര് ചൂണ്ടിക്കാട്ടുന്നു. ഓഫീസില് പോയി ജോലി ചെയ്യുന്നതിനേക്കാള് വലിയ രീതിയിലുള്ള തൊഴില് ചൂഷണമാണ് ഇത്തരം രീതികളിലൂടെ കമ്പനികള് നടത്തുന്നതെന്നും യുവതി വിമര്ശിക്കുന്നു.
ജോലി നിരീക്ഷിക്കപ്പെടണം എന്നതില് തര്ക്കമില്ല, എന്നാല് അത് പീഡനമായി മാറരുത് എന്നാണ് യുവതിയുടെ നിലപാട്. കാര്യക്ഷമത അളക്കാന് മറ്റ് മാര്ഗങ്ങള് തേടുന്നതിന് പകരം ഓരോ നിമിഷവും ജീവനക്കാരെ സംശയത്തോടെ നിരീക്ഷിക്കുന്നത് അംഗീകരിക്കാനാവില്ലെന്നും അവര് പറയുന്നു. പത്ത് മിനിറ്റ് പോലും സ്വസ്ഥമായി ഒരിടത്ത് ഇരിക്കാന് അനുവദിക്കാത്ത ഇത്തരം രീതികള് ജീവനക്കാരുടെ ആത്മവിശ്വാസം തകര്ക്കുമെന്നും വീഡിയോയില് വ്യക്തമാക്കുന്നുണ്ട്.
സോഷ്യല് മീഡിയയില് പങ്കുവെച്ച ഈ വീഡിയോ ചുരുങ്ങിയ സമയം കൊണ്ട് തന്നെ വലിയ ചര്ച്ചകള്ക്ക് വഴിവെച്ചു. യുവതിയുടെ നിലപാടിനെ പിന്തുണച്ച് നിരവധി പേരാണ് രംഗത്തെത്തിയത്. ഇത്തരം നിരീക്ഷണങ്ങള് ജീവനക്കാരില് അമിതമായ മാനസിക സമ്മര്ദ്ദമുണ്ടാക്കുമെന്നും തൊഴിലിടങ്ങളിലെ സ്വകാര്യത ഉറപ്പാക്കേണ്ടത് അത്യാവശ്യമാണെന്നും കമന്റുകളിലൂടെ ആളുകള് പ്രതികരിക്കുന്നു. ഒപ്പം, ആധുനിക തൊഴില് സംസ്കാരത്തിലെ ഇത്തരം പ്രവണതകള് തിരുത്തപ്പെടണമെന്ന ആവശ്യവും ശക്തമാകുന്നുണ്ട്.
