ദുബായ്: ഇറാന് കൈവശംവച്ചിരിക്കുന്ന യുറേനിയം വിദേശത്തേക്ക് അയക്കാന് പാടില്ലെന്ന് രാജ്യത്തിന്റെ പരമോന്നത നേതാവ് മൊജ്തബ ഖമനേയി ഉത്തരവിട്ടു. സമാധാന ചര്ച്ചകളില് യു.എസിന്റെ പ്രധാന ആവശ്യങ്ങളിലൊന്നായിരുന്നു യുറേനിയം ശേഖരം കൈമാറണമെന്ന ആവശ്യം.
ഖമനേയിയുടെ നിലപാട് യുദ്ധം അവസാനിപ്പിക്കാനുള്ള ചര്ച്ചകളെ കൂടുതല് സങ്കീര്ണമാക്കിയേക്കും. ആണവായുധം നിര്മിക്കാന് ആവശ്യമായ, ഇറാന്റെ കൈവശമുള്ള ഉയര്ന്ന തോതില് സമ്പുഷ്ടീകരിച്ച യുറേനിയത്തിന്റെ ശേഖരം രാജ്യത്തിനു പുറത്തേക്ക് മാറ്റുമെന്ന് യു.എസ്. പ്രസിഡന്റ് ഡോണള്ഡ് ട്രംപ് ഉറപ്പുനല്കിയിട്ടുണ്ടെന്ന് ഇസ്രയേല് അവകാശപ്പെട്ടിരുന്നു.
ഇറാന് ആണവായുധങ്ങള് നിര്മിക്കാന് ശ്രമിക്കുകയാണെന്ന് ഇസ്രയേലും അമേരിക്കയും മറ്റ് പാശ്ചാത്യ രാജ്യങ്ങളും വര്ഷങ്ങളായി ആരോപിക്കുന്നുണ്ട്.
സിവിലിയന് ആവശ്യങ്ങള്ക്കുള്ളതിനേക്കാള് കൂടുതല് സമ്പൂഷ്ടീകരിച്ച യുറേനിയം തയാറാക്കാനുള്ള ഇറാന്റെ നീക്കമാണ് ആരോപണത്തിനു കാരണമായത്. തങ്ങള് ആണവായുധങ്ങള് നിര്മിക്കാന് ശ്രമിക്കുന്നില്ലെന്ന് ഇറാന് അവകാശപ്പെടുന്നു.
സമ്പുഷ്ടീകരിച്ച യുറേനിയം ഇറാനില്നിന്ന് മാറ്റുന്നതുവരെയും, ഇറാന് രാജ്യത്തിനു പുറത്തുള്ള സായുധ സംഘങ്ങള്ക്കുള്ള പിന്തുണ അവസാനിപ്പിക്കുന്നതുവരെയും, അവരുടെ ബാലിസ്റ്റിക് മിസൈല് ശേഷി ഇല്ലാതാക്കുന്നതുവരെയും ഈ യുദ്ധം അവസാനിച്ചതായി കണക്കാക്കില്ലെന്ന് ഇസ്രയേല് പ്രധാനമന്ത്രി ബെന്യാമിന് നെതന്യാഹു വ്യക്തമാക്കിയിട്ടുണ്ട്.ആണവ സാമഗ്രികള് വിദേശത്തേക്ക് അയക്കുന്നത് ഭാവിയില് യു.എസിന്റെയും ഇസ്രയേലിന്റെയും ആക്രമണങ്ങള്ക്ക് മുന്നില് രാജ്യത്തെ കൂടുതല് ദുര്ബലമാക്കുമെന്നാണ് ഇറാന്റെ വിശ്വാസം.
