കാസര്കോട്: കാസര്കോട് ഭര്തൃവീട്ടുകാരുടെ മുന്നില്വെച്ച് യുവതി ആസിഡ് കുടിച്ച് ജീവനൊടുക്കി. ചര്ലടുക്ക സ്വദേശി ഫാത്തിമത്ത് സുഫൈദ (24) ആണ് മരിച്ചത്. നാളെ ഇരുവരുടെയും വിവാഹത്തിന്റെ ഒന്നാം വാര്ഷികം ആഘോഷിക്കാനിരിക്കെയാണ് ഈ ദാരുണ സംഭവം. ഇന്നലെ ഉച്ചയ്ക്ക് മൂന്ന് മണിയോടെ പാണലത്തുള്ള ഭര്തൃവീട്ടിലാണ് സംഭവം നടന്നത്. ഭര്തൃവീട്ടുകാരുടെ പീഡനത്തെ തുടര്ന്നാണ് യുവതി ആത്മഹത്യ ചെയ്തതെന്ന് കുടുംബം ആരോപിക്കുന്നു.
സുഫൈദയുടെ സ്വര്ണവുമായി ബന്ധപ്പെട്ട് ഭര്തൃവീട്ടില് വലിയ തോതില് തര്ക്കം നടന്നിരുന്നതായി യുവതിയുടെ കുടുംബം പറയുന്നു. സ്വര്ണത്തിന് വേണ്ടി ഭാര്യയെ ഭര്ത്താവും കുടുംബവും നിരന്തരം മര്ദ്ദിക്കുകയും മാനസികമായി പീഡിപ്പിക്കുകയും ചെയ്തിരുന്നു. ഭര്തൃവീട്ടുകാരുടെ മുന്നില്വെച്ച് യുവതി ആസിഡ് കുടിച്ചപ്പോള് 'നീ ഇതിനെല്ലാം അനുഭവിക്കുമെന്ന് പറഞ്ഞ്' ഭര്തൃവീട്ടുകാര് മാറി നിന്നതായും യുവതിക്ക് ആവശ്യമായ വൈദ്യസഹായം നല്കാന് പോലും അവര് തയ്യാറായില്ലെന്നും കുടുംബം ആരോപിച്ചു.
സംഭവവുമായി ബന്ധപ്പെട്ട് യുവതിയുടെ കുടുംബം വിദ്യാനഗര് പൊലീസില് പരാതി നല്കിയിട്ടുണ്ട്. പരാതിയുടെ അടിസ്ഥാനത്തില് ഭര്ത്താവ് ആദിലിനെ പൊലീസ് കസ്റ്റഡിയിലെടുത്ത് ചോദ്യം ചെയ്ത് വരികയാണ്. വിദ്യാനഗര് പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചിട്ടുണ്ട്.
