ഗുരുവായൂര്: ഗുരുവായൂരപ്പ സന്നിധിയിലെത്തിയ മുഖ്യമന്ത്രി വി.ഡി. സതീശന് വെണ്ണ കൊണ്ട് തുലാഭാരം. 71 കിലോഗ്രാം വെണ്ണയാണ് ആവശ്യമായിവന്നത്. മണിക്കിണറിലെ തീര്ഥം കൊണ്ടും തുലാഭാരമുണ്ടായിരുന്നു.രാവിലെ 6.40ന് ശ്രീവത്സം ഗസ്റ്റ് ഹൗസിനു മുന്നില് കാറില് വന്നിറങ്ങിയ മുഖ്യമന്ത്രി തെക്കേ നടപ്പുരയിലൂടെ നടന്ന് കിഴക്കേ ഗോപുരത്തിനു മുന്നിലെത്തി. തുടര്ന്ന് റവന്യുമന്ത്രി എ.പി. അനില് കുമാറിന്റെ മകന്റെ വിവാഹച്ചടങ്ങില് പങ്കെടുത്തു. വധൂവരന്മാരെ ആശീര്വദിച്ചും ഫോട്ടോ എടുത്തും അവര്ക്കൊപ്പം പത്തു മിനിറ്റ് ചെലവഴിച്ചതോടെ ക്ഷേത്ര നഗരിയില് മുഖ്യനെ കാണാനുള്ളവരുടെ തിരക്കായി. ഹസ്തദാനം നല്കാനെത്തിയവരില് ഏറെയും കുരുന്നുകളായിരുന്നു. അവര്ക്കൊപ്പം അല്പ്പസമയം ചെലവിടാനും അദ്ദേഹം മറന്നില്ല.
സോപാനത്തിനു മുന്പില് വെണ്ണയും കദളിപ്പഴവും സമര്പ്പിച്ചായിരുന്നു ദര്ശനം. ഗണപതിക്ക് നാളികേരവും ഉടച്ചു.
അവധി ദിവസമായതിനാല് വി.ഐ.പി. ദര്ശനത്തിന് നിയന്ത്രണമുണ്ടായിരുന്നു. ഇതു പരിഗണിച്ചാകണം നെയ് വിളക്കിനു പണമടച്ചാണു നാലമ്പലത്തിലേക്കു പ്രവേശിച്ചത്. കോണ്ഗ്രസ് ബ്ലോക്ക് സെക്രട്ടറി ടി.കെ. ഗോപാലകൃഷ്ണനാണ് 4,500 രൂപ ദേവസ്വത്തില് അടച്ചത്.
ക്ഷേത്രപരിസരത്ത് തടിച്ചുകൂടിയവര് ആര്പ്പുവിളികളോടെയാണ് മുഖ്യമന്ത്രിയെ വരവേറ്റത്. സുരക്ഷാ ഉദ്യോഗസ്ഥരും പോലീസും വലയം തീര്ക്കാന് ശ്രമിച്ചപ്പോള് ഭക്തര്ക്ക് യാതൊരു തടസവും സൃഷ്ടിക്കരുതെന്ന് സുരക്ഷാ ഉദ്യോഗസ്ഥര്ക്ക് മുഖ്യമന്ത്രി കര്ശന നിര്ദേശവും നല്കി.
ജില്ലാ കലക്ടര് ശിഖാ സുരേന്ദ്രന്, ദേവസ്വം ചെയര്മാന് എ.വി. ഗോപിനാഥ്, അഡ്മിനിസ്ട്രേറ്റര് ഒ.ബി. അരുണ്കുമാര് എന്നിവരുടെ നേതൃത്വത്തില് മുഖ്യമന്ത്രിയെ പൊന്നാടയണിയിച്ച് സ്വീകരിച്ചു. കെ. കരുണാകരനു ശേഷം ഗുരുവായൂര് ക്ഷേത്രത്തില് പ്രവേശിക്കുന്ന ആദ്യത്തെ മുഖ്യമന്ത്രിയാണ് വി.ഡി. സതീശന്.
