കൊച്ചി/പത്തനംതിട്ട: നിയമസഭാ തെരഞ്ഞെടുപ്പിലെ കനത്ത തോല്വിക്കു പിന്നാലെ രാഷ്ട്രീയഭാവി അനിശ്ചിതത്വത്തിലായ എല്.ഡി.എഫിലെ ചെറുകക്ഷികള് പുതുവഴികള് തേടുന്നു. എന്.സി.പി, കോണ്ഗ്രസ് (എസ്), ജനാധിപത്യ കേരളാ കോണ്ഗ്രസ്, ജനതാദള് സെക്കുലര്, രാഷ്ട്രീയ ജനതാദള്, കേരളാ കോണ്ഗ്രസ് (സ്കറിയ തോമസ്) എന്നീ കക്ഷികളാണ് ലയിച്ച് പുതിയ പാര്ട്ടി രൂപീകരിക്കാന് ആലോചിക്കുന്നത്.
എന്.സി.പി. നേതാവും മുന്മന്ത്രിയുമായ എ.കെ. ശശീന്ദ്രന്റെ നേതൃത്വത്തിലാണ് നീക്കം. ചെറുഘടകകക്ഷികളുടെ ലയനനീക്കത്തെ സി.പി.എം. പിന്തുണയ്ക്കുമോയെന്നു വ്യക്തമല്ല. കഴിഞ്ഞ നിയമസഭാ തെരഞ്ഞെടുപ്പില് എല്.ഡി.എഫിലെ ഏഴ് ഘടകകക്ഷികള്ക്ക് ഒരു സീറ്റ് പോലും നേടാനായില്ല. എന്.സി.പി(എസ്)യില് ആഭ്യന്തരകലഹം അതിരൂക്ഷമാണ്. ഏറെക്കാലമായി രണ്ടും മൂന്നും വിഭാഗങ്ങളായി തിരിഞ്ഞാണ് പ്രവര്ത്തനമെങ്കിലും ഭരണത്തിന്റെ തണലില് പലപ്പോഴും പ്രതിസന്ധി മൂടിവയ്ക്കുകയോ ഒതുക്കിത്തീര്ക്കുകയോ ആയിരുന്നു. നിലവിലെ സംസ്ഥാനാധ്യക്ഷന് തോമസ് കെ. തോമസിനു മന്ത്രിസ്ഥാനം ലഭിക്കാതിരുന്നതും പാര്ട്ടിയിലെ ഭിന്നിപ്പ് മൂലമായിരുന്നു.
എല്.ഡി.എഫിനു ഭരണം നഷ്ടമാവുകയും എന്.സി.പിക്ക് നിയമസഭയില് പ്രാതിനിധ്യം ഇല്ലാതാവുകയും ചെയ്തതോടെ വിവിധ വിഭാഗങ്ങള് പ്രത്യേകം യോഗം ചേര്ന്ന് പരസ്പരം പുറത്താക്കല് നടപടികളാരംഭിച്ചു. സംസ്ഥാനാധ്യക്ഷസ്ഥാനത്തുനിന്ന് തോമസിനെ മാറ്റാനാണ് ദേശീയ വര്ക്കിങ് പ്രസിഡന്റ് പി.സി. ചാക്കോയുടെ നീക്കം. മത്സരിച്ച മൂന്ന് സീറ്റിലും തോറ്റതിന്റെ ഉത്തരവാദിത്വം സംസ്ഥാനാധ്യക്ഷനാണെന്ന് ആരോപിച്ചാണിത്.
തെരഞ്ഞെടുപ്പിനു മുമ്പുതന്നെ ചാക്കോ നേതൃമാറ്റം ആവശ്യപ്പെട്ടിരുന്നെങ്കിലും എ.കെ. ശശീന്ദ്രനും തോമസ് കെ. തോമസും യോജിച്ച് എതിര്ത്തതിനാല് നടന്നില്ല. പാര്ട്ടി സമ്പൂര്ണപരാജയം ഏറ്റുവാങ്ങിയ സാഹചര്യത്തില് വര്ക്കിങ് പ്രസിഡന്റ് പി.എം. സുരേഷ്ബാബുവിനെ സംസ്ഥാനാധ്യക്ഷനാക്കാനാണ് ചാക്കോ വിഭാഗത്തിന്റെ നീക്കം. അതേസമയം, ദേശീയ വര്ക്കിങ് പ്രസിഡന്റ് എന്ന നിലയില് എറണാകുളത്ത് നേരിട്ട് യോഗം വിളിച്ചിട്ടും ബഹുഭൂരിപക്ഷം നേതാക്കളും വിട്ടുനിന്നത് ചാക്കോയ്ക്ക് ക്ഷീണമായി. 15 സംസ്ഥാന ജനറല് സെക്രട്ടറിമാരില് രണ്ടുപേരും 14 ജില്ലാ പ്രസിഡന്റുമാരില് ഒരാളും 30 സെക്രട്ടറിമാരില് നാലുപേരും മാത്രമാണ് കഴിഞ്ഞ 22-ന് ചേര്ന്ന യോഗത്തില് പങ്കെടുത്തതെന്ന് തോമസ് കെ. തോമസ് വിഭാഗം പറയുന്നു. പങ്കെടുത്ത ഭാരവാഹികള്ക്കു സംസ്ഥാന പ്രസിഡന്റ് കാരണം കാണിക്കല് നോട്ടീസും നല്കി.
ജെബി പോള്/ ടി.കെ. സുധീഷ്കുമാര്
