ന്യൂഡല്ഹി: ഇന്ത്യന് പ്രതിരോധ മേഖലയ്ക്ക് കരുത്തേകി, ഡ്രോണില് നിന്ന് മിസൈല് വിക്ഷേപിക്കാവുന്ന സംവിധാനം വിജയകരമായി പരീക്ഷിച്ച് ഡിഫന്സ് റിസര്ച് ആന്ഡ് ഡെവലപ്മെന്റ് ഓര്ഗനൈസേഷന് (ഡി.ആര്.ഡി.ഒ) ചരിത്രം കുറിച്ചു. വെള്ളിയാഴ്ച ആന്ധ്രാപ്രദേശിലെ കുര്ണൂലിലെ നാഷണല് ഓപ്പണ് ഏരിയ റേഞ്ചില് നടന്ന ഈ പരീക്ഷണം രാജ്യത്തിന്റെ പ്രതിരോധ ശേഷിക്ക് വലിയ കുതിപ്പാണ് നല്കിയിരിക്കുന്നത്. പ്രതിരോധ മന്ത്രി രാജ്നാഥ് സിങ്ങാാണ് എക്സിലെ പോസ്റ്റിലൂടെ ഈ സുപ്രധാന നേട്ടം ലോകത്തെ അറിയിച്ചത്.
''യു.എ.വി ലോഞ്ച്ഡ് പ്രിസിഷന് ഗൈഡഡ് മിസൈല് (യു.എല്.പി.ജി.എം) വി3 പരീക്ഷണ വിജയം ഇന്ത്യയുടെ പ്രതിരോധമേഖലയ്ക്ക് ഒരു ഉത്തേജനമാണ്. ഡിആര്ഡിഒയെയും പങ്കാളികളെയും അഭിനന്ദിക്കുന്നു. നിര്ണായകമായ പ്രതിരോധ സാങ്കേതികവിദ്യ നിര്മിക്കാനും നേട്ടം കൈവരിക്കാനും ഇന്ത്യന് വ്യവസായം സജ്ജമാണെന്ന് ഇതു തെളിയിക്കുന്നു'' അദ്ദേഹം എക്സില് കുറിച്ചു. ഇന്ത്യ തദ്ദേശീയമായി വികസിപ്പിച്ചെടുത്ത ഏറ്റവും നൂതനമായ മിസൈല് സംവിധാനങ്ങളില് ഒന്നാണ് യു.എല്.പി.ജി.എം വി3. പേര് സൂചിപ്പിക്കുന്നത് പോലെ, ഡ്രോണുകളില്നിന്ന് തൊടുത്തുവിടാന് കഴിയുന്ന, ലക്ഷ്യത്തില് കൃത്യമായി പതിക്കുന്ന ഗൈഡഡ് മിസൈലാണിത്.
അതിസൂക്ഷ്മമായ ലക്ഷ്യങ്ങളില് പോലും കൃത്യമായി പതിക്കാന് ഈ മിസൈലിന് കഴിയും. ശത്രുപാളയങ്ങളിലെ തന്ത്രപ്രധാനമായ കെട്ടിടങ്ങളോ, വാഹനങ്ങളോ, വ്യക്തികളോ പോലുള്ള ചെറിയ ലക്ഷ്യങ്ങളെ പോലും തകര്ക്കാന് ഇത് പ്രാപ്തമാണ്.ഡ്രോണുകളില്നിന്ന് വിക്ഷേപിക്കാന് കഴിയുന്നത് തന്ത്രപരമായി വലിയ നേട്ടമാണ്. ഇത് പൈലറ്റുമാരുടെ ജീവന് അപകടത്തിലാക്കാതെ ദൂരെയുള്ള ലക്ഷ്യങ്ങളില് ആക്രമണം നടത്താന് സഹായിക്കുന്നു. സാധാരണ വിമാനങ്ങള്ക്ക് എത്തിച്ചേരാന് കഴിയാത്തതോ, കൂടുതല് സമയം നിരീക്ഷിച്ച് പറക്കേണ്ടതോ ആയ സാഹചര്യങ്ങളില് ഡ്രോണുകള്ക്ക് മിസൈലുമായി പറന്നു ലക്ഷ്യം കണ്ടെത്താനും ആക്രമിക്കാനും കഴിയും.
