ദൈനംദിന ജീവിതത്തിലെ ചലനങ്ങളെയും സ്വതന്ത്രമായ ഇടപെടലുകളെയും ഏറ്റവും കൂടുതല് ബാധിക്കുന്ന ഒരു ആരോഗ്യപ്രശ്നമാണ് സന്ധിവേദന. പ്രായമായവരില് മാത്രമല്ല, മാറിയ ജീവിതശൈലി കാരണം യുവാക്കളിലും ഇന്ന് സന്ധിവേദനയും സന്ധികളിലെ കാഠിന്യവും (Stiffness) സാധാരണയായി കണ്ടുവരുന്നു. ശരീരത്തിലെ വീക്കം (Inflammation), പോഷകാഹാരക്കുറവ്, അമിതഭാരം, അല്ലെങ്കില് ആര്ത്രൈറ്റിസ് പോലുള്ള ആരോഗ്യസ്ഥിതികള് സന്ധികളുടെ ആരോഗ്യത്തെ തകരാറിലാക്കാം.
സന്ധികളിലെ തരുണാസ്ഥി (Cartilage), പേശികള്, അസ്ഥികള് എന്നിവയ്ക്ക് ഏല്ക്കുന്ന ആഘാതം വേദനയ്ക്കും ചലനതടസ്സത്തിനും കാരണമാകുന്നു. ദീര്ഘകാലാടിസ്ഥാനത്തിലുള്ള ചികിത്സയ്ക്കൊപ്പം ശരിയായ ഭക്ഷണക്രമവും ചില സപ്ലിമെന്റുകളും സന്ധികളുടെ ആരോഗ്യം വീണ്ടെടുക്കാനും വേദന കുറയ്ക്കാനും സഹായിക്കും. സന്ധിവേദനയും സന്ധികളിലെ കാഠിന്യവും കുറയ്ക്കാന് സഹായിക്കുന്ന 5 സപ്ലിമെന്റുകളെക്കുറിച്ച് ഡോ. കുനാല് സൂദ്, ഇന്സ്റ്റാഗ്രാമിലൂടെ നിര്ദ്ദേശിച്ച അഞ്ച് സപ്ലിമെന്റുകള് ഇവയാണ്:
1. മഞ്ഞള് (Turmeric) - മഞ്ഞളിലെ പ്രധാന ഘടകമായ കുര്ക്കുമിന് (Curcumin) സന്ധികളിലെ വീക്കം കുറയ്ക്കാന് സഹായിക്കുമെന്ന് പഠനങ്ങള് വ്യക്തമാക്കുന്നു. മുട്ടുവേദനയുള്ളവരില് വേദന കുറയ്ക്കാനും ചലനശേഷി വര്ദ്ധിപ്പിക്കാനും ഇത് ഗുണകരമാണ്. ചില സന്ദര്ഭങ്ങളില് വേദനസംഹാരികളായ NSAID മരുന്നുകള്ക്ക് തുല്യമായ ഫലം ഇത് നല്കാറുണ്ട്.
2. കുന്തിരിക്കം (Boswellia) - ഇന്ത്യന് ഫ്രാങ്കിന്സെന്സ് (Indian Frankincense) എന്നറിയപ്പെടുന്ന ബോസ്വെല്ലിയ, ഓസ്റ്റിയോ ആര്ത്രൈറ്റിസ് ഉള്ളവരിലെ വേദനയും സന്ധികളിലെ മുറുക്കവും കുറയ്ക്കാന് സഹായിക്കുന്നു. ഇതിലെ AKBA എന്ന സംയുക്തം വീക്കം തടയുകയും തരുണാസ്ഥി നശിക്കുന്നത് സാവധാനത്തിലാക്കുകയും ചെയ്യുന്നു.
3. കൊളാജന് പെപ്റ്റൈഡുകള് (Collagen peptides) - സന്ധികളുടെ ഘടന നിലനിര്ത്തുന്നതിനും തരുണാസ്ഥിയുടെ ആരോഗ്യത്തിനും കൊളാജന് അത്യാവശ്യമാണ്. കൊളാജന് സപ്ലിമെന്റുകള് മുട്ടുവേദന കുറയ്ക്കാനും സന്ധികളുടെ പ്രവര്ത്തനം മെച്ചപ്പെടുത്താനും സഹായിക്കുമെന്ന് ക്ലിനിക്കല് പരീക്ഷണങ്ങള് സൂചിപ്പിക്കുന്നു.
4. ഒമേഗ-3 (Omega-3s) - ഒമേഗ-3 ഫാറ്റി ആസിഡുകള്ക്ക് ശക്തമായ ആന്റി-ഇന്ഫ്ലമേറ്ററി ഗുണങ്ങളുണ്ട്. ഇവ സന്ധികളിലെ കാഠിന്യം കുറയ്ക്കുകയും വേദനയ്ക്ക് ആശ്വാസം നല്കുകയും ചെയ്യുന്നു. തുടര്ച്ചയായി ഉപയോഗിക്കുന്നത് വേദനസംഹാരികളുടെ ഉപയോഗം കുറയ്ക്കാന് സഹായിക്കും.
5. വിറ്റാമിന് ഡി (Vitamin D) - ശരീരത്തില് വിറ്റാമിന് ഡി കുറയുന്നത് സന്ധിവേദനയ്ക്കും വീക്കത്തിനും കാരണമാകും. പ്രതിരോധ സംവിധാനത്തെ ക്രമീകരിക്കുന്നതിലും പേശികളുടെ പ്രവര്ത്തനത്തിലും വിറ്റാമിന് ഡി പ്രധാന പങ്ക് വഹിക്കുന്നു. വിറ്റാമിന് ഡി കുറവുള്ളവരില് ഇത് നല്കുന്നത് മികച്ച ഫലം നല്കും.
ശ്രദ്ധിക്കുക : ഈ വിവരങ്ങള് പൊതുവായ അറിവിനായി നല്കിയിട്ടുള്ളതാണ്. ഏതെങ്കിലും സപ്ലിമെന്റുകള് കഴിക്കുന്നതിന് മുന്പ് നിങ്ങളുടെ ഡോക്ടറുടെ നിര്ദ്ദേശം തേടേണ്ടതാണ്.
