മുംബൈ: മുംബൈയില് മയക്കുമരുന്ന് മാഫിയക്കെതിരെ നടന്ന ശക്തമായ നീക്കത്തില് മുന് ബാര് ഡാന്സറെ പോലീസ് അറസ്റ്റ് ചെയ്തു. നഗരത്തിന് പുറത്തുള്ള ഇവരുടെ താമസസ്ഥലത്ത് നിന്ന് ഏകദേശം 6 കോടി രൂപ വിലമതിക്കുന്ന 5,000 എംഡിഎംഎ ഗുളികകളാണ് പിടിച്ചെടുത്തത്. പൂനെ സ്വദേശിയായ അശ്വിനി പോള് ആണ് അറസ്റ്റിലായത്. മുംബൈയിലും മഹാരാഷ്ട്രയുടെ മറ്റ് ഭാഗങ്ങളിലും മയക്കുമരുന്ന് എത്തിക്കുന്ന ശൃംഖലയിലെ പ്രധാന കണ്ണിയാണ് ഇവരെന്നാണ് പോലീസ് സംശയിക്കുന്നത്.
ഞായറാഴ്ച നടന്ന അറസ്റ്റിന്റെ ഭാഗമായി. അഞ്ച് മൊബൈല് ഫോണുകളും എട്ട് സിം കാര്ഡുകളും ഇവരില് നിന്ന് കണ്ടെടുത്തിട്ടുണ്ട്. ഒരു ഗുളികയ്ക്ക് 1,500 മുതല് 2,000 രൂപ വരെ ഈടാക്കിയാണ് ഇവര് വിറ്റിരുന്നത്. നേരത്തെ അന്ധേരിയിലെ സാക്കിനാക്കയില് നിന്ന് 200 ഗുളികകളുമായി ഇര്ഫാന് അന്സാരി, സുഫിയാന് എന്നിവരെ പോലീസ് പിടികൂടിയിരുന്നു. ഇവരില് നിന്ന് ലഭിച്ച വിവരത്തിന്റെ അടിസ്ഥാനത്തിലാണ് തിത്വാലയിലുള്ള അശ്വിനിയുടെ ഫ്ലാറ്റില് പോലീസ് റെയ്ഡ് നടത്തിയത്. റെയ്ഡ് വിവരം ആരും അറിയാതിരിക്കാന് കെട്ടിടത്തിലെ സിസിടിവി ക്യാമറകള് ഓഫ് ചെയ്ത ശേഷമാണ് പോലീസ് അകത്ത് കടന്നത്. അശ്വിനിയെ ബുധനാഴ്ച വരെ പോലീസ് കസ്റ്റഡിയില് വിട്ടു.
ഇവരുടെ ഫോണ് രേഖകളും ചാറ്റുകളും പരിശോധിച്ച് മയക്കുമരുന്നിന്റെ ഉറവിടം കണ്ടെത്താനുള്ള ശ്രമത്തിലാണ് പോലീസ്. പൂനെ, നവി മുംബൈ എന്നിവിടങ്ങളിലെ മയക്കുമരുന്ന് വിതരണക്കാരുമായി ഇവര്ക്ക് ബന്ധമുണ്ടോ എന്നും അന്വേഷിക്കുന്നുണ്ട്. പത്താം ക്ലാസ് വരെ മാത്രം വിദ്യാഭ്യാസമുള്ള അശ്വിനി 2012-ലാണ് ജോലി തേടി മുംബൈയില് എത്തിയത്. തുടര്ന്ന് ഡാന്സ് ബാറുകളില് ജോലി ചെയ്യാന് തുടങ്ങി.
അന്വേഷണ ഉദ്യോഗസ്ഥരുടെ റിപ്പോര്ട്ട് അനുസരിച്ച്, അശ്വിനിയുടെ പങ്കാളി ജയിലിലായതോടെയാണ് ഇവര് ഈ രംഗത്തേക്ക് കടന്നത്. ജയിലില് പങ്കാളിയെ കാണാന് പോയ സമയത്ത് 'ഇര്ഫാന്' എന്ന മയക്കുമരുന്ന് കച്ചവടക്കാരനെ പരിചയപ്പെട്ടു. പെട്ടെന്ന് പണമുണ്ടാക്കാം എന്ന് മോഹിപ്പിച്ച് ഇര്ഫാനാണ് അശ്വിനിയെ ഈ നിയമവിരുദ്ധ ഇടപാടുകളിലേക്ക് എത്തിച്ചത്. കോളേജ് വിദ്യാര്ത്ഥികളെ കേന്ദ്രീകരിച്ചായിരുന്നു പ്രധാന കച്ചവടം.
