ഭോപ്പാല് : എഞ്ചിനീയറിംഗിലെ കടുത്ത തീയറികള് കാണാപ്പാഠം പഠിക്കേണ്ടി വരുമ്പോള് അത് മാതൃഭാഷയിലായിരുന്നെങ്കില് എത്ര നന്നായിരുന്നേനെ എന്ന് ഒരു തവണയെങ്കിലും ചിന്തിച്ചിട്ടുണ്ടോ? എന്നാല് മദ്ധ്യപ്രദേശ് ഈ ചിന്തയെ ഗൗരവമായി എടുത്തിട്ടുണ്ട്. ഇന്ത്യന് വിദ്യാര്ത്ഥികള് ഏറ്റവും അഭിലഷിക്കുന്ന കോഴ്സുകളില് ഒന്നായ എഞ്ചിനീയറിംഗ് ഹിന്ദിയില് പഠിപ്പിക്കാന് തീരുമാനിച്ചിരിക്കുകയാണ് മദ്ധ്യപ്രദേശ് സര്ക്കാര്. പുതിയ അക്കാദമിക് വര്ഷം മുതല് ഇതാരംഭിക്കും.
അതേസമയം ഹിന്ദിയില് ഒരു ടെക്സ്റ്റ് പോലുമില്ല എന്നിരിക്കെ സര്ഫേസ് ടെന്ഷന്, ഓസ്മോസീസ് എന്നിങ്ങനെയൊക്കെയുള്ള എഞ്ചിനീയറിംഗിലെ സാങ്കേതിക പദങ്ങളെ എങ്ങിനെ ഹിന്ദി വല്ക്കരിക്കും എന്നാലോചിച്ച് ഇപ്പോഴേ അദ്ധ്യാപകരുടെയും വിദ്യാര്ത്ഥികളുടെയും തല പുകഞ്ഞു തുടങ്ങിയിട്ടുണ്ട്്. ചൊവ്വാഴ്ച രാജീവ് ഗാന്ധി പ്രൗദ്ധ്യോഗിക് വിശ്വവിദ്യാലയ യോഗത്തിലാണ് തീരുമാനം ഉണ്ടായത്.
പ്രവേശന സമയത്ത് തന്നെ പഠനം ഹിന്ദിയില് വേണോ ഇംഗ്ലീഷില് വേണോ എന്ന് വിദ്യാര്ത്ഥിക്ക് തെരഞ്ഞെടുക്കാനാകും. അതേസമയം എഞ്ചിനീയറിംഗ് ബിരുദധാരികളുടെ ഭാവി തുലയ്ക്കുന്ന തീരുമാനമാണ് ഇതെന്ന വിമര്ശനവും ഉയര്ന്നിട്ടുണ്ട്. ജോബ് പ്ളേസ്മെന്റുകളില് ഇത് ഒരു പ്രയോജനവും ഉണ്ടാക്കില്ലെന്നും പുസ്തകങ്ങള് പോലും ഇംഗ്ളീഷിലാണെന്നിരിക്കെ സാങ്കേതിക പദങ്ങള് എങ്ങിനെ ഹിന്ദിയില് പരിഭാഷപ്പെടുത്താനാകുമെന്ന് ചില അദ്ധ്യാപകര് ചോദിക്കുകയും ചെയ്തിട്ടുണ്ട്.
എന്നാല് ഇംഗ്ളീഷിലുള്ള സാങ്കേതിക പദങ്ങള്ക്ക് ഹിന്ദി പരിഭാഷ ഉപയോഗിക്കാന് കഴിയുന്നില്ലെങ്കില് ഇംഗ്ളീഷ് പദം ഹിന്ദിയില് എഴുതിയാല് മതിയെന്നും ഇംഗ്ളീഷ് ഭാഷയില് മോശമായ കുട്ടികള്ക്ക് കൂടി പ്രയോജനപ്പെടാന് വേണ്ടിയാണ് ഈ തീരുമാനമെന്നും സാങ്കേതിക വിദ്യാഭ്യാസമന്ത്രി ദീപക് ജോഷി പറയുന്നു. അതേസമയം ഹിന്ദിയില് പഠിച്ചിട്ടുവരുന്ന മദ്ധ്യപ്രദേശ് വിദ്യാര്ത്ഥികളെ വന്കിട കമ്പനികള് റിക്രൂട്ട് ചെയ്യുമോ എന്നതാണ് വിദ്യാര്ത്ഥികള് പേടിക്കുന്നത്.
എഞ്ചിനീയറിംഗ് ഹിന്ദിയില് പഠിച്ച വിദ്യാര്ത്ഥികളുടെ ഭാവി എന്തായിരിക്കും? ഏതെങ്കിലും കമ്പനികള് ഹിന്ദിയില് എഞ്ചിനീയറിംഗ് നേടിയയാളെ ജോലിക്കെടുക്കുമോ തുടങ്ങിയ ആശങ്കകള് ദുരീകരിച്ച ശേഷം വേണമായിരുന്നു ഈ നീക്കം നടത്താനെന്നാണ് ചില വിദ്യാര്ത്ഥികളുടെ അഭിപ്രായം. ഇംഗ്ളീഷില് എഞ്ചിനീയറിംഗ് പഠിച്ച അദ്ധ്യാപകര് നില്ക്കുമ്പോള് ആര് ഹിന്ദിയില് പഠിപ്പിക്കുമെന്നും ഇവര് ചോദിക്കുന്നു. അതേസമയം തീരുമാനവുമായി മുമ്പോട്ട് പോകുന്ന ആര്ജിവിപി ഹിന്ദിയിലും ഇംഗ്ളീഷിലും ചോദ്യപേപ്പര് തയ്യാറാക്കാനുള്ള നീക്കത്തിലാണ്.
