കൊച്ചി: കേരളത്തിന്റെ സ്വപ്ന പദ്ധതികളില് ഒന്നായ കൊച്ചിമെട്രോയുടെ ഉദ്ഘാടന ചടങ്ങില് നിന്നും മെട്രോമാന് ഇ ശ്രീധരനെയും പ്രതിപക്ഷ നേതാവിനെയും ഒഴിവാക്കിയ കേന്ദ്രസര്ക്കാര് നടപടിയില് ഉയരുന്ന പ്രതിഷേധം ചില്ലറയല്ല. കേരളത്തിലെ ഭരണപക്ഷവും പ്രതിപക്ഷവും ഒരുപോലെ നടപടി വൈകല്യത്തില് അമര്ഷം രേഖപ്പെടുത്തുമ്പോള് എന്തിനും ഏതിനും ഹാസ്യാത്മഹമായി പ്രതിഷേധിക്കുന്ന സാമൂഹ്യ മാധ്യമങ്ങളിലെ വിമര്ശകരായ ഐസിയുവും വെറുതെയിരിക്കുന്നില്ല. കുറിക്കു കൊള്ളുന്ന ട്രോളുകളുമായി അവരും ഇറങ്ങി.
സിനിമാ ഡയലോഗുകളെയും സിനിമാ രംഗങ്ങളെയും സാമ്യപ്പെടുത്തിയുള്ള പതിവ് വിമര്ശനത്തില് നിന്നും മാറി സഞ്ചരിച്ച അവര് ഇത്തവണ ഔദ്യോഗിക ബ്ളോഗില് വാര്ത്തയെഴുതിയായിരുന്നു പ്രതികരിച്ചത്. ഫേസ്ബുക്കില് ഷെയര് ചെയ്തിരിക്കുന്ന വാര്ത്ത ആള്ക്കാര് ഏറ്റെടുക്കുകയും ചെയ്തു. വെറും രണ്ടു മണിക്കൂര് കൊണ്ട് 6.7 കെ ലൈക്കാണ് കിട്ടിയിരിക്കുന്നത്. ഷെയറുകളും കമന്റും നിരവധിയാണ്. 'വിവാഹ ചടങ്ങ് ; വരനെ ഒഴിവാക്കിയത് സുരക്ഷാ പ്രശ്നങ്ങള് മൂലമെന്ന് പ്രധാനമന്ത്രിയുടെ ഓഫീസ്' എന്ന തലക്കെട്ടോടെയാണ് വാര്ത്ത നല്കിയിരിക്കുന്നത്. അനൂപ് കുമാറാണ് ‘വാര്ത്ത’ തയ്യാറാക്കിയിരിക്കുന്നത്.
റിപ്പോര്ട്ട് ഇങ്ങിനെ
‘വിവാഹ ചടങ്ങ്; വരനെ ഒഴിവാക്കിയത് സുരക്ഷാ പ്രശ്നങ്ങള് മൂലമെന്നു പ്രധാനമന്ത്രിയുടെ ഓഫീസ്’ സുരക്ഷാ പ്രേശ്നങ്ങള് ചൂണ്ടി കാണിച്ചാണ് വരനെ ഒഴിവാക്കുന്നതെന്നു കേന്ദ്ര മാനവ വിഭവ ശേഷി മന്ത്രാലയം അറിയിച്ചു
വധുവിന്റെ അച്ഛന്..വരന്റെ സഹോദരി തുടങ്ങിയവര് ഒഴിവാക്കപ്പെട്ട അപ്രധാനികളില് പെടും . പകരം വെങ്കയ്യ നായിഡു …മേയര് അമ്മിണി … നാഗാലാന്ഡ് ഗവര്ണര് തുടങ്ങിയവര് പങ്കെടുക്കും .
പങ്കെടുക്കാന് കഴിയാത്തവര്ക്ക് പ്രധാനമന്ത്രിയുടെ ഭീം ആപ്പിലൂടെ വേണമെങ്കില് പണം ഇടപാട് നടത്താമെന്നു പ്രധാനമന്ത്രി അറിയിച്ചു .
കലൂര് AJ ഹാളില് വെച്ച് നടത്തേണ്ടിയിരുന്ന വിവാഹം SPGയുടെ നിര്ദേശപ്രകാരം കൊച്ചി ഇന്റര്നാഷണല് ക്രിക്കറ്റ് സ്റ്റേഡിയത്തിലേക്ക് മാറ്റുകയിരുന്നു . മഴ മൂലം വിവാഹം ഉപേക്ഷിക്കേണ്ടി വന്നാല് DUCKWORTH LEWIS നിയമപ്രകാരം ബിജെപിയെ വിജയി ആയി പ്രഖ്യാപിക്കുമെന്ന് അമിത് ഷാ പ്രതികരിച്ചു’
