സുന്ദരനും മിതഭാഷിയുമായ നടനാണ് സച്ചിന് ആനന്ദ്. സര്ക്കാര് സ്ഥാപനത്തില് ഉയര്ന്ന ഉദ്യോഗത്തിലിരിക്കുന്ന ഈ ചെറുപ്പക്കാരന് ഒഴിവുസമയങ്ങളില് ജീവകാരുണ്യ പ്രവര്ത്തനങ്ങളിലും സജീവമാണ്.
സച്ചിന് ആനന്ദിന്റെ പേരിലും ഒരു കൗതുകമുണ്ട്. ലോകപ്രശസ്തരായ ക്രിക്കറ്റ് രാജാവ് സച്ചിന് ടെന്ഡുല്ക്കറുടെയും ലോക ചെസ് ചാമ്പ്യനായ വിശ്വനാഥന് ആനന്ദിന്റെയും പേരുകള് ചേര്ത്താണ് യുവ നായകനടന് സച്ചിന് ആനന്ദ് എന്നു പേരിട്ടത്.
സച്ചിന് ആനന്ദ് അഭിനയിച്ച് റിലീസ് ചെയ്ത പുതിയ സിനിമ കേന്ദ്ര-സംസ്ഥാന അവാര്ഡുകള് നേടി ആര്. ശരത് സംവിധാനം ചെയ്ത 'സ്വയം' ആണ്. തമിഴിലും മലയാളത്തിലും പകുതി ചിത്രീകരണം പിന്നിട്ട സിനിമകളാണ് സച്ചിന് അഭിനയിക്കുന്ന പുതിയ സിനിമകള്.
ഈയിടെ പാലക്കാട് സ്നേഹ ചാരിറ്റബിളിന്റെ എല്ലാമായ സുനില് ദാസ് സച്ചിന് ആനന്ദിനെ ആദരിക്കുകയുണ്ടായി. കെ.പി.ഏ.സി. ലളിതയാണ് സച്ചിന് ആനന്ദിനെ പൊന്നാടയണിയിച്ചത്.
അതിനുശേഷം പത്തനാപുരം ഗാന്ധിഭവനില് സുനില്ദാസിനോടൊപ്പം എത്തിയ സച്ചിന് ആനന്ദ് ജീവകാരുണ്യ പ്രവര്ത്തനങ്ങളില് ഏര്പ്പെട്ടു.
എം.എസ്.ഡബ്ലിയു. പാസായ സച്ചിന് ആനന്ദ് ബാലനടനായിട്ടാണ് ചലച്ചിത്രരംഗത്തു വന്നത്.
രാജസേനന് സംവിധാനം ചെയ്ത് ജയറാം നായകനായ 'കഥാനായകന്' എന്ന ചിത്രത്തില് വി.കെ. ശ്രീരാമന്റെ മകനായിട്ടാണ് സച്ചിന് അഭിനയിച്ചത്. അതിനുശേഷം കുറെ ആല്ബങ്ങളില് അഭിനയിച്ചു. അന്നെല്ലാം ജൂനിയര് പ്രേംനസീര് എന്ന പേരിലാണ് അറിയപ്പെട്ടത്.
ശാരിക, സൗപര്ണ്ണിക തുടങ്ങിയ നടികളായിരുന്നു സച്ചിന്റെ നായികമാര്. പിന്നീട് രാജസേനന് സംവിധാനം ചെയ്ത മെഗാസീരിയലായ 'ഭാഗ്യനക്ഷത്ര'ത്തില് ഒരു നല്ല റോളില് അഭിനയിച്ചു. സൂര്യ ചാനലില് ഈ മെഗാസീരിയല് സംപ്രേഷണം ചെയ്തിരുന്നപ്പോള് വളരെ നല്ല പ്രതികരണമായിരുന്നു കിട്ടിക്കൊണ്ടിരുന്നത്. അതിലെ നിഷ്കളങ്കനായ ചെറുപ്പക്കാരനെ പ്രേക്ഷകര് ഇരുകൈയും നീട്ടി സ്വീകരിച്ചു.
അതുപോലൊരു മകനെയാണ് തങ്ങള്ക്കു വേണ്ടതെന്ന് അച്ഛനമ്മമാര് ആഗ്രഹിച്ചു. അതായിരുന്നു സച്ചിന്റെയും വിജയം. 'ഭാഗ്യനക്ഷത്ര'ത്തിലെ സച്ചിന് ആനന്ദിന്റെ അഭിനയം കണ്ട് ഇഷ്ടപ്പെട്ടിട്ടാണ് 'കളഭമഴ' എന്ന ചിത്രത്തില് തിലകന്റെ മകനായി അഭിനയിക്കാന് സച്ചിനെ ക്ഷണിച്ചത്.
'കളഭമഴ'യില് തലതെറിച്ച ചെറുപ്പക്കാരന് 'നന്ദു'വിന്റെ റോളിലാണ് സച്ചിന് അഭിനയിച്ചത്. ഭാഗ്യനക്ഷത്രത്തിലെ നിഷ്കളങ്കനായ ചെറുപ്പക്കാരനില്നിന്നുള്ള മാറ്റം. 10 ദിവസം തിലകനോടൊപ്പം താമസിച്ച് അഭിനയിച്ച നല്ല ഓര്മ്മകളാണ് അഭിമാനത്തോടെ സച്ചിന് സൂക്ഷിക്കുന്നത്.
ഇന്ത്യന് സിനിമയിലെ നല്ല നടന്മാരില് ഒരാളായ തിലകന് യാതൊരു തരത്തിലും തലക്കനം കാണിക്കാതെയായിരുന്നു ഒരു ചെറുപ്പക്കാരനും തുടക്കക്കാരനുമായ തന്നോടു പെരുമാറിയതെന്ന് സന്തോഷത്തോടെ സച്ചിന് പറയുകയുണ്ടായി.
? തിലകനോടൊപ്പം അഭിനയിച്ചപ്പോള് സച്ചിന് കൂടുതല് പ്രാവശ്യം വെള്ളം കുടിച്ചെന്ന് പറഞ്ഞിരുന്നു
ഠ അഭിനയത്തിന്റെ യൂണിവേഴ്സിറ്റിയായ തിലകന് സാറിനൊപ്പം നിന്നപ്പോള് വല്ലാത്ത വിറയല്. അത് തിലകന് സാര് മനസ്സിലാക്കിയിട്ടെന്നോണം എന്റെ തോളത്തുപിടിച്ച് പതുക്കെ പറഞ്ഞു. 'ഞാനും ആദ്യം സ്റ്റേജില് കയറിയപ്പോള് വിറച്ചിരുന്നു. മനസിന്റെ ധൈര്യം ചോര്ന്നുപോകാന് പാടില്ല. എന്നെ തിലകനായി കാണാതിരിക്കുക.
ഞാനിപ്പോള് സച്ചിന്റെ അച്ഛനാണ്. ആ രീതിയില് പെരുമാറിയാല് മതി. ഓക്കെ...' പുറത്ത് പതുക്കെ തട്ടി. എന്നിട്ടും എന്റെ വിറയല് മാറിയില്ല. പിന്നീടെപ്പോഴോ നോര്മ്മലായപ്പോള് അഭിനയത്തിന്റെ ഏതാനും പാഠങ്ങള് തിലകന് സാര് പറഞ്ഞുതന്നു.
അതൊരു വല്ലാത്ത അനുഭവമായിരുന്നു. ഞാനന്ന് മൂന്നുകുപ്പി വെള്ളമാണ് കുടിച്ചത്. വെള്ളംകുടിച്ചാലും നല്ല നടനിലേക്കുള്ള ദൂരം എന്തെന്ന് മനസ്സിലാക്കാന് കഴിഞ്ഞല്ലോ.
? നക്ഷത്രങ്ങളിലെ നായകനായത്..
ഠ കളഭമഴയ്ക്കു ശേഷമാണ് 'നക്ഷത്രങ്ങള്' ലഭിച്ചത്. അതൊരു കുടുംബകഥയാണ്. പിങ്കിയും കല്യാണിയുമായിരുന്നു എന്റെ നായികമാര് .ക്യാപ്റ്റന് രാജു സംവിധാനം ചെയ്ത 'പവനായി 918' എന്ന ചിത്രത്തിലെ നായികയാണ് പിങ്കി.
? കളഭമഴയില് തെറിച്ച ചെറുപ്പക്കാരന്. നക്ഷത്രങ്ങളിലോ.
ഠ എല്ലാവര്ക്കും നന്മ വരണമേ എന്ന് പ്രാര്ത്ഥിച്ച് നന്മ ചെയ്യാന് ആഗ്രഹിക്കുന്ന യദു എന്ന ചെറുപ്പക്കാരന്. എന്നാല് നന്മ ചെയ്തിട്ടും അവരൊക്കെ നന്ദികേടു മാത്രമാണ് യദുവിനോട് കാണിച്ചത്.
? യദു എന്ന കഥാപാത്രം.
ഠ മൂന്ന് അപ്പിയറന്സുള്ള കഥാപാത്രമാണ് യദു. അമ്പലവാസിയായും പ്രതികാരദാഹിയായും മോഡേണ് വേഷത്തിലുമാണ് അഭിനയിച്ചത്. ഒരു തുടക്കക്കാരന് എന്ന നിലയിലും സോളോ നായകന് എന്ന നിലയിലും എനിക്ക് ഏറെ വെല്ലുവിളി ഉയര്ത്തിയ വേഷമായിരുന്നു യദുവിന്റേത്.
ആ ചിത്രത്തിലെ അഞ്ചു ഗാനങ്ങളില് 3 ഗാനങ്ങളിലും ഞാന് അഭിനയിച്ചു. എം.ജി. ശ്രീകുമാര് സാറാണ് സംഗീതം നല്കിയത്. കൂടാതെ ഒരു ഫൈറ്റ് സീനിലും അഭിനയിച്ചു.
