വിജയ് സേതുപതിയെന്ന നടനെയാണ് മിക്കവര്ക്കും പരിചയം, എന്നാല് ഡബ്ബിങ് ആര്ട്ടിസ്റ്റായും തിളങ്ങിയിട്ടുണ്ട് ഇന്ന് തെന്നിന്ത്യയിലെ പവര്ഫുള് ആക്ടറായി മാറിയ വിജയ് സേതുപതി. സിനിമ മോഹം തലയില് കയറിയപ്പോള് ഏതെങ്കിലും വിധേന സിനിമയില് എത്തിയാല് മതിയെന്ന ചിന്തയില് നിന്നാണ് ഡബ്ബിങിലേയ്ക്ക് എത്തിയത്. അവിടെയും തിളങ്ങി. മോഹന്ലാല് നായകനായ 'വരവേല്പ്പ്' എന്ന ചിത്രം തമിഴിലെത്തിയപ്പോള് ശബ്ദം കൊടുത്തത് സേതുപതിയാണ്. ഒരു മാധ്യമത്തിന് നല്കിയ അഭിമുഖത്തിലാണ് തന്റെ സിനിമാ വഴികളെക്കുറിച്ച് സേതുപതി പറഞ്ഞത്.
ആരാണ് വിജയുടെ ഹീറോ എന്ന ചോദ്യത്തിന് 'നാന് താ എന്നുടെ ഹീറോ' എന്നാണ് മറുപടി. ഓരോ നടന്മാരുടെയും അഭിനയം പണ്ടേ ശ്രദ്ധിച്ചിരുന്നു. ഷോട്ട് എടുക്കുന്ന സമയത്ത് അവര് എന്തൊക്കെയാണ് ചിന്തിക്കുക എന്ന് ആലോചിക്കാറുണ്ട്. ഭാര്യയും മക്കളുമാണ് ഏറ്റവും വലിയ ആരാധകര്. പുറത്തു പോകുമ്പോള് ആളുകള് സ്നേഹത്തോടെ കെട്ടിപ്പിടിക്കുന്നതും ഉമ്മ തരുന്നതുമൊന്നും മക്കള്ക്ക് ഇഷ്ടമല്ല. അച്ഛനെ ആരും കെട്ടിപ്പിടിക്കേണ്ടെന്നാണ് പറയുന്നത്. കൊല്ലം സ്വദേശി ജെസ്സിയാണ് ഭാര്യ. സിനിമ ആഗ്രഹം പറഞ്ഞപ്പോള് എതിര്ക്കാതെ കൂടെ നിന്നു. ഇപ്പോഴും അതേ പിന്തുണ തരുന്നെന്നും സേതുപതി വാചാലനായി.
വിക്രം വേദ റിലീസായ ശേഷം കേരളത്തില് നിന്നും നിരവധി മെസ്സേജുകള് ഫെയ്സ്ബുക്ക് വഴി ലഭിക്കാറുണ്ട്. തീര്ച്ചയായും മലയാളി ആരാധകരെ കാണാന് കേരളത്തിലേയ്ക്ക് വരുമെന്നും സേതുപതി പറഞ്ഞു.
