തിരുവനന്തപുരം: ആയിരത്തിലധികം തടവുകാര്‍ പാര്‍ക്കുന്ന പൂജപ്പുര സെന്‍ട്രല്‍ ജയിലില്‍ സുരക്ഷാ വീഴ്ച. തടവുപുള്ളികളുടെ ഏറ്റുമുട്ടലും, മാനസികാരോഗ്യപ്രശ്‌നങ്ങളുള്ളവരെ പാര്‍പ്പിച്ചിരിക്കുന്ന പത്താംബ്‌ളോക്കില്‍ നിരന്തരമുണ്ടാകുന്ന ആത്മഹത്യാശ്രമങ്ങളും ജയില്‍ചാട്ട സാദ്ധ്യതകളും പ്രതിരോധിക്കാനാകാതെ ഉദ്യോഗസ്ഥരെ വലയ്ക്കുകയാണ്.
സി.സി ടി.വി കാമറകള്‍ പ്രവര്‍ത്തിക്കാത്തതുള്‍പ്പെടെ ജയിലിലെ സുരക്ഷാ പിഴവുകള്‍ പലതവണ ചൂണ്ടിക്കാട്ടിയിട്ടും ഇതുവരെ പരിഹാരമായിട്ടില്ല. ഏഴുപേരെ കൊലപ്പെടുത്തിയതിന് തൂക്കുകയര്‍ ലഭിച്ച റിപ്പര്‍ ജയാനന്ദന്‍, ആലുവാ കൂട്ടക്കൊലക്കേസ് പ്രതി ആന്റണി, ഹൈടെക്ക് മോഷ്ടാവ് ബണ്ടിച്ചോര്‍ തുടങ്ങിയ കുറ്റവാളികളെ പാര്‍പ്പിച്ചിരിക്കുന്ന പൂജപ്പുരയില്‍ തടവുകാരുടെ എണ്ണത്തിന് ആനുപാതികമായി ജീവനക്കാരില്ലാത്തതും നിരീക്ഷണ കാമറകളുടെയും സംവിധാനങ്ങളുടെയും പോരായ്മകളുമാണ് സുരക്ഷാഭീതിയ്ക്ക് കാരണമാകുന്നത്. നിലവില്‍ തൂക്കുകയര്‍ കാത്ത് കഴിയുന്ന പത്ത് കുറ്റവാളികളാണുള്ളത്.
സെല്ലുകളിലും ജയില്‍ വളപ്പിലുമെല്ലാം നിരീക്ഷണത്തിനുള്ള 88 കാമറകള്‍ ഇല്ലാതായിട്ട് വര്‍ഷങ്ങളായി. ദൃശ്യങ്ങള്‍ റെക്കാഡ് ചെയ്യാന്‍ സംവിധാനമുണ്ടെങ്കിലും നിരീക്ഷണത്തിന് കണ്‍ട്രോള്‍ റൂമോ ജീവനക്കാരോ ഇല്ല. 69 ഏക്കര്‍ വിസ്തൃതിയുള്ള ജയില്‍വളപ്പ് സന്ധ്യയായാല്‍ ഇരുള്‍മൂടും. ജയില്‍ കെട്ടിടത്തിലും സെല്ലുകളിലും മാത്രമാണ് വെളിച്ചമുള്ളത്. കാമറകള്‍ പ്രവര്‍ത്തിക്കുന്നില്ലെന്ന് മനസിലാക്കി സന്ദര്‍ശകര്‍ തടവുകാര്‍ക്ക് ലഹരിവസ്തുക്കളും മൂര്‍ച്ചയുള്ള വസ്തുക്കളും കൈമാറുന്നുണ്ടെന്നും ജയില്‍ ഉദ്യോഗസ്ഥര്‍ കണ്ടെത്തിയിട്ടുണ്ട്.
മോഷണക്കേസില്‍ ശിക്ഷിക്കപ്പെട്ട ബണ്ടിച്ചോര്‍ ജയിലിനുള്ളില്‍ ബള്‍ബ് പൊട്ടിച്ച് വിഴുങ്ങി ആശുപത്രിയിലായ സംഭവം യഥാസമയം കണ്ടെത്താന്‍ കഴിയാതിരുന്നത് ജീവനക്കാരുടെ കുറവ് കാരണമാണ്. സംഭവം ഏറെനേരം കഴിഞ്ഞാണ് ജീവനക്കാര്‍ കണ്ടത്. ഇതുകഴിഞ്ഞ് രണ്ട് ദിവസം കഴിഞ്ഞപ്പോഴാണ് മറ്റൊരു തടവുകാരന്‍ ബ്‌ളേഡ് മുറിച്ച് വിഴുങ്ങിയത്. മെഡിക്കല്‍ കോളേജിലെത്തിച്ച ഇയാളെ സ്‌കാനിംഗിന് വിധേയനാക്കിയെങ്കിലും ബ്‌ളേഡ് തുണ്ടുകള്‍ പുറത്തെടുക്കാനായില്ല. എന്നാല്‍, ഇത്തരം ചില സംഭവങ്ങള്‍ പുറം ലോകം അറിയാതെ ഒതുക്കുന്നുവെന്ന ആക്ഷേപവുമുണ്ട്.
ഡിസിപ്ലിന്‍ ചുമതലയുള്ള ജോയിന്റ് സൂപ്രണ്ടിന്റെ തസ്തിക ഒന്നരവര്‍ഷമായി ഒഴിഞ്ഞുകിടക്കുകയാണ്. അസി. സൂപ്രണ്ടുമാരുടെ എട്ട് തസ്തികകളില്‍ ആറും ഒരുവര്‍ഷത്തിലധികമായി ആളില്ലാത്ത നിലയിലാണ്. അസി. പ്രിസണ്‍ ഓഫീസര്‍മാരുടെ 40 ഒഴിവുകളുണ്ട്. 727 തടവുകാരെ പാര്‍പ്പിക്കാന്‍ ശേഷിയുള്ള പൂജപ്പുര സെന്‍ട്രല്‍ ജയിലില്‍ ഇപ്പോള്‍ 1,283 തടവുകാരാണുള്ളത്.
കാലപ്പഴക്കം കാരണം ജയിലിലെ ചുറ്റുമതിലിന് ബലക്ഷയമുണ്ടായിട്ടുണ്ടെന്നാണ് വിലയിരുത്തല്‍. 130 വര്‍ഷം മുന്‍പ് കുമ്മായവും ചുടുകട്ടയും ചേര്‍ത്തുണ്ടാക്കിയ മതിലിനടുത്ത് ഓടകളും ഡ്രെയിനേജുമുണ്ട്. എലികള്‍ തുരക്കുന്നതും പതിവാണ്. ഒന്നരക്കോടി ചെലവിട്ട് ജയിലിന്റെ മതിലുകള്‍ ബലപ്പെടുത്താന്‍ ആഭ്യന്തരവകുപ്പ് അനുമതി നല്‍കിയിട്ടുണ്ട്.
Comments