ഡിസംബർ എട്ടിന് 15 ''ലിമിറ്റഡ് എഡിഷൻ സ്റ്റെൽത് ബ്ലാക്ക് ക്ലാസിക് 500'' ബൈക്കുകൾ ഓൺലൈനിൽ വില്പനയ്ക്ക് എന്ന വാർത്ത പുറത്തുവന്നതോടെ ബുള്ളറ്റ് ആരാധകരുടെ കുത്തൊഴുക്ക് തന്നെയായിരുന്നു. ഒറ്റയടിക്ക് 2000ത്തിലധികമാളുകളാണ് രജിസ്റ്റർ ചെയ്തത്.
40 ദിവസത്തോളം എൻ.എസ്.ജി ബ്ലാക്ക് ക്യാറ്റ് കമ്മാൻഡോകൾ ഉപയോഗിച്ച ബൈക്കുകളാണ് വില്പനയ്ക്ക് വച്ചത്. 8,000 കിലോമീറ്ററോളം സഞ്ചരിച്ച ബൈക്കുകളായിരുന്നു അവ. തീവ്രവാദത്തിന് എതിരെയുള്ള പോരാട്ടം, രാജ്യസേവനം എന്നിവ സംബന്ധിച്ച സന്ദേശം ജനങ്ങളിലെത്തിക്കുന്നതിന്റെ ഭാഗമായിട്ടായിരുന്നു ബുള്ളറ്റുകളിൽ യാത്ര ചെയ്തത്.
കമ്പനി എൻ.എസ്.ജിക്ക് വേണ്ടി നിർമിച്ച ''ലിമിറ്റഡ് എഡിഷൻ സ്റ്റെൽത് ബ്ലാക്ക് റോയൽ എൻഫീൽഡ് ക്ലാസിക്ക്'' ബൈക്കുകളാണ് റെക്കോർഡ് വില്പന കാഴ്ചവച്ചത്. ഓൺലൈനിൽ ബൈക്കുകൾ വില്പനയ്ക്ക് വച്ചതും 15 സെക്കൻഡിൽ 15 ബുള്ളറ്റ് ബൈക്കുകളായിരുന്നു വിറ്റഴിച്ചത്. ഓൺലൈനിൽ 15,000 രൂപ അഡ്വാൻസായി നൽകണമായിരുന്നു. പിന്നീട് ഡീലർഷിപ്പുകളിൽ മുഴുവൻ തുകയുമടച്ച് ബൈക്ക് വാങ്ങാം.
രാജ്യത്തിന് വേണ്ടിയുള്ള എൻ.എസ്.ജിയുടെ സേവനം ആരംഭിച്ചിട്ട് 33 വർഷങ്ങളായി എന്നതിന്റെ ഓർമ്മ പുതുക്കൽ കൂടിയായിരുന്നു കമാൻഡോകളുടെ 8,000 കിലോമീറ്റർ യാത്ര. 1955 മുതൽ റോയൽ എൻഫീൽഡ് ബൈക്കുകളാണ് സേന ഉപയോഗിച്ചുകൊണ്ടിരിക്കുന്നത്. എൻ.എസ്.ജിയുടെ ഈ മോട്ടോർ സൈക്കിൾ എക്സ്പെഡിഷൻ അതിന്റെ ഒരു ഭാഗം മാത്രമാണ്.
