റോത്തക്ക്: ഹരിയാനയില് നടക്കുന്ന 63-ാമത് ദേശീയ സീനിയര് സ്കൂള് അത്ലറ്റിക് മീറ്റില് കേരളം കിരീടം നിലനിര്ത്തിയതിനു പിന്നാലെ ആതിഥേയരായ ഹരിയാന തട്ടിപ്പിന് ശ്രമം. പെണ്കുട്ടികളുടെ നാലു ഗുണം 400 മീറ്റര് റിലേയിലാണ് സര്വകലാശാല താരത്തെ മത്സരിപ്പിക്കാനാണ് ആതിഥേയരായ ഹരിയാന ശ്രമം നടത്തിയത്.
ഹരിയാന ഗുണ്ടൂര് സര്വകലാശാല മീറ്റില് മത്സരിച്ച താരത്തെയാണ് സ്കൂള് മീറ്റ് ടീമില് ഹരിയാന ഉള്പ്പെടുത്തിയത്. ഇതേതുടര്ന്ന് പ്രതിഷേധവുമായി കേരളം രംഗത്തെത്തുകയായിരുന്നു. കേരളത്തിന്റെ പ്രതിഷേധത്തെ തുടര്ന്ന് മത്സരവും തുടങ്ങാന് വൈകുകയാണ്.
അതേസമയം,ഹരിയാനയുടെ തണുത്ത ട്രാക്കില് പടപൊരുതി കേരളം കിരീടം നിലനിര്ത്തി. റോത്തക്കില് നടന്ന ദേശീയ സീനിയര് സ്കൂള് മീറ്റില് തുടര്ച്ചയായ 20-ാം തവണയും കേരളം കിരീടം നിലനിര്ത്തി ചാംപ്യന്കുതിപ്പ് തുടരുകയാണ്.
കനത്ത വെല്ലുവിളി ഉയര്ത്തിയ ആതിഥേയരായ ഹരിയാനയെ മറികടന്നാണ് കേരളത്തിന്റെ കൗമാരകുതിപ്പ് ചാംപ്യന്പട്ടം നിലനിര്ത്തുന്നത്. തുടര്ച്ചയായ ഇരുപതാം തവണയാണ് കേരളം കിരീടം നേടുന്നത്. 80 പോയിന്റുകള് നേടിയാണ് കേരളത്തിന്റെ കിരീടനേട്ടം. മീറ്റില് കേരളം ഒന്പതു സ്വര്ണ്ണം നേടി. മീറ്റിന്റെ അവസാന ദിനമായ ഇന്ന് 1500 മീറ്ററില് കേരളത്തിന്റെ അനുമോള് തമ്പിയും, ആദര്ശ് ഗോപിയും സ്വര്ണ്ണം നേടി. രണ്ടു പേരും എറണാകുളം മാര്ബേസിലിന്റെ താരങ്ങളാണ്. 1500 മീറ്ററില് കേരളത്തിന്റെ തന്നെ കെ.ആര് ആതിരയ്ക്കാണ് വെള്ളി. 200 മീറ്ററില് ആര്. അശ്വിന്് വെള്ളിയും നേടി. ആതിഥേയരായ ഹരിയാനയാണ് രണ്ടാം സ്ഥാനത്ത്.
ദേശീയ സ്കൂള് മീറ്റില് ഇഞ്ചോടിഞ്ച് പോരാട്ടം നടന്ന ഇന്നലെ ഹരിയാനയെ മറികടന്ന് കേരളം മുന്നേറിയപ്പോള് ഹരിയാന താരങ്ങള് കേരള ക്യാംപില് കയറി താരങ്ങളെ മര്ദ്ദിച്ചിരുന്നു. കേരളാ ക്യാപ്റ്റന് പി.എന് അജിത്ത് ഉള്പ്പെടെയുള്ള താരങ്ങള്ക്ക് പരിക്കേല്ക്കുകയും ചെയ്തിരുന്നു. അതിനു പിന്നാലെ പരസ്യമായി മാപ്പു പറഞ്ഞുകൊണ്ട് ഹരിയാന രംഗത്ത് എത്തുകയും ചെയ്തു.
