ന്യൂഡല്ഹി: രാജ്യത്ത് അഴിമതി വിരുദ്ധ നിരീക്ഷണ സമിതിയായ ലോക്പാല് നിയമനം വൈകില്ലെന്ന പ്രതീക്ഷയുമായി സുപ്രീം കോടതി. ലോക്പാല് നിയമനത്തിനുള്ള സെലക്ഷന് കമ്മിറ്റിയിലേക്ക് പ്രമുഖ നിയമജ്ഞനെ നിയമിക്കുന്നതിനുള്ള പ്രക്രിയ പുരോഗിക്കുകയാണെന്ന് അറ്റോര്ണി ജനറല് കെ.കെ വേണുഗോപാല് വ്യക്തമാക്കവേയാണ് കോടതി ഈ നിരീക്ഷണം നടത്തിയത്. സെലക്ഷന് കമ്മിറ്റി ഇക്കഴിഞ്ഞ 10ന് യോഗം ചേര്ന്നിരുന്നതായും അറ്റോര്ണി അറിയിച്ചു. ഹര്ജിയില് വീണ്ടും വാദം കേള്ക്കുന്നത് മേയ് 15ലേക്ക് മാറ്റി.
സമിതിയിലേക്ക് പ്രമുഖ നിയമജ്ഞനെ നിയമിക്കുന്നതിനുള്ള ശിപാര്ശ സര്ക്കാര് നല്കികഴിഞ്ഞു. നേരത്തെ മുതിര്ന്ന അഭിഭാഷകന് പി.പി റാവുവിനെ നിയമിച്ചുവെങ്കിലും അദ്ദേഹം കഴിഞ്ഞ വര്ഷം മരണമടഞ്ഞതോടെ ആ സ്ഥാനം ഒഴിഞ്ഞുകിടക്കുകയാണെന്നും അറ്റോര്ണി വ്യക്തമാക്കി. ഇതോടെയാണ് ഹര്ജി പരിഗണിക്കുന്ന ജസ്റ്റീസ് രഞ്ജന് ഗോഗോയുടെ ബെഞ്ച്, ഈ ഘട്ടത്തില് ഒരു വിധിയും പറയുന്നില്ലെന്നും മേയ് 15വരെ കാത്തിരിക്കാമെന്നും നിര്ദേശിച്ചത്.
കോമണ് കോസ് എന്ന സംഘടന നല്കിയ കോടതിയലക്ഷ്യ ഹര്ജിയിലാണ് കോടതിയുടെ പരാമര്ശം. ലോക്പാല് നിയമനം സംബന്ധിച്ച് കഴിഞ്ഞ വര്ഷം ഏപ്രില് 27ന് കോടതി പുറപ്പെടുവിച്ച ഉത്തരവ് ഇതുവരെ പാലിച്ചില്ലെന്ന് കാണിച്ചാണ് കോമണ് കോസ് കോടതിയെ സമീപിച്ചത്.
