ന്യുഡല്ഹി: ദേശീയ ചലച്ചിത്ര പുരസ്കാര വിതരണ ചടങ്ങിലെ വിവേചനത്തില് പ്രതിഷേധിച്ച് വിട്ടുനിന്നവരുടെ പുരസ്കാരം തപാലില് വീട്ടിലെത്തും. മെഡലും പ്രശംസി പത്രവും അവാര്ഡ് ജേതാക്കള്ക്ക് തപാല് മുഖേന അയച്ചു കൊടുക്കുമെന്ന് കേന്ദ്ര വാര്ത്താ വിതരണ മന്ത്രാലയം വ്യക്തമാക്കി. നേരത്തെയും പുരസ്കാരദാന ചടങ്ങിന് എത്താന് സാധിക്കാത്ത ജേതാക്കള്ക്ക് തപാല് വഴി പുരസ്കാരം അയച്ചു നല്കിയിട്ടുണ്ടെന്നും മന്ത്രാലയ അധികൃതര് വ്യക്തമാക്കി.
65-ാമത് ദേശീയ പുരസ്കാര വിതരണ ചടങ്ങില് 11 പേര്ക്ക് മാത്രമാണ് രാഷ്ട്രപതി പുരസ്കാരം നല്കിയത്. ഇതില് പ്രതിഷേധിച്ചാണ് മലയാളത്തില് നിന്നുള്ള പുരസ്കാര ജേതാക്കളടക്കം വിട്ടുനിന്നത്. രാഷ്ട്രപതി പഒരസ്കാരം നല്കുമെന്ന് അറിയിച്ച ശേഷം തലേന്ന് റിഹേഴ്സല് ചടങ്ങില് വച്ചാണ് 11 പേര്ക്ക് മാത്രമാണ് രാഷ്ട്രപതി പുരസ്കാരം നല്കുന്നതെന്ന് അറിയിച്ചത്. ഇതില് പ്രതിഷേധിച്ച് ഫഹദ് ഫാസില്, പാര്വതി, ദിലീഷ് പോത്തന് തുടങ്ങി കേരളത്തില് നിന്നും പുറത്തു നിന്നുമുള്ള 68ഓളം ജേതാക്കള് വിട്ടുനിന്നു.
വിവേചനത്തിനെതിരെ എഴുപതോളം അവാര്ഡ് ജേതാക്കളാണ് പ്രതിഷേധിച്ചത്. രാഷ്ട്രപതി പുരസ്കാരം വിതരണം ചെയ്യുന്ന പതിവ് മാറ്റിയാല് ചടങ്ങില് നിന്ന് വിട്ടുനില്ക്കുമെന്ന് ചൂണ്ടിക്കാട്ടി ഇവര് സര്ക്കാരിന് നിവേദനം നല്കുകയും ചെയ്തു. എന്നാല് നിവേദനത്തില് ഒപ്പിട്ട യേശുദാസും ജയരാജും ഉള്പ്പെടെ ചിലര് പിന്നീട് പുരസ്കാരം ഏറ്റുവാങ്ങി.
