ഇരുപതു കൊല്ലം നാടകാഭിനയവുമായി ജീവിച്ചതിനു പിന്നാലെ ഒരു സമിതിയുണ്ടാക്കാന് തീരുമാനിച്ചപ്പോഴാണ് കൊച്ചുപ്രേമനെ സിനിമയിലെടുത്തത്. ചിത്രം മഞ്ഞിലാസിന്റെ 'ഏഴുനിറങ്ങള്.' പിന്നെയൊരു ഇടവേള അതിന്റെ പ്രധാന കാരണം കൊച്ചുപ്രേമന് പറയും.
അന്നൊക്കെ സിനിമ നിര്മ്മാണം ഭൂരിപക്ഷവും നടന്നിരുന്നത് മദ്രാസിലാണ്. വീട്ടുകാര്ക്ക് അതേതോ വിദേശരാജ്യമാണെന്ന വിചാരമായിരുന്നു. അതുകൊണ്ടുതന്നെ അധികകാലം വീടുവിട്ടു നിന്നുള്ള കളി വേണ്ടെന്ന് അവര് പറഞ്ഞു.
രണ്ടാമത്തെ സിനിമ രാജസേനന്റെ 'ദില്ലിവാല രാജകുമാരന്.' അതില് ഒരു കുടുംബത്തിന്റെ നാഥന് ഈ ചെറിയ മനുഷ്യനായിരുന്നു. ചിത്രം ഹിറ്റായതോടെ കൊച്ചുപ്രേമന് 'വലിയ' പ്രേമനായി. മൂന്നോ, നാലോ തലമുറ ഈ നടന്റെ മുന്നിലൂടെ കടന്നുപോയി. പക്ഷേ ഇപ്പോഴും കൊച്ചുപ്രേമന് സിനിമയിലുണ്ട്.
ചാനല് രംഗത്ത് ദൂരദര്ശന് മാത്രമുള്ള കാലത്ത് ഏറ്റവും കൂടുതല് സമയം മിനിസ്ക്രീനില് പ്രത്യക്ഷപ്പെട്ട നടനാണ് കൊച്ചുപ്രേമന്. സിനിമയില് അവസരം ചോദിച്ചു പോയിട്ടില്ല. എന്നാല് പ്രേക്ഷകര് തിരിച്ചറിഞ്ഞു തുടങ്ങിയപ്പോള് അവര്ക്ക് മതിപ്പുണ്ടായെന്ന് തോന്നിത്തുടങ്ങിയ ശേഷം റോള് ചോദിച്ചിട്ടുണ്ട്. അവസരം ചോദിക്കാത്തവരായി ആരുംതന്നെയില്ല എന്നാണ് ഈ നടന്റെ അഭിപ്രായം.
പുതിയ തലമുറ സിനിമകളില് കൊച്ചുപ്രേമനെ പ്പോലെയുള്ളവരുടെ സാന്നിധ്യം കുറഞ്ഞുവരുന്നുണ്ടല്ലോ?
ശരിയാണ്. പലര്ക്കും മറ്റ് ജീവിതമാര്ഗങ്ങള് തേടുകയോ, വീട്ടിലിരിക്കുകയോ ചെയ്യേണ്ട അവസ്ഥയുണ്ട്. എന്നാല് എന്നെ സംബന്ധിച്ച് ആ സാഹചര്യമില്ല. സിനിമയുടെ എണ്ണത്തില് കുറവുണ്ടാകുന്നുണ്ട്.
എന്നാലും മാറി നില്ക്കേണ്ടിവരുന്നില്ല. 2017-ല് അയാള് ശശി, സഖാവിന്റെ പ്രിയ സഖി, തേനീച്ചയും പീരങ്കിപ്പടയും എന്നിങ്ങനെ ഏഴു സിനിമകളില് അഭിനയിച്ചു. ഇക്കൊല്ലം അത്രതന്നെ ചിത്രങ്ങളിലേക്ക് കരാറായിട്ടുണ്ട്.
പുതിയവര്ക്കൊപ്പം അഭിനയിക്കുമ്പോള് എന്തു തോന്നുന്നു?
കൂടുതല് കംഫര്ട്ട് പുതിയവര്ക്കൊപ്പം അഭിനയിക്കുന്നതാണ്. സ്വാഭാവികമായി പ്രകടിപ്പിക്കുന്ന വികാരങ്ങള്ക്കണ് അവര് പ്രാധാന്യം നല്കുന്നത്.
അവര് നിര്ദ്ദേശങ്ങള് പറയില്ല. ഞാനൊരു സീനിയര് ആയതുകൊണ്ടായിരിക്കും.
താങ്കളുടെ സംഭാഷണ രീതിയാണോ ഹാസ്യത്തിന്റെ അടിസ്ഥാനം?
നമുക്കൊരു സ്ഥായിയായ അഭിനയ രീതിയുണ്ടല്ലോ. അത് മാറ്റാന് കഴിയില്ല. അരോചകത്വമുണ്ടാക്കാതെ തമാശ കൊടുക്കാന് കഴിയുന്നയാള് എന്നാണ് എന്നെക്കുറിച്ച് പറയുന്നതെന്നാണറിവ്.
പിന്നെ തമാശ റോളുകള് മാത്രമല്ല ഞാന് ചെയ്തിട്ടുള്ളത്. രാജീവ് അഞ്ചലിന്റെ ഗുരുവില് വില്ലനായും അശോക് ആര്. നാഥിന്റെ മിഴികള് സാക്ഷിയില് സീരിയസ് വേഷവും ചെയ്തു.
മൂന്നര പതിറ്റാണ്ടായി താങ്കള് സിനിമയിലെത്തിയിട്ട്. എന്നാല് പുതിയവര്ക്ക് ഈ നിലനില്പ്പ സാധ്യമാകുന്നില്ല. എന്തുകൊണ്ടാണ്. ?
ശരിയാണ്. നാലോ, അഞ്ചോ നായകന്മാരും നായികമാരുമൊക്കെ ഒരേ സിനിമയില് വരുകയും കുറഞ്ഞ ചിത്രങ്ങള്ക്കു ശേഷം പലരും മാറ്റപ്പെടുകയും ചെയ്യുന്നു. പിന്നെ പുതിയവര് വരുന്നു. ഇപ്പോള് പഴയതുപോലെയല്ല അഭ്യസ്തവിദ്യരായ നിരവധി പേര് ഈ രംഗത്തേക്ക് കടന്നുവരുന്നുണ്ട്. ഇവിടമൊരു മത്സരവേദിയായി മാറിയിരിക്കുന്നു.
ജോലി രാജിവച്ചും അവധിയെടുത്തുമൊക്കെ വരുന്നവരുണ്ട്. സിനിമാഭിനയം ഒരു തൊഴിലായി, വരുമാനമാര്ഗ്ഗമായി കരുതി മുന്നോട്ടുപോകാന് ഇവര്ക്കൊക്കെ എത്രമാത്രം സാധിക്കുന്നുവെന്നത് ചിന്തിക്കേണ്ട കാര്യമാണ്.
