ന്യൂഡല്ഹി: ഇന്ത്യന് സൈനിക സേനയിലേക്കു വര്ഷം തോറും ആയിരക്കണക്കിനു കേഡറ്റ്സുകളെ പരിശീലിപ്പിച്ചയയ്ക്കുന്ന നാഷണല് ഡിഫന്സ് അക്കാദമിയിലെ പ്രിന്സിപ്പലിനും മറ്റു അധ്യാപകര്ക്കുമെതിരെ സിബിഐ കേസ്. പൂനെയില് ഖഡക്സ്വാലയിലുള്ള അക്കാദമിയിലെ പ്രിന്സിപ്പലിനും അധ്യാപകര്ക്കുമെതിരെയാണു പുതിയ നിയമനങ്ങളില് ക്രമക്കേട് കാണിച്ചെന്ന കുറ്റത്തിനു കേസെടുത്തിരിക്കുന്നത്.
പ്രിന്സിപ്പല് ഓം പ്രകാശ് ശുക്ലയ്ക്കൊപ്പം പൊളിറ്റിക്കല് സയന്സ് പ്രഫസര്, കെമിസ്ട്രി, ഗണിതം എന്നീ വിഭാഗങ്ങളിലെ അസിസ്റ്റന്റ് പ്രഫസര് എന്നിവര്ക്കെതിരെയാണു കേസ്. അഴിമതി, വഞ്ചന, ക്രിമിനല് ഗൂഢാലോചന എന്നീ കുറ്റങ്ങള് ചുമത്തിയാണ് കേസെടുത്തിരിക്കുന്നത്. കേസെടുത്തതിനു പിന്നാലെ ഇവരുടെ വീടുകളിലും പൂനെയിലെ അക്കാദമിയിലും സിബിഐ റെയ്ഡ് നടത്തി.
നാഷണല് ഡിഫന്സ് അക്കാദമിയിലെ രാജ്യത്തെ തന്നെ ഏറ്റവും മുതിര്ന്ന പ്രഫസര്മാരില് ഒരാളാണ് 2011 മുതല് പ്രിന്സിപ്പല് സ്ഥാനം വഹിക്കുന്ന ശുക്ല. അക്കാദമിക് പെര്ഫോമന്സ് രേഖപ്പെടുത്തുന്ന അക്കാദമി റെക്കോര്ഡില് തിരുത്തലുകള് നടത്തിയാകാം ഇന്സ്റ്റിറ്റിയൂട്ടില് യോഗ്യത നേടാതെ പോയ അധ്യാപകരെ കയറ്റിയതെന്നാണ് സിബിഐയുടെ കണ്ടെത്തല്. അനുഭവ പരിചയം ഉള്പ്പെടെയുള്ള വിഷയങ്ങളിലും, സര്ട്ടിഫിക്കറ്റ് ഉള്പ്പെടെയുള്ള രേഖകളിലും കൃത്രിമം കാട്ടിയതായാണ് കണ്ടെത്തിയിരിക്കുന്നത്. എന്ഡിഎയില് അധ്യാപക നിയമനം നടത്തുന്നത് യൂണിയന് പബ്ലിക് സര്വീസ് കമ്മീഷന്(യുപിഎസ്സി) ആണ്.
