ഹോണ്ട മോട്ടോർസൈക്കിൾ ആൻഡ് സ്കൂട്ടർ ഇന്ത്യ ഫ്ലാഗ്ഷിപ്പ് മോട്ടോർസൈക്കിൾ ഗോൾഡ് വിങിന്റെ ഡെലിവറി ആരംഭിച്ചതായി സൂചന. സ്റ്റാൻഡേർഡ്, ടൂർ എന്നീ രണ്ട് വകഭേദങ്ങളിലാണ് പുതിയ ഗോൾഡ് വിങ് ലഭ്യമായിരിക്കുന്നത്. ഡൽഹി എക്സ്ഷോറൂം 26.85 ലക്ഷം രൂപയാണ് പുത്തൻ ഗോൾഡ് വിങിന്റെ വില. ജയ്പൂരിലാണ് സോൾ റെഡ് നിറത്തിൽ എത്തിയിരിക്കുന്ന ഗോൾഡ് വിങിന്റെ ആദ്യ ഡെലിവറി നടന്നിരിക്കുന്നത്.
പുതിയ ഗോൾഡ് വിങ് മുൻമോഡലുകളെ അപേക്ഷിച്ച് കരുത്തുറ്റതും ഭാരംകുറഞ്ഞതുമാണെന്നാണ് ഹോണ്ട അവകാശപ്പെടുന്നത്. 126പിസ് കരുത്തും 170എൻഎം ടോർക്കും നൽകുന്ന 1,833സിസി ലിക്വിഡ് കൂൾഡ് 6 സിലിണ്ടർ എൻജിനാണ് ഗോൾഡ് വിങിന്റെ പവർഹൗസ്. 7 സ്പീഡ് ഡ്യുവൽ ക്ലച്ച് ട്രാൻസ്മിഷനും എൻജിനിൽ ഒരുക്കിയിട്ടുണ്ട്.
ആപ്പിൾ കാർ പ്ലെ ഫീച്ചർ ഉൾപ്പെടുത്തിയാണ് ഗോൾഡ് വിങ് എത്തിയിരിക്കുന്നത്. മോട്ടോർസൈക്കിളിന്റെ ചരിത്രത്തിൽ ഇതാദ്യമെന്നാണ് ഹോണ്ട അവകാശപ്പെടുന്നത്. ഇതുവരെയായി 35 ബുക്കിങ് നേടിയെടുത്ത് മികച്ച സ്വീകാര്യത ലഭിച്ചിരിക്കുന്ന ഗോൾഡ് വിങിന്റെ ആദ്യ ഡെലിവറി നടത്താൻ കഴിഞ്ഞു, ഇത് വളരെ സന്തോഷം നൽകുന്നുവെന്ന് സീനിയർ വൈസ് പ്രസിഡന്റ് യാദവീന്ദർ സിങ് ഗുലേറിയ അഭിപ്രായപ്പെട്ടു.
