ബെംഗലുരു: ഗൗരി ലങ്കേഷ് വധക്കേസില്‍ പ്രതി പിടിയിലായതിന് പിന്നാലെ അന്വേഷണം നടത്തിയ പോലീസിന് കിട്ടിയിരിക്കുന്നത് ഞെട്ടിക്കുന്ന വിവരം. അടുത്തതായി അക്രമിസംഘം ലക്ഷ്യമിട്ടിരിക്കുന്നത് കെ എസ് ഭഗവാനെ ആണെന്നും കര്‍ണാടകത്തിലെ ഹിന്ദുത്വവിരുദ്ധത ആശയം എഴുതുകയും പ്രചരിപ്പിക്കുകയും ചെയ്ത എല്ലാ എഴുത്തുകാരും സാമൂഹ്യപ്രവര്‍ത്തകരും കൊലപാതകികളുടെ പട്ടികയിലുണ്ടെന്നും ഒരു ഡയറിയെ ഉദ്ധരിച്ചാണ് റിപ്പോര്‍ട്ട് പുറത്തു വന്നിരിക്കുന്നത്.
ഹിന്ദുത്വത്തിന്റെ വിമര്‍ശകരെ ഭീഷണിപ്പെടുത്തുക എന്നതാണ് കൊലയാളികളുടെ തന്ത്രമെന്ന് പോലീസ് പറയുന്നു. വെറുതെ ഗൂഢാലോചന നടത്തുന്ന അക്രമികളല്ല ഇവരെന്നാണ് ഇന്റലിജന്‍സ് റിപ്പോര്‍ട്ട് പറയുന്നത്. വിമര്‍ശകരെ മുഴുവന്‍ കൊന്നൊടുക്കാന്‍ ഏതറ്റം പോവുന്നവരാണ് ഹിന്ദുത്വ ഗ്രൂപ്പുകള്‍. സ്‌ളീപ്പര്‍സെല്‍സ് പോലെയാണ് അക്രമിസംഘം പ്രവര്‍ത്തിക്കുന്നത് ആരാണ് നിര്‍ദേശിക്കുന്നതെന്നോ ആരാണ് പദ്ധതി നടപ്പാക്കുന്നതെന്നോ ഇരയ്‌ക്കോ കൃത്യം നടത്തുന്നയാള്‍ക്കോ അറിയില്ല. അക്രമിസംഘത്തെ നയിക്കുന്നത് അജ്ഞാതസംഘമാണ്. ഹിന്ദു വിരുദ്ധത പ്രചരിപ്പിക്കുന്ന എല്ലാവരേയും കൊലപ്പെടുത്താനാണ് ലക്ഷ്യമിട്ടിട്ടുള്ളത്.
കര്‍ണാടകത്തില്‍ അന്ധവിശ്വാസ വിരുദ്ധ ബില്‍ പാസാക്കാനുള്ള നടപടികള്‍ ശക്തമായതോടെ എഴുത്തുകാര്‍ക്കും സാമൂഹ്യപ്രവര്‍ത്തകര്‍ക്കും നേരെയുള്ള ആക്രമണങ്ങള്‍ വര്‍ധിച്ചത്. സംഘത്തിന്റെ തലവന്‍ കൈവശം വെച്ചിരുന്ന ഒരു ഡയറി അടുത്തിടെ പോലീസിന്റെ കൈവശം ലഭിച്ചിരുന്നു. കര്‍ണാടകത്തില്‍ നിന്ന് എട്ടുപേരാണ് ഈ ഡയറിയിലുള്ളത്. ഗൗരി ലങ്കേഷിന് പുറമേ ഭഗവാനും നിദുമമിതി മഠാധിപതി വീരഭദ്ര ചെന്നമല്ലയും ഗിരീഷ് കര്‍ണാടുമൊക്കെയാണ് ആ പട്ടികയില്‍ ഉള്ളത്. നേരത്തെ തന്നെ ചെന്നമല്ല താന്‍ ഹിന്ദുത്വ ഭീകരരുടെ കൈകള്‍ കൊണ്ട് കൊല്ലപ്പെടാമെന്ന് വെളിപ്പെടുത്തിയിരുന്നു. ഭഗവാന്റെ വീടിന് മുമ്പിലുള്ള ഒരുവാഹനം നിരന്തരം അങ്ങോട്ടും ഇങ്ങോട്ടും പോകാറുണ്ടെന്ന് പോലീസ് സ്ഥീരീകരിച്ചിട്ടുണ്ട്. ഭഗവാനുള്ള സുരക്ഷ പോലീസ് വര്‍ധിപ്പിക്കുകയും ചെയ്തു.
കെഎസ് ഭഗവാനാണ് കൊലപാതകികളുടെ അടുത്ത ലക്ഷ്യമെന്നാണ് സൂചന. എംഎം കല്‍ബുര്‍ഗി, ഗോവിന്ദ് പന്‍സാരെ, നരേന്ദ്ര ദാബോല്‍ക്കര്‍ എന്നിവരെ കൊലപ്പെടുത്തിയതിന് സമാനമായ ശ്രമം ഉണ്ടായേക്കുമെന്നാണ് പോലീസ് ഭയക്കുന്നത്. തുടര്‍ന്ന് അദ്ദേഹത്തിന്റെ വീടിന് കനത്ത സുരക്ഷ ഏര്‍പ്പാടാക്കി. പോലീസ് നിര്‍ദേശം അനുസരിച്ച് പല പൊതുപരിപാടികളും അദ്ദേഹം നിരസിക്കുകയാണ്. എന്നാല്‍ തന്റെ കൃതികളിലുടെ അദ്ദേഹം എഴുത്തു തുടരുന്നുണ്ട്. ഭീഷണിയില്‍ ഭയന്ന് കൃതികള്‍ക്ക് സെന്‍സര്‍ഷിപ്പ് നടത്താനോ വിമര്‍ശനങ്ങളില്‍ പേടിച്ച് പിന്മാറാനോ ഇല്ലെന്ന് ഭഗവാന്‍ പറയുന്നു. ഹിന്ദുത്വത്തെ വിമര്‍ശിക്കുന്ന 'എന്തുകൊണ്ട് രാമമന്ദിരം നമുക്ക് ആവശ്യമില്ല' എന്ന പുസ്തകം രചിച്ചിട്ടുണ്ടെന്നും ഭഗവാന്‍ വ്യക്തമാക്കി.
വിമര്‍ശിക്കുന്നവര്‍ കൊല്ലപ്പെടുന്ന സംഭവങ്ങള്‍ ആവര്‍ത്തിച്ചതോടെ പലരും പ്രസംഗിക്കുന്നതും എഴുതുന്നതും സെന്‍സര്‍ ചെയ്യുകയോ നിര്‍ത്തുകയോ ചെയ്തിട്ടുണ്ട്. തങ്ങള്‍ ഹിന്ദുത്വത്തിനെതിരാണ് എന്നാല്‍ ഹിന്ദുക്കള്‍ക്ക് എതിരല്ലെന്ന് വീരഭദ്ര ചെന്നമല്ല പറയുന്നു. തുല്യതയും സാമൂഹിക നീതിയുമാണ് ഉണ്ടാവേണ്ടത്. കര്‍ണാടക പുരോഗമന ചിന്ത പുലര്‍ത്തുന്ന സംസ്ഥാനമാണ്. പല ആശയങ്ങളെയും പിന്തുണച്ചിട്ടുണ്ട് ഇവിടത്തെ ജനങ്ങള്‍. അതുകൊണ്ട് ഇത്തരം ചോദ്യങ്ങള്‍ ഇനിയും ഉയര്‍ന്നുകൊണ്ടിരിക്കുമെന്ന് ചെന്നമല്ല പറയുന്നു. ഗൗരി ലങ്കേഷ് കൊലപ്പെട്ടതിന് ശേഷം 26 പേര്‍ക്കാണ് കര്‍ണാടകാ സര്‍ക്കാര്‍ സുരക്ഷ ഏര്‍പ്പാടാക്കിയത്.
Comments