വളരെ മനോഹരമാണ് അവളുടെ ആ കണ്ണുകള്, ആരായാലും ഒന്ന് നോക്കിപ്പോകും. രണ്ട് വയസ്സുകാരിയായ മെഹലാനിയുടെ വിടര്ന്ന മിഴികള്ക്ക് അത്രയ്ക്ക് അഴകാണ്. ജനിക്കുമ്പോഴേ കുട്ടിയുടെ കണ്ണുകള് ഇങ്ങനെയായിരുന്നു. അവളുടെ അമ്മ കെരീനയെയും ആ കണ്ണുകള് തന്നെയായിരുന്നു ആദ്യം കീഴ്പ്പെടുത്തിയത്. എന്നാല് അച്ഛന് മിറോണും ബന്ധുക്കളും മകളുടെ കണ്ണിന്റെ അസാധാരണ വരുപ്പവും ആകൃതിയം ശ്രദ്ധിച്ചിരുന്നു. ഡോക്ടര്മാര് ഒടുവില് അതിന്റെ കാരണം വെളിപ്പെടുത്തിയപ്പോള് അമ്മ കെരീനയ്ക്ക് അത് സഹിക്കാവുന്നതിലും അപ്പുറമായിരുന്നു.
ജനിതകമായുള്ള ഒരു രോഗമാണ് മെഹലാനിയുടെ അഴകാര്ന്ന മിഴികളുടെ കാരണം. 'ആക്സന്ഫെല്ഡ്- ഗീഗര്' (അഃലിളലഹറഏശലഴലൃ) എന്ന അസുഖമാണ് കുട്ടിക്ക് എന്ന് പറഞ്ഞപ്പോള് മുമ്പൊരിക്കലും കേട്ടിട്ടില്ലാത്ത ആ പേര് കേട്ട് കെരീന ഞെട്ടി. എന്ത് രോഗമാണ് അത് എന്ന് പോലും അവള്ക്കറിയില്ല. ചിലപ്പോള് കണ്ണുകളിലെ ഐറിസ് ഉണ്ടാകില്ല, അല്ലെങ്കില് തീരെ ചെറുതായിരിക്കും, കൃഷ്ണമണിയാണെങ്കില് വളരെ വലുതും, കൃത്യമായി ആകൃതിയില്ലാത്തതും ആയിരിക്കും. ക്രമേണ കാഴ്ച പരിപൂര്ണ്ണമായി നഷ്ടപ്പെടുന്ന ക്രൂരമായ അസുഖം.
ഒടുവില് മകള്ക്കായി പോരാടാന് കെരീന തീരുമാനിച്ചു. അടിയന്തരമായി ശസ്ത്രക്രിയ നടത്തിയതോടെ കാഴ്ച നഷ്ടപ്പെടാതെ തന്റെ മാലാഖയെ ആ അമ്മയ്ക്ക് രക്ഷിക്കാനായി. എന്നാല് ഇപ്പോഴും കാഴ്ച നഷ്ടപ്പെടുമോ എന്ന സംശയം ഏവരുടെയും ഉള്ളിലുണ്ട്. വെളിച്ചത്തെ നേരിടാനുള്ള കഴിവ് മെഹലാനിക്ക് കുറവാണ് അതിനാല് സണ്ഗ്ലാസ് വെച്ചാണ് പുറത്തിറങ്ങുന്നത്. വീടിന് മുറ്റത്തിറങ്ങണമെങ്കില് പോലും ഗ്ലാസുകള് വേണം. ഏവരും അവളുടെ കണ്ണുകളെ കുറിച്ച് പറയുമ്പോള് തനിക്ക് പലപ്പോഴും വാക്കുകള് നഷ്ടപ്പെടുകയാണെന്ന് കെരീന പറയുന്നു.
'ആളുകള്ക്ക് അവളെപ്പറ്റി ഇതേ പറയാനുള്ളൂ. എന്ത് സുന്ദരിയാണ്, എന്ത് ഭംഗിയുള്ള കണ്ണുകളാണ്.. അങ്ങനെയൊക്കെ... അത് കേള്ക്കുമ്പോള് എനിക്ക് എന്ത് പറയണമെന്ന് അറിയാതെയാകും. അവളുടെ കണ്ണുകള്ക്ക് പിന്നിലെ രഹസ്യം വെളിപ്പെടുത്തണേയെന്ന് ഒന്ന് സംശയിക്കും. പിന്നെ വേണ്ടെന്ന് വയ്ക്കും. ആരെങ്കിലും കണ്ണുകളെ പുകഴ്ത്തി സംസാരിച്ചാല്, ചിരിച്ച് അവരോട് നന്ദി പറയണമെന്ന് ഞാനവളെ പഠിപ്പിക്കുന്നുണ്ട്'- കെരീന പറഞ്ഞു.
തന്റെ സോഷ്യല് മീഡിയ അക്കൗണ്ടുകളിലൂടെ കെരീന പങ്കുവെച്ച ചിത്രങ്ങളിലൂടെയാണ് മെഹലാനി ശ്രദ്ധിക്കപ്പെടുന്നത്. കുട്ടിയുടെ ചിത്രങ്ങള് വൈറലായതോടെയാണ് അവളുടെ രോഗത്തെ പറ്റിയും കെരീന വെളിപ്പെടുത്തുന്നത്. രോഗത്തെ കുറിച്ച് കൂടുതല് അറിയാനായി സോഷ്യല് മീഡിയയില് ഒരു കമ്യൂണിറ്റിയും കെരീന തുടങ്ങിയിട്ടുണ്ട്.
