കൊച്ചി: ഐ.എസ്.എല് അഞ്ചാം സീസണില് ഉദ്ഘാടന മത്സരത്തില് കൊല്ക്കത്തയെ അവരുടെ തട്ടകത്തില് തകര്ത്ത് കലിപ്പടക്കി കേരള ബ്ലാസ്റ്റേഴ്സ്. എതിരില്ലാത്ത രണ്ട് ഗോളുകള്ക്കായിരുന്നു മഞ്ഞപ്പടയുടെ ജയം. ബ്ലാസ്റ്റേഴ്സിന്റെ മുന് പരിശീലകന് കോപ്പലാശാന്റെ ഇപ്പോഴത്തെ ടീമിനെതിരെ ത്രസിപ്പിക്കുന്ന ജയം നേടിയ ബ്ലാസ്റ്റേഴ്സിനെ അഭിനന്ദിച്ച് ബ്രാന്ഡ് അംബാസിഡര് മോഹന്ലാല് ഫേസ്ബുക്കിലെത്തി.
ഇതാദ്യമായാണ് അത്ലറ്റിക്കൊ ഡി കൊല്ക്കത്തയെ കേരള ബ്ലാസ്റ്റേഴ്സ് തോല്പ്പിക്കുന്നത്. 76-ാം മിനിറ്റില് സ്റ്റൊജാനോവിച്ചിന്റെ ഗോളെന്നുറച്ച ഷോട്ട് പ്രതിരോധത്തില് തട്ടി വഴിതിരിഞ്ഞ് എത്തിയപ്പോള് പാപ്ലാറ്റ്നിച്ച് ഹെഡ് ചെയ്ത് വലയ്ക്കുള്ളിലാക്കി.
86-ാം മിനുറ്റില് സെര്ബിയന് താരം സ്റ്റൊജാനോവിച്ച് തകര്പ്പന് ഗോളിലൂടെ ബ്ലാസ്റ്റേഴ്സ് ലീഡ് ഉയര്ത്തി. പ്രതിരോധ താരങ്ങളെ വെട്ടിച്ച് സ്റ്റൊജാനോ എടികെയുടെ ഗോള് ബാറിന്റെ വലതുമൂലയിലേക്ക് പന്ത് തൊടുക്കുകയായിരുന്നു.
ഒരു ഗോളെങ്കിലും തിരിച്ചടിക്കാന് കൊല്ക്കത്ത താരങ്ങള് കിണഞ്ഞ് ശ്രമിച്ചെങ്കിലും മഞ്ഞപ്പടയുടെ പ്രതിരോധനിര അനുവദിച്ചില്ല.
