കൊച്ചി: ബിജെപി ദേശീയ അധ്യക്ഷന് അമിത് ഷായുടെ കണ്ണൂര് സന്ദര്ശനമാണ് ഇപ്പോള് സോഷ്യല് മീഡിയകളിലെ വലിയ ചര്ച്ചാ വിഷയങ്ങളില് ഒന്ന്. ഇടത് അനുകൂലികളും സംഘ്പരിവാര് പ്രവര്ത്തകരും സംഭവത്തില് പരസ്പരം ആക്രമിക്കുകയും ട്രോളുകയും ചെയ്യുകയാണ്. ഇതിനിടെ പുലിവാല് പിടിച്ചിരിക്കുകയാണ് കണ്ണൂരിലെ ജില്ലാ പഞ്ചായത്ത് വൈസ് പ്രസിഡന്റ് കൂടിയായ ഡിവൈഎഫ്ഐ വനിതാ നേതാവ് പി.പി.ദിവ്യ.
മുഖ്യമന്ത്രി പിണറായി വിജയനെ ഭോപ്പാലില് സംഘപരിവാര് തടഞ്ഞപ്പോള് എഴുതിയ കുറിപ്പാണ് ദിവ്യയ്ക്ക് ഇപ്പോള് തിരിച്ചടിയായിരിക്കുന്നത്. അമിത് ഷായ്ക്ക് കേരളത്തിലെത്താതെ വിഡിയോ കോണ്ഫറന്സ് നടത്തേണ്ടിവരുമെന്നാണ് അന്ന് ദിവ്യ ഫെയ്സ്ബുക്കില് കുറിച്ചത്. ഇതിനിടെ അമിത് ഷാ കണ്ണൂരില് എത്തിയതോടെ സംഘപരിവാര് ആക്രമണം പുറത്തെടുത്തു. വിമാനത്താവളത്തിലെത്തുന്ന അമിത് ഷായെ തടയുന്നില്ലെയെന്നാണ് കൂടുതല് ആളുകള് ചോദിച്ചത്.
തടയാന് പറ്റിയില്ലെങ്കിലും ഒരു കരിംകൊടിയെങ്കിലും കാണിക്കാമായിരുന്നു എന്നും കമന്റുകളുണ്ട്. ഇതുവരെ കമന്റുകള്ക്കും ട്രോളുകള്ക്കും മറുപടി പറയാനോ പോസ്റ്റ് പിന്വലിക്കാനോ ദിവ്യ തയ്യാറായിട്ടില്ല. തുടര്ന്ന് അതിനും ട്രോളുകള് എത്തി. 'എണീക്ക്... ദിവ്യാ ച്യാച്ചി എണീക്ക്.. അമിത് ഷാ ദോ പിണറായില്..പൂയ്.. എണീക്ക്...' എന്നാണ് ഒരു കമന്റ്. പോസ്റ്റ് മുക്കാന് സമയം കിട്ടിയില്ലേയെന്നും ചേദിക്കുന്നവരുമുണ്ട്.
ഭോപ്പാലില് മുഖ്യമന്ത്രിയെ തടഞ്ഞു... ഇപ്പോള് മംഗ്ളൂരിലും വിലക്ക്... ഈ പോക്കാണെങ്കില് അമിത് ഷായ്ക്ക് കേരളത്തിലെ സംഗിക്കളോട് ഇനി വീഡിയോ കോണ്ഫെറന്സ് മാത്രം നടത്തേണ്ടി വരും. എന്നായിരുന്നു ദിവ്യയുടെ പോസ്റ്റ്.
