കാന്തിക വികിരണത്തെക്കുറിച്ച് തെറ്റായ സന്ദേശം നല്കുന്നെന്ന ആരോപണത്തിനിടയിലും ആരാധകരുടെ ആകാംഷയ്ക്ക് വിരാമമിട്ട് ആദ്യ പ്രദര്ശനം നടത്തിക്കഴിഞ്ഞ ശങ്കറിന്റെ 2.0 ഇന്ത്യന് സിനിമയില് ഇന്നുവരെ ഇറങ്ങിയിട്ടുള്ളവയില് ഏറ്റവും വലിയ സിനിമ. ഹോളിവുഡ് സിനിമകളോട് കിടപിടിക്കുന്ന സാങ്കേതികത്തികവില് രീതിയില് ചെയ്തിരിക്കുന്ന ബ്രഹ്മാണ്ഡചിത്രം സ്ക്രീന് മുന്നിലും പിന്നിലുമായി ഒട്ടേറെ പ്രത്യേകതകളോടെയാണ് പുറത്തുവരുന്നത്.
ഇന്ത്യന് സിനിമാചരിത്രത്തിലെ ഏറ്റവും ചെലവേറിയ ചിത്രങ്ങളില് ഒന്നായ എന്തിരന് 2.0 യുടെ മുടക്കുമുതല് 500 കോടിയാണ്. ഒരു പാട്ടുരംഗത്തിന് മാത്രമായി 20 കോടി ചെലവഴിച്ച സിനിമയുടെ മുടക്കുമുതലിന്റെ ഒരു വലിയ ഭാഗം സാറ്റലൈറ്റ് റൈറ്റ്, അഡ്വാന്സ് ബുക്കിംഗ്, ഡിജിറ്റല് റൈറ്റ് എന്നിവയിലൂടെ തിരിച്ചുകിട്ടിയിട്ടുണ്ട്. തെലുങ്ക്, തമിഴ്, ഹിന്ദി ഭാഷകളില് പുറത്തുവരുന്ന സിനിമയ്ക്ക് രാജ്യത്തെ മൂന്ന് ഭാഷകളിലുമായി 10 ലക്ഷം ടിക്കറ്റുകളാണ് ബുക്കിംഗ് പോര്ട്ടലുകളിലുടെ ആള്ക്കാര് നേടിയെടുത്തത്. ബ്രഹ്മാണ്ഡസിനിമയുടെ റിലീസിംഗും അതുപോലെയാണ്.
അമേരിക്കയില് വമ്പന് റിലീസിംഗ് നടത്തിയിരിക്കുന്ന സിനിമ വിദേശത്ത് 800 തീയറ്ററുകളിലാണ് റിലീസ് ചെയ്തിരിക്കുന്നത്. തമിഴില് 307 തീയറ്ററുകളിലും തെലുങ്കില് 270 കേന്ദ്രങ്ങളിലും ഹിന്ദിയില് 223 ഇടങ്ങളിലുമാണ് റിലീസിംഗ്. രജനീകാന്തിന് പുറമേ ആമി ജാക്സണും അക്ഷയ് കുമാറും പ്രധാന വേഷങ്ങളില് വരുന്ന സിനിമ പക്ഷേ ശങ്കര് ചെയ്ത ഏറ്റവും ദൈര്ഘ്യം കുറഞ്ഞ സിനിമയാണ്. 148 മിനിറ്റുകളാണ് സിനിമയുടെ സമയം. 2 ഡിയില് ഒരുങ്ങിയ യന്തിരന് പോസ്റ്റ് പ്രൊഡക്ഷനിലായിരുന്നു 3 ഡി പതിപ്പാക്കിയത്. എന്നാല് '2.0' പൂര്ണ്ണമായും ത്രീ ഡി യിലായിരുന്നു ഷൂട്ടിംഗ്. സിനിമയുടെ ശബ്ദ സാങ്കേതികതയിലും പുതുമയുണ്ട്.
ഇന്ത്യന് തീയറ്ററുകളില് അധികമില്ലാത്ത സീറ്റുകള്ക്ക് കീഴില് സ്പീക്കര് ഇന്സ്റ്റാള് ചെയ്തുകൊണ്ടുള്ള 4ഡി എസ്ആര്എല്ലിലാണ് സിനിമയുടെ ശബ്ദസംവിധാനം. ഈ ശബ്ദവിന്യാസത്തില് ചെയ്ത ആദ്യ ഇന്ത്യന് സിനിമകൂടിയാണ് ഇത്. 2010 ല് പുറത്തു വന്ന സൂപ്പര്ഹിറ്റ് എന്തിരന്/റോബോ യുടെ രണ്ടാം ഭാഗമായി വരുന്ന സിനിമയില് രജനീകാന്ത് ഡോ. വസീഗരനെയും ചിട്ടി റോബോ യെയും അവതരിപ്പിക്കുമ്പോള് ഡോ. റിച്ചാര്ഡ് എന്ന കഥാപാത്രത്തെയും ക്രോ മാനെയുമാണ് അവതരിപ്പിക്കുന്നത്. നിലാ എന്ന റോബോട്ട് സ്ത്രീ കഥാപാത്രമാണ് ആമി യുടേത്.
എന്തിരന്റെ രണ്ടാം ഭാഗം എന്ന നിലയില് ആദ്യ സിനിമയിലെ ഏതാനും ഭാഗങ്ങളും ചിട്ടി റോബോയും മാത്രമാണ് ആദ്യ ഭാഗത്ത് നിന്നുള്ളത്. ആദ്യ സിനിമയിലെ നായിക ഐശ്വര്യാറായി രണ്ടാം സിനിമയില്ല. എആര് റഹ്മാന് സംഗീത സംവിധാനം നിര്വ്വഹിക്കുന്ന സിനിമയുടെ ക്യാമറ ചെയ്തിരിക്കുന്നത് ബില്ല യും സൂപ്പര്ഡീലക്സുമെല്ലാം നിര്വ്വഹിച്ച നീരവ് ഷാ യാണ്.
