ചെന്നൈ: തമിഴ്നാട് മുന് മുഖ്യമന്ത്രി ജെ. ജയലളിതയുടെ മരണത്തില് തമിഴ്നാട് ആരോഗ്യ സെക്രട്ടറിക്കും അപ്പോളോ ആശുപത്രിക്കും എതിരെ ആരോപണവുമായി അന്വേഷണ കമ്മീഷന്. തമിഴ്നാട് ആരോഗ്യ വകുപ്പ് സെക്രട്ടറി ജെ. രാധാകൃഷ്ണന് അപ്പോളോ ആശുപത്രി അധികൃതരുമായി ഗൂഢാലോചന നടത്തിയെന്നും തല്ഫലമായി ജയലളിതയ്ക്ക് മോശം ചികിത്സയാണ് നല്കിയതെന്നും അന്വേഷണ കമ്മീഷന് ആരോപിക്കുന്നു.
ജസ്റ്റിസ് എ. മുരുകസ്വാമി കമ്മീഷനാണ് ജയലളിതയുടെ മരണത്തിലെ ദുരൂഹത അന്വേഷിക്കുന്നത്. ജയലളിത ചികിത്സയിലിരിക്കെ തമിഴ്നാട് ചീഫ് സെക്രട്ടറിയായിരുന്ന പി. രാമമോഹന റാവുവിനെതിരെയും അന്വേഷണ കമ്മീഷന് ആരോപണം ഉന്നയിക്കുന്നുണ്ട്. ജയലളിതയുടെ ആശുപത്രി വാസത്തെക്കുറിച്ച് ചീഫ് സെക്രട്ടറി പരസ്പരവിരുദ്ധമായ മൊഴികള് നല്കിയെന്നാണ് ആരോപണം. ജയലളിതയെ വിദേശത്തേക്ക് ചികിത്സയ്ക്കായി കൊണ്ടുപോകുന്നതിനെ ചീഫ് സെക്രട്ടറി എതിര് നിന്നുവെന്നും അന്വേഷണ കമ്മീഷന് ആരോപിക്കുന്നു.
അതേസമയം ആരോപണങ്ങള് അടിസ്ഥാനരഹിതമാണെന്ന് ആരോഗ്യ വകുപ്പ് സെക്രട്ടറി രാധാകൃഷ്ണന് പറഞ്ഞു. ആരോപണങ്ങള് നിഷേധിക്കുന്നതായി അപ്പോളോ ആശുപത്രി അധികൃതരും വ്യക്തമാക്കി. ആരോപണങ്ങള് അടിസ്ഥാനരഹിതവും അപകീര്ത്തികരവുമാണെന്നും അപ്പോളോ ആശുപത്രി അധികൃതര് വ്യക്തമാക്കി.
