ന്യൂഡല്ഹി: ശബരിമലയിലെ യുവതി പ്രവേശത്തെ പിന്തുണച്ച് ബിജെപി എംപിയും ഓള് ഇന്ത്യാ പട്ടിക ജാതി പട്ടിക വര്ഗ കോണ്ഫെഡറേഷന് ദേശീയ ചെയര്മാനുമായ ഉദിത് രാജ്. സ്ത്രീക്ക് അശുദ്ധി കല്പ്പിക്കുന്ന ആചാരങ്ങള് ലംഘിക്കപ്പെടണം. ഭരണഘടനയുടെ കണ്ണില് പുരുഷനും സ്ത്രീയും തുല്യരാണെന്നും നോര്ത്ത് വെസ്റ്റ് ഡല്ഹി മണ്ഡലത്തില് നിന്നുളള ബിജെപി എംപി വ്യക്തമാക്കി.
സ്ത്രീയില് നിന്നാണ് പുരുഷനും ജനിക്കുന്നത് എന്നിരിക്കെ എങ്ങനെയാണ് സ്ത്രീകള് മാത്രം അശുദ്ധരാകുന്നതെന്നും എംപി ചോദ്യമുയര്ത്തി. പ്രധാനമന്ത്രിയുടെ നിലപാടിനോടും യോജിക്കുന്നില്ലെന്നും ഉദിത് രാജ് വ്യക്തമാക്കി. യുവതി പ്രവേശനത്തിന് ബിജെപി എതിരാണെന്നിരിക്കെ എംപിയുടെ നിലപാട് വാര്ത്തയാകുകയാണ്.
സുപ്രീംകോടതി വിധി വന്ന് 97 ദിവസം പിന്നിടുമ്പോഴാണ് യുവതി പ്രവേശം സാധ്യമായത്. കഴിഞ്ഞ 24 ന് പോലീസ് സുരക്ഷയില് ദര്ശനത്തിനു ശ്രമിച്ച് എതിര്പ്പുമൂലം പിന്മാറേണ്ടി വന്നവരാണ് കനക ദുര്ഗയും ബിന്ദുവും. ദര്ശനത്തിനെത്തിയ അന്ന് വന് പ്രതിഷേധം ഉയര്ന്നതിനെ തുടര്ന്ന് ഇത്തവണ അതീവ രഹസ്യമായാണ് ഇരുവരും എത്തിയത്.
