സെവിയ്യെ: ക്രിസ്ത്യാനോ റൊണാള്ഡോയോട് ഹാട്രിക്കടിച്ച് മത്സരിച്ചു കൊണ്ടിരിക്കുന്ന ലിയോണേല് മെസ്സിയുടെ മികവില് ബാഴ്സിലോണയ്ക്ക് സ്പാനിഷ് ലാ ലിഗയില് തകര്പ്പന്ജയം. റീയല് ബെറ്റിസിനെ 4-1 ന് ബാഴ്സ കീഴടക്കിയപ്പോള് മെസ്സിയുടെ ബൂട്ടില് നിന്നും പിറന്നത് എണ്ണം പറഞ്ഞ മൂന്ന് ഗോളുകള്. ഈ വിജയത്തോടെ പട്ടികയില് ഒന്നാമതുള്ള ബാഴ്സ രണ്ടാം സ്ഥാനക്കാരായ അത്ലറ്റിക്കോ മാഡ്രിഡുമായുള്ള അകലം പത്തു പോയിന്റാക്കി ഉയര്ത്തി. മത്സരത്തിലെ ഒരു ഗോള് ലൂയിസ് സുവാരസ് നേടി. ബെറ്റിസിന്റെ ആശ്വാസഗോള് ലോറന് മോറോന്റെ വകയായിരുന്നു.
മീശയും താടിയും വെട്ടിയൊതുക്കി പുതിയ ലുക്കില് എത്തിയ മെസ്സി കളിയുടെ പതിനെട്ടാം മിനിറ്റില് തന്നെ ഗോള് നേടി. സുന്ദരന് ഫ്രീകിക്ക് വളഞ്ഞു പുളഞ്ഞ് നെറ്റിന്റെ കോര്ണറില്. ആദ്യ പകുതി പൂര്ത്തിയായതും ബാഴ്സയുടെ ഗോളോടെയായിരുന്നു. സുവാരസിന്റെ ബാക്ക് ഹീല് പാസ് മെസി വലയിലാക്കി. രണ്ടാം പകുതിയില് എത്തിയ ബാഴ്സ വീണ്ടും അനേകം അവസരം തുറന്നെടുത്തു. ഒട്ടേറെ അവസരങ്ങള് തുലയ്ക്കുന്നതിനിടയില് 63 ാം മിനിറ്റില് സുവാരസ് തന്റെ വക ഗോള് നേടി. നാലു ബെറ്റിസ് താരങ്ങളെ വീഴ്ത്തിയുള്ള ഓട്ടം പന്ത് വലയില് എത്തിച്ച് സുവാരസ് ഫിനിഷ് ചെയ്തു.
കളി തീരാന് എട്ടു മിനിറ്റ് ബാക്കി നില്ക്കുമ്പോഴായിരുന്നു ബെറ്റിസ് ഒരു ഗോള് മടക്കിയത്. ലോറന് മോറനായിരുന്നു സ്കോറര്. തൊട്ടുപിന്നാലെ മെസ്സി ഹാട്രിക് പൂര്ത്തിയാക്കി. മെസ്സിയുടെ ഫസ്റ്റ്ടൈം ലോബ് ബാറില് തട്ടി വലയില് കയറിയപ്പോള് ആ ഗോളിന്റെ പ്രതിഭാ സ്പര്ശത്തില് ബെറ്റിസ് ആരാധകര്ക്ക് പോലും കയ്യടിക്കാതിരിക്കാന് കഴിഞ്ഞില്ല. ഈ വിജയത്തോടെ നവംബറില് ബെറ്റിസില് നിന്നും ഏറ്റ 4-3 ന്റെ പരാജയത്തിന് മധുരമായി പകരം വീട്ടാനും ബാഴ്സയ്ക്കായി. 28 മത്സരങ്ങളില് 66 പോയിന്റുമായി ഒന്നാമതുള്ള ബാഴ്സിലോണ അത്ലറ്റിക്കോ യെക്കാള് പത്തു പോയിന്റ് മുകളിലയാണ്. അത്ലറ്റിക്കോയ്ക്ക് 56 പോയിന്റും റയല് മാഡ്രിഡിന് 54 പോയിന്റുമാണ് പട്ടികയില്.
ബുധനാഴ്ച ഒളിമ്പിക് ലിയോണിനെതിരേ രണ്ടു ഗോള് നേടുകയും രണ്ടു ഗോളിന് വഴിമരുന്നിടുകയും ചെയ്ത മെസ്സി അവിടെ നിര്ത്തിയിടത്ത് നിന്നുമാണ് തുടങ്ങിയത്. ഹാട്രിക്കോടെ ഈ സീസണില് എല്ലാ മത്സരങ്ങളില് നിന്നുമാണ് മെസ്സിയുടെ ഗോള് നേട്ടം 39 ആയി. ലാലിഗയില് ഈ സീസണിലെ 26 കളിയില് നിന്നും 29 ഗോള് നേടാനും താരത്തിനായി. ബാഴ്സിലോണയ്ക്കായി 674 മത്സരങ്ങളെന്ന ഇനിയേസ്റ്റയുടെ റെക്കോഡിന് ഒപ്പമെത്താനും മെസ്സിക്കായി. ക്ലബ്ബിന്റെ ജഴ്സിയില് വിജയം 477 ആക്കി മാറ്റിയ മെസ്സി കൂടുതല് വിജയിച്ചതിന്റെ റെക്കോഡില് മുന് താരം സാവിയേയും മറികടന്നു.
