രണ്ടാമൂഴം സിനിമയായാല് ഭീമനാകുമെന്ന് താന് ഒരിടത്തും പറഞ്ഞിട്ടില്ലെന്ന് സൂപ്പര്താരം മോഹന്ലാല്. എം ടി വാസുദേവന് നായരുടെ തിരക്കഥ സിനിമയാകുമോ എന്ന് തനിക്കും ആശങ്കയുണ്ടെന്നും താരം പറഞ്ഞു. ബി ആര് ഷെട്ടിയുടെ നിര്മ്മാണത്തില് ശ്രീകുമാരന് നായരാണ് രണ്ടാമൂഴം സിനിമയാക്കാന് മുമ്പോട്ടു വന്നത്. സിനിമയുമായി ബന്ധപ്പെട്ട ഇപ്പോഴത്തെ അവസ്ഥ കേസിലും നിയമനടപടികളിലും കുടുങ്ങിക്കിടക്കുകയാണ്.
സിനിമയില് ഭീമനായി അഭിനയിക്കുമെന്ന് താന് ഒരിടത്തും പറഞ്ഞിട്ടില്ല. ഇത്തരം വാര്ത്തകള് താനും കണ്ടിരുന്നു. എന്നാല് അങ്ങനെ ആരോടും പറഞ്ഞിട്ടില്ല. ചിത്രം യാഥാര്ത്ഥ്യമാവുമോ എന്ന കാര്യത്തില് എല്ലാവരെയും പോലെ തനിക്കും ആശങ്കയുണ്ടെന്നും പറഞ്ഞു. മോഹന്ലാലിനെ നായകനാക്കി ശ്രീകുമാരന് മേനോന് സംവിധാനം ചെയ്ത ഒടിയന് മുമ്പേ പ്രഖ്യാപിച്ചിരുന്ന സിനിമയായിരുന്നു ഇത്. എന്നാല് തിരക്കഥ നല്കി നാല് വര്ഷം കഴിഞ്ഞിട്ടും യാതൊരു പുരോഗതിയും ഉണ്ടാവാത്തതിനെ തുടര്ന്ന് സിനിമ വിവാദത്തിലായിരുന്നു.
തിരക്കഥ തിരികെ ലഭിക്കണമെന്ന് ആവശ്യപ്പെട്ട് എം ടി കോടതിയെ സമീപിക്കുകയായിരുന്നു. ഇതേ തുടര്ന്ന് തിരക്കഥ ഉപയോഗിക്കുന്നതില് കോഴിക്കോട് അഡീഷണല് മുന്സിഫ് കോടതി നിരോധനം ഏര്പ്പെടുത്തിയിരുന്നു. കേസില് മധ്യസ്ഥനെ അനുവദിക്കണമെന്ന ശ്രീകുമാര് മേനോന്റെ ആവശ്യം കോടതി തള്ളുകയും ചെയ്തിരിക്കുകയാണ്. 1000 കോടി ബഡ്ജറ്റില് വമ്പന് സിനിമയായി പുറത്തുവരുമെന്നായിരുന്നു പ്രഖ്യാപനം വന്നത്.
