തുറവൂര് : സ്ത്രീകളുടെ ചിത്രമെടുത്ത് മോര്ഫ് ചെയ്യുകയും അശ്ലീല ചുവയോടെ നവമാധ്യമങ്ങളില് പങ്കുവയ്ക്കുകയും ചെയ്ത സംഭവത്തില് പ്രതികള് പിടിയില്. കളരിക്കല് ഭാഗത്ത് താമസിക്കുന്ന പ്രണവ് (22), ശ്രീദേവ് (19), ആകാശ് (19), ദീപില് (19), അമല്ദേവ് (18) എന്നിവരാണ് പിടിയിലായത്. തുറവൂര് പഞ്ചായത്ത് 13-ാം വാര്ഡ് കളരിയ്ക്കല് ഭാഗത്തെ മുപ്പതോളം വരുന്ന സ്ത്രീകള് നല്കിയ പരാതിയുടെ അടിസ്ഥാനത്തിലായിരുന്നു പ്രതികളുടെ അറസ്റ്റ്.
പ്രതികളില് ഒരാളുടെ അമ്മയുടെ ചിത്രം ഇത്തരത്തില് എടുത്ത് നവമാധ്യമങ്ങളില് പങ്കുവച്ചതോടെ പരസ്പരം ഉണ്ടായ ഏറ്റുമുട്ടലാണ് സംഭവം പുറത്തറിയാന് കാരണം. കളരിക്കല് ഭാഗത്തെ നിരവധി സ്ത്രീകളുടെയും പ്രായപൂര്ത്തിയാകാത്ത പെണ്കുട്ടികളുടെയും ഫോട്ടോ, ഇവര് നടന്നു പോകുന്പോള് ഇവര് അറിയാതെ വഴിയില്നിന്ന് മൊബൈല് ഫോണില് എടുത്ത് അശ്ലീലമായി ചിത്രീകരിച്ച്, മോശമായ രീതിയില് ശരീരഭാഗങ്ങള് വര്ണിച്ച് പരസ്പരം കൈമാറിയ സംഭവത്തില് ആണ് സ്ത്രീകള് ജില്ലാ പോലീസ് മേധാവിക്ക് പരാതി നല്കിയത്.
ദിവസങ്ങളോളം പരാതിയില് നടപടി സ്വീകരിക്കാതെ പോലീസ് സംഭവം ഒതുക്കിത്തീര്ക്കുവാനാണ് ശ്രമിച്ചത്. പരാതിക്കാര് പറഞ്ഞത് അനുസരിച്ച് മാധ്യമങ്ങളില് നിന്ന് ബന്ധപ്പെട്ടിട്ടുപോലും ഇത്തരത്തില് ഒരു സംഭവം ഇല്ലെന്നാണ് കുത്തിയതോട് പോലീസ് ആദ്യം പറഞ്ഞത്. തുടര്ന്ന് പരാതിക്കാരുമായി ബന്ധപ്പെട്ട് മാധ്യമവാര്ത്തകള് വന്നതോടെയാണ് കേസെടുത്ത് പോലീസ് അന്വേഷണം ആരംഭിച്ചത്. മൊബൈല് ഫോണ് പോലീസ് പിടിച്ചെടുത്ത് പരിശോധിച്ചതില് പരാതി സംബന്ധിച്ച് തെളിവുകള് ലഭിച്ചിട്ടുണ്ട്. കൂടുതല് തെളിവുകള് ശേഖരിക്കുന്നതിനായി ശാസ്ത്രീയ പരിശോധനയ്ക്ക് മൊബൈലുകള് അയച്ചിരിക്കുകയാണെന്ന് കുത്തിയതോട് പോലീസ് പറഞ്ഞു. സംഭവത്തില് മുഴുവന് തെളിവുകളും ശേഖരിച്ച ശേഷമേ പ്രതികളെ അറസ്റ്റ് ചെയ്യുകയുള്ളു എന്നതായിരുന്നു പോലീസ് നിലപാട്.
