ശബരിമല മുന് തന്ത്രി കണ്ഠരര് മോഹനരര്ക്കെതിരെ ഗുരുതര ആരോപണങ്ങളുമായി അമ്മ ദേവകി അന്തര്ജനം. മോഹനരും ഭാര്യയും ചേര്ന്ന് തന്റെ പണവും കാറും തട്ടിയെടുത്തുവെന്ന് ചൂണ്ടിക്കാട്ടിയാണ് വേദകി അന്തര്ജനം പരാതി നല്കിയിരിക്കുന്നത്. ഇതുമായി ബന്ധപ്പെട്ട് ഹൈക്കോടതിയില് നല്കിയ ഹര്ജി മദ്ധ്യസ്ഥ ചര്ച്ചകള്ക്കായി മാറ്റിവെച്ചിരിക്കുകയാണ്.
മഹേശ്വരര് അന്തരിച്ചതിനു പിന്നാലെ ബാങ്ക് അക്കൗണ്ടില് ഉണ്ടായിരുന്ന പണം മോഹനരര് തട്ടിയെടുക്കുകയും തന്റെ പേരിലുള്ള ഇന്നോവ കാര് മറ്റൊരാള്ക്ക് മറിച്ചു വിറ്റെന്നുമാണ് ഹൈക്കോടതിയില് നല്കിയിരിക്കുന്ന ഹര്ജിയില് വ്യക്തമാക്കിയിരിക്കുന്നത്.
ഫെഡറല് ബാങ്കിന്റെ ചെങ്ങന്നൂര് ശാഖയിലെ അകൗണ്ടില് നിക്ഷേപിച്ചിരുന്ന 41.63 ലക്ഷം രൂപ മോഹനരരും ഭാര്യയും ചേര്ന്ന് ധനലക്ഷ്മി ബാങ്കിലേക്ക് മാറ്റിയിട്ടുണ്ട്. 83 വയസുള്ള രോഗിയായതിനാല് ബാങ്ക് ഇടപാടുകള് നടത്താന് മൂത്തമകനായ മോഹനരരെ ചുമതലപ്പെടുത്തിയിരുന്നുവെന്നും ഇതു ദുരുപയോഗം ചെയ്താണ് പണം തട്ടിയെടുത്തതെന്നുമാണ് ഹര്ജിക്കാരി പറയുന്നത്. തന്റെ മൊബൈല് ഫോണുകളും മോഹനരര് പിടിച്ചു വാങ്ങുകയാണുണ്ടായതെന്നും ദേവകി അന്തര്ജനം പറയുന്നു.തന്റെ ഉടമസ്ഥതയിലുള്ള സ്ഥലത്ത് ഭര്ത്താവിന്റെ സംസ്കാരം നടത്താന് മോഹനരരും ഭാര്യയും അനുവദിച്ചിരുന്നില്ലെന്നും പരാതിയില് ചൂണ്ടിക്കാട്ടുന്നു.
ഇക്കാര്യങ്ങള് ചൂണ്ടിക്കാട്ടി തിരുവനന്തപുരത്ത് മെയിന്റനന്സ് ട്രൈബൂണലില് പരാതി നല്കിയിരുന്നു. എന്നാല് വിധി പറയാനായി പലപ്പോഴായി മാറ്റിവെച്ചിരിക്കുകയാണ്. പ്രായവും രോഖഗാവസ്ഥയും പരിഗണിച്ച് അടിയന്തിര സഹായം വേണമെന്ന് ഉപഹര്ജിയും നല്കിയിട്ടുണ്ട്. നിലവില് മകളുടെ കൂടെ തിരുവനന്തപുരത്താണ് ദേവകി അന്തര്ജനം കഴിയുന്നത്.
