പുറ്റിങ്ങല് വെടിക്കെട്ട് അപകടത്തില് മരിച്ചവരെ അപമാനിച്ച് ഫേസ്ബുക്കില് പോസ്റ്റിട്ട ഇസാഫ് ബാങ്കിലെ ഉദ്യോഗസ്ഥന് കിട്ടിയത് മുട്ടന് പണി. ഇയാളെ താത്കാലികമായി പിരിച്ചുവിടുന്നതായി ബാങ്ക് വ്യക്തമാക്കി. കുന്നംകുളം സ്വദേശിയായ ശൈലേഷ് കെ എസ് എന്നയാളെയാണ് സസ്പെന്ഡ് ചെയ്തതെന്ന് ബാങ്ക് അറിയിച്ചു. 'പുറ്റിങ്ങലില് കുറേ പട്ടികള് ചത്തു, പിന്നെ പൂരമൊക്കെ കുളമായി' എന്നായിരുന്നു ഇയാളുടെ പോസ്റ്റ്. ശൈലേഷ് ഇസാഫിന്റെ സ്വാശ്രയ മള്ട്ടി സ്റ്റേറ്റ് ആഗ്രോ കോപറേറ്റീവ് സൊസൈറ്റിയിലെ ജീവനക്കാരനാണ്.
ഇയാളെ താല്ക്കാലികമായി പുറത്താക്കിയെന്ന വിവരം ഇസാഫിന്റെ പേജിലൂടെയാണ് ബാങ്ക് പങ്കുവെച്ചിരിക്കുന്നത്. മതവികാരം വ്രണപ്പെടുത്തുന്ന രീതിയില് ശൈലേഷ് ഇട്ട പോസ്റ്റിന് ക്ഷമ പറയുന്നുവെന്നും അന്വേഷണാത്മകമായി ഇയാളെ പിരിച്ചുവിട്ടിരിക്കുന്നുവെന്നുമാണ് ബാങ്കിന്റെ കുറിപ്പ്. ശൈലേഷ് കുറിപ്പ് ഡിലീറ്റ് ചെയ്ത് മാപ്പ് പറഞ്ഞെങ്കിലും ഇതിന്റെ സ്ക്രീന്ഷോട്ട് വ്യാപകമായി പ്രചരിക്കുന്നുണ്ട്.
