ന്യൂഡല്ഹി: അരുണാചല് പ്രദേശില് തകര്ന്നുവീണ വ്യോമസേനാ വിമാനത്തില് ഉണ്ടായിരുന്നവരുടെ മൃതദേഹങ്ങള് വീണ്ടെടുക്കാനുള്ള ശ്രമം തുടരുന്നു. ഇന്ത്യന് വ്യോമസേന പത്രക്കുറിപ്പില് അറിയിച്ചതാണ് ഇക്കാര്യം. കോക്പിറ്റില് നടന്ന സംഭാഷണങ്ങള് റെക്കോര്ഡ് ചെയ്ത ബ്ലാക്ക് ബോക്സ് കണ്ടെത്തിയതായും വ്യോമസേന അറിയിച്ചു.
വിമാനം തകര്ന്നുവീണ സ്ഥലത്ത് ചിതറിയ നിലയിലാണ് മൃതദേഹങ്ങള്. ദുര്ഘടമായ ഭൂപ്രകൃതിയും മോശം കാലാവസ്ഥയുമാണ് മൃതദേഹങ്ങള് വീണ്ടെടുക്കുന്നതിനുള്ള പ്രധാന തടസം. വ്യോമ കരസേനകളുടെ സംയുക്ത സംഘമാണ് മൃതദേഹങ്ങള് വീണ്ടെടുക്കാന് ശ്രമിക്കുന്നത്.
ഈ മാസം മൂന്നിന് തകര്ന്നുവീണ വിമാനത്തിന്റെ അവശിഷ്ടങ്ങള് ചൊവ്വാഴ്ചയാണ് കണ്ടെത്തിയത്. മൂന്ന് മലയാളികളടക്കം വിമാനത്തില് ഉണ്ടായിരുന്ന 13 പേരും മരിച്ചിരുന്നു. തൃശൂര് മുളങ്കുന്നത്തുകാവ് സ്വദേശി വിനോദ്, കൊല്ലം അഞ്ചല് സ്വദേശി അനൂപ് കുമാര്, കണ്ണൂര് സ്വദേശി ഷെറിന് എന്നിവരാണ് മരിച്ച മലയാളികള്.
