അമരാവതി/തിരുപ്പതി: ആന്ധ്രാപ്രദേശില് വൈ.എസ് ജഗന് മോഹന് റെഡ്ഡിയുടെ നേതൃത്വത്തിലയുള്ള വൈ.എസ്.ആര് കോണ്ഗ്രസ് പാര്ട്ടി അധികാരത്തിലെത്തിയതിനു പിന്നാലെ സുപ്രധാന പദവികളില് കുടുംബാധിപത്യമെന്ന് റിപ്പോര്ട്ടുകള്. ദക്ഷിണേന്ത്യയിലെ പ്രമുഖ ക്ഷേത്രങ്ങളിലൊന്നായ തിരുമല തിരുപ്പതി വെങ്കടേശ്വര ക്ഷേത്രത്തിലെ ദേവസ്വം ട്രസ്റ്റ് ബോര്ഡിന്റെ ഭരണ സമിതി ചെയര്മാനായി ജഗന് മോഹന്റെ അടുത്ത ബന്ധു വൈ.വി ശുഭ റെഡ്ഡിയെ നിയമിച്ചു. പാര്ട്ടി മുന് എം.പിയാണ് ശുഭ റെഡ്ഡി. ബോര്ഡിലെ മറ്റ് അംഗങ്ങളെ വൈകാതെ നിയമിക്കുമെന്ന് സ്പെഷ്യല് ചീഫ് സെക്രട്ടറി മന്മോഹന് സിംഗ് പറഞ്ഞു.
സുഭറെഡ്ഡി ശനിയാഴ്ച ചുമതലയേറ്റു. ചന്ദ്രബാബു നായിഡു സര്ക്കാര് അധികാരമൊഴിഞ്ഞതോടെ ദേവസ്വം ബോര്ഡ് ചെയര്മാനായിരുന്ന ടി.ഡി.പി നേതാവ് പുട്ട സുധാകര് യാദവ് വ്യാഴാഴ്ച രാജിവെച്ചിരുന്നു. ജഗന് മോഹന് അധികാരം പിടിച്ചെടുത്തതോടെ ബോര്ഡിലെ 10 അംഗങ്ങള് സ്വമേധയാ രാജിവച്ചിരുന്നു. എക്സ്-ഒഫീഷ്യോ അംഗങ്ങളായ മൂന്ന് സര്ക്കാര് ഉദ്യോഗസ്ഥര് മാത്രമാണ് ബോര്ഡില് തുടരുന്നത്.
