തിരുവനന്തപുരം : ജയിലുകളില്‍ നടത്തിയ മിന്നല്‍ പരിശോധനകളില്‍ നിന്നും പിടിച്ചെടുത്ത മൊബൈല്‍ ഫോണുകളുടെ വിശദാംശങ്ങള്‍ പരിശോധിക്കാനുള്ള നീക്കങ്ങളുമായി ജയില്‍ ഡിജിപി. ഇക്കാര്യം ഋഷിരാജ് സിങ് പോലീസിനോട് ആവശ്യപ്പെട്ടു.
വിവിധ ജയിലില്‍ നിന്നും പിടിച്ചെടുക്കുന്ന ഫോണുകള്‍ അതാതു സ്ഥലത്തെ ലോക്കല്‍ പോലീസിനാണ് കൈമാറുന്നത്. മുന്‍പും ഇത്തരത്തില്‍ ജയിലുകളില്‍ നിന്നും ഫോണ്‍ പിടിച്ചെടുക്കുകയും ലോക്കല്‍ പോലീസിന് കൈമാറുകയും ചെയതിരുന്നുവെങ്കിലും രാഷ്ട്രീയ നേതൃത്വങ്ങളുടെ ഇടപെടലിനെ തുടര്‍ന്ന് വിശദമായ പരിശോധന നടന്നിരുന്നില്ല. ഇത് അവസാനിപ്പിക്കുമെന്ന ദൃഢ നിശ്ചയത്തോടെയാണ് ഋഷിരാജ് സിങ് മുന്നോട്ടു നീങ്ങുന്നത്.
പ്രതികള്‍ ആരെയൊക്കെയാണ് വിളിച്ചത്. ആരുടെ ഫോണാണ് ഉപയോഗിച്ചത്, ആരാണ് ഫോണും സിമ്മും കൈമാറിയത് തുടങ്ങിയ വിവരങ്ങള്‍ പരിശോധിക്കാനാണ് പോലീസിനോട് ആവശ്യപ്പെട്ടിരിക്കുന്നതെന്നാണ് ജയില്‍ വകുപ്പ് അധികൃതര്‍ വ്യക്തമാക്കുന്നത്. തടവുകാര്‍ക്ക് ഫോണ്‍ നല്‍കിയവരെ കണ്ടെത്തി അവരെ നിയമത്തിന് മുനവ്‌നില്‍ എത്തിച്ചാല്‍ മാത്രമേ ജയിലിനുള്ളിലേയ്ക്കുള്ള ഫോണ്‍ കടത്ത് അവസാനിക്കൂ എന്നാണ് ഡിജിപി പറയുന്നത്. ഇതിനായി തടവുകാരെ സഹായിക്കുന്ന ജയില്‍ ജീവനക്കാരെ നിരീക്ഷിക്കാന്‍ പ്രത്യേക സംവിധാനവും ഏര്‍പ്പെടുത്തും.
ഋഷിരാജ് സിങ് ചുമതലയേറ്റ ശേഷം നടത്തിയ പരിശോധനയില്‍ ഇതുവരെ 32 ഫോണുകളാണ് വിവിധ ജയിലുകളില്‍ നിന്നും പിടിച്ചെടുത്തത്. രാഷ്ട്രീയക്കേസില്‍ പ്രതികളായവരാണ് ഫോണുകള്‍ ഉപയോഗിക്കുന്നവരില്‍ ഏറെയും. ടി.പി ചന്ദ്രശേഖരന്‍ വധക്കേസ് പ്രതികളായ കൊടിസുനിയില്‍ നിന്നും നിന്ന് ഒരു ഫോണും മുഹമ്മദ് ഷാഫിയില്‍ നിന്നും രണ്ട് ഫോണുകളും സിമ്മുകളുമാണ് പിടിച്ചെടുത്തിരുന്നത്. തുടര്‍ന്ന് ഇവരെ വിയ്യൂരില്‍ നിന്നും പൂജപ്പുരയിലേയ്ക്കും മാറ്റി.
Comments