ന്യൂഡല്ഹി: രാഹുല് ഗാന്ധി കോണ്ഗ്രസ്സ് അധ്യക്ഷ സ്ഥാനം രാജിവച്ചു. ലോകസഭാ തെരഞ്ഞെടുപ്പില് പാര്ട്ടിക്കേറ്റ പരാജയത്തിന്റെ ഉത്തരവാദിത്തം ഏറ്റെടുത്താണ് നടപടിയെന്ന് രാഹുല് രാജിക്കത്തില് പറയുന്നു. കത്ത് രാഹുല് ട്വീറ്റ് ചെയ്തിട്ടുണ്ട്. കോണ്ഗ്രസ്സ് അധ്യക്ഷ സ്ഥാനത്തു നിന്നും രാജി വച്ചെന്നും ഇനി പാര്ട്ടിയുടെ അധ്യക്ഷസ്ഥാനത്ത് തുടരാനില്ലെന്നും രാഹുല് ഗാന്ധി ആവര്ത്തിച്ചു.
തെരഞ്ഞെടുപ്പ് പരാജയത്തിന്റെ ഉത്തരവാദിത്തം ഏറ്റെടുക്കേണ്ടത് പാര്ട്ടിയുടെ ഭാവിക്ക് അത്യന്താപേക്ഷിതമാണ്. അതുകൊണ്ടാണ് താന് രാജി സമര്പ്പിക്കുന്നത്. പുതിയ അധ്യക്ഷനെ താന് നാമനിര്ദേശം ചെയ്യണമെന്ന് പല സഹപ്രവര്ത്തകരും ആവശ്യപ്പെട്ടിരുന്നു. അത് ശരിയാണെന്ന് താന് വിചാരിക്കുന്നില്ല. പാര്ട്ടി തന്നെ പുതിയ അധ്യക്ഷനെ തെരഞ്ഞെടുക്കണമെന്നും രാഹുല് കത്തില് പറഞ്ഞിട്ടുണ്ട്.
കഴിഞ്ഞ ദിവസം കോണ്ഗ്രസ്സ് ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരുമായി രാഹുല് കൂടിക്കാഴ്ച നടത്തിയിരുന്നു. ഇതിന് ശേഷമാണ് രാഹുല് തന്റെ നിലപാട് കടുപ്പിക്കുകയും പരസ്യ പ്രസ്താവന നടത്തുകയും ചെയ്തത് എന്നതും ശ്രദ്ധേയമാണ്.
