ആഗ്ര: ഭഗവദ്ഗീത വായിച്ചതിന് മുസ്ലീം മധ്യവയസ്കന് ക്രൂരമര്ദ്ദനം. അലിഗഡിലെ ഷാ ജമാല് മേഖലയിലാണ് സംഭവം. സ്വന്തം വീട്ടില് ഗീത പാരായണം ചെയ്തതിന് സ്വസമുദായക്കാര് തന്നെയാണ് ദില്ഷാര് എന്ന 55കാരനെ മര്ദ്ദിച്ചത്. രാവിലെ ഒന്പത് മണിയോടെയാണ് ആക്രമണമുണ്ടായത്. ദില്ഷാര് ഗീതാ പാരായണം ചെയ്യുന്നത് കേട്ടുവന്നവര് ഇയാളെ മര്ദ്ദിക്കുകയായിരുന്നുവെന്ന് ദേശീയ മാധ്യമം റിപ്പോര്ട്ട് ചെയ്യുന്നു.
ഒരു കമ്പനിയില് സെക്യൂരിറ്റി ജീവനാക്കാരനായി ജോലി ചെയ്യുകയാണ് ദില്ഷര്. സമീര്, സക്കീര് എന്നീ പേരുകളില് അറിയപ്പെടുന്നവരും തിരിച്ചറിയാത്ത ഏതാനും ചിലരും ചേര്ന്നാണ് മര്ദ്ദിച്ചതെന്ന് ദില്ഷര് പോലീസില് മൊഴി നല്കി. താന് മുസ്ലീമാണെങ്കിലും കഴിഞ്ഞ 38 വര്ഷമായി ഗീത വായിക്കുന്ന ആളാണെന്ന് ദില്ഷര് പറഞ്ഞു. മറ്റ് മതങ്ങളുടെ വിശുദ്ധഗ്രന്ഥം വായിക്കുന്നതിനെ തന്റെ മതം തടയുന്നില്ലെന്നും ഇയാള് കൂട്ടിച്ചേര്ത്തു.
ദില്ഷറിനെ മര്ദ്ദിച്ചുവെന്ന് ആരോപിക്കപ്പെടുന്ന സമീര്, സക്കീര് എന്നിവര്ക്കെതിരെയും തിരിച്ചറിയാത്ത മറ്റ് ചിലര്ക്കെതിരെയും പോലീസ് കേസെടുത്തിട്ടുണ്ട്.
