ന്യുഡല്ഹി: ഡല്ഹി കണ്ട ഏറ്റവും ജനകീയമായ രാഷ്ട്രീയ നേതാവും ഭരണാധികാരിയുമായിരുന്നു അന്തരിച്ച മുന് മുഖ്യമന്ത്രി ഷീലാ ദീക്ഷിത്. പുതിയ റോഡുകളും മെട്രോ റെയിലും അടക്കം നഗരവികസനവുമായി ഡല്ഹിയുടെ മുഖഛായ മാറ്റിയ വികസന നായിക. പതിനഞ്ചു വര്ഷത്തോളം ഡല്ഹിയില് മുഖ്യമന്ത്രിയായിരുന്ന ജനപ്രീയ നായിക ഒടുവില് സാമ്പത്തിക ക്രമക്കേടില് പ്രതിഛായ നഷ്ടപ്പെട്ട് അധികാരത്തില് നിന്നിറങ്ങേണ്ടിവന്നു.
നിലപാടുകളിലുള്ള വ്യക്തതയായിരുന്നു ഇവരുടെ കരുത്ത്. ഗാന്ധി കുടുംബവുമായുള്ള അടുപ്പം ഇവര്ക്ക് ധൈര്യവുമായിരുന്നു. ഇന്ദിര ഗാന്ധിയുടെയും രാജീവ് ഗാന്ധിയുടെയും മന്ത്രിസഭകളില് അംഗമായിരുന്ന ഷീല ദീക്ഷിതിന് സോണിയ ഗാന്ധിയും രാഹുല് ഗാന്ധിയുമായി നല്ല ബന്ധവുമുണ്ടായിരുന്നു. കഴിഞ്ഞ ലോക്സഭാ തെരഞ്ഞെടുപ്പില് ആം ആദ്മി പാര്ട്ടിയുമായി സഖ്യമുണ്ടാക്കാന് ഒരു വിഭാഗം ആവശ്യം ഉയര്ത്തിയപ്പോള് അതിനെ എതിര്ത്ത ഷീല ദീക്ഷിതിന്റെ നിലപാടിന് രാഹുല് വഴങ്ങിയതും ഈ ബന്ധത്തിന്റെ ശക്തിയായിരുന്നു.
2013ലെ തെരഞ്ഞെടുപ്പില് അരവിന്ദ് കെജ്രിവാളിനോട് പരാജയപ്പെട്ടതോടെ പാര്ലമെന്ററി രാഷ്ട്രീയം വിട്ട ഷീലാ ദീക്ഷിത് കഴിഞ്ഞ ലോക്സഭ തെരഞ്ഞെടുപ്പില് മത്സരിക്കാന് തയ്യാറായതും ഗാന്ധി കുടുംബത്തിന്റെ സ്നേഹപൂര്വ്വമായ നിര്ബന്ധം മൂലമായിരുന്നു. എഎപി ബന്ധത്തിന്റെ പേരില് ഡല്ഹി കോണ്ഗ്രസ് അധ്യക്ഷ സ്ഥാനം അജയ് മാക്കന് ഒഴിഞ്ഞതോടെ ആ സ്ഥാനത്തേക്ക് ഷീലയല്ലാതെ മറ്റൊരാളെ നിശ്ചയിക്കാന് കോണ്ഗ്രസ് നേതൃത്വത്തിനും കഴിഞ്ഞില്ല.
1998 മുതല് 2013 വരെ ഡല്ഹിയെ നയിക്കാന് അവരെ പ്രാപ്തരാക്കിയത് ശക്തമായ ജനപിന്തുണയായിരുന്നു. തുടര്ന്നുവന്ന തെരഞ്ഞെടുപ്പില് അരവിന്ദ് കെജ്രിവാളിനോട് പരാജയപ്പെട്ടു. 2017ലെ ഉത്തര്പ്രദേശ് തെരഞ്ഞെടുപ്പില് കോണ്ഗ്രസ് മുഖ്യമന്ത്രി സ്ഥാനാര്ത്ഥിയായി ഷീലാ ദീക്ഷിത്തിനെ നിശ്ചയിച്ചുവെങ്കിലും അവര് പിന്മാറി. ഇക്കഴിഞ്ഞ ജനുവരി 10നാണ് ഡല്ഹി കോണ്ഗ്രസ് അധ്യക്ഷയായി നിയമിച്ചത്.
തട്ടകം ഡല്ഹിയായിരുന്നുവെങ്കിലും കേരളത്തോട് പ്രത്യേക സ്നേഹം അവര് പ്രകടിപ്പിച്ചിരുന്നു. 2014 മാര്ച്ച് 11 മുതല് അഞ്ചുമാസം േകരള ഗവര്ണര് ആയിരുന്നു. 2014ല് േക്രന്ദത്തില് േമാഡി സര്ക്കാര് അധികാരത്തില് വന്നേതാെട ഷീല ഗവര്ണര് സ്ഥാനം രാജിവച്ചു. ഡല്ഹിക്ക് പുറത്തേക്ക് സേവനം നീട്ടാന് താല്പര്യമില്ലാത്ത ഡല്ഹി മെട്രോ റെയില്, കൊച്ചി മെട്രോയുമായി സഹകരിക്കാന് തയ്യാറായതും ഷീല ദീക്ഷിത്തിന്റെ ഇടപെടലിനെ തുടര്ന്നായിരുന്നു.
2010ലെ കോമണ്വെല്ത്ത് ഗെയിംസിന് ഡല്ഹി വേദിയായതായിരുന്നു അവരുടെ രാഷ്ട്രീയ ജീവിതത്തില് കളങ്കമായത്. കോമണ്വെല്ത്ത് ഗെയിംസിന്റെ ഒരുക്കങ്ങളുടെ പേരില് വന്ന സാമ്പത്തിക ക്രമക്കേടുകളും തുടര്ന്നുണ്ടായ കേസുകളും കോണ്ഗ്രസ് സര്ക്കാരിന് അന്ത്യം കുറിച്ചു. അഴിമതിക്കെതിരായ പോരാട്ടവുമായി മുളച്ചുവന്ന ആം ആദ്മി പാര്ട്ടിക്കും നേതൃത്വം നല്കിയ അരവിന്ദ് കെജ്രിവാളിനും മുന്നില് കോണ്ഗ്രസും ഷീലാ ദീക്ഷിതും മുട്ടുമടക്കി.
ഹൃദയാഘാതത്തെ തുടര്ന്ന് ഇന്നു വൈകിട്ട് ഡല്ഹിയിലെ സ്വകാര്യ ആശുപത്രിയിലായിരുന്നു ഷീലാ ദീക്ഷിത്തിന്റെ അന്ത്യം. ഷീലാ ദീക്ഷിത്തിന്റെ വിയോഗത്തില് രാഷ്ട്രപതിയും പ്രധാനമന്ത്രിയും അനുശോചനം രേഖപ്പെടുത്തി. ഊഷ്മളവും സൗഹാര്ദ്ദവുമായി വ്യക്തിത്വമായിരുന്നു അവരുടേത്. ഡല്ഹിയുടെ വികസനത്തില് ശ്രദ്ധാര്ഹമായ സംഭാവനകള് അവര് നല്കി. കുടുംബത്തേയും പ്രവര്ത്തകരേയും അനുശോചനം അറിയിക്കുന്നു.-നരേന്ദ്രമോഡി ട്വീറ്റ് ചെയ്തു.
കോണ്ഗ്രസ് മുന് അധ്യക്ഷന് രാഹുല് ഗാന്ധി, ഡല്ഹി മുഖ്യമന്ത്രി അരവിന്ദ് കെജ്രിവാള്, മുഖ്യമന്ത്രി പിണറായി വിജയന് തുടങ്ങിയവരും ഷീലാ ദീക്ഷിത്തിന്റെ മരണത്തില് അനുശോചനം രേഖപ്പെടുത്തി. അവരുടെ ഹൃദയത്തില് കേരളത്തിന് സവിശേഷമായ സ്ഥാനമുണ്ടായിരുന്നുവെന്ന് പിണറായി വിജയന് പറഞ്ഞു.
