മലയാളസിനിമ, സീരിയല്, നാടക നടനാണ് കെ.ടി.എസ്. പടന്നയില് എന്ന കൊച്ചുപറമ്പില് തായി സുബ്രഹ്മണ്യന്. സിനിമയില് ഹാസ്യ കഥാപാത്രങ്ങളെ ആണ് ഇദ്ദേഹം കൂടുതലായി അവതരിപ്പിച്ചത്. വൃദ്ധന്മാരെ സൂക്ഷിക്കുക, ത്രീമെന് ആര്മി, കളമശ്ശേരിയില് കല്ല്യാണയോഗം, കാക്കക്കും പൂച്ചയ്ക്കും കല്ല്യാണം, അനിയന് ബാവ ചേട്ടന് ബാവ, ആദ്യത്തെ കണ്മണി, സ്വപ്നലോകത്തെ ബാലഭാസ്കരന് എന്നിങ്ങനെ നിരവധി സിനിമകളില് അദ്ദേഹം ശ്രദ്ധേയമായ വേഷങ്ങള് കൈകാര്യം ചെയ്തു.
താരസംഘടനയായ 'അമ്മ'യില് അയ്യായിരം രൂപ അംഗത്വ ഫീസുള്ളപ്പോഴാണ് കെ.ടി.എസ് പടന്നയില് ചേരുന്നത്. ഇന്ന് 'അമ്മ' അയ്യായിരം രൂപ പെന്ഷനായി അദ്ദേഹത്തിന് നല്കുന്നുണ്ട്. എന്നാല് അമ്മ മീറ്റിംഗിനൊക്കെ പോകുമ്പോള് ഒരു കാരണവരാണെന്ന പരിഗണന പോലും തനിക്ക് ആരും തരാറില്ലെന്ന് പറയുകയാണ് അദ്ദേഹം. '' അമ്മയുടെ മീറ്റിംഗിനൊക്കെ പോകുമ്പോള് ഒരുപാട് ആള്ക്കാരെ കാണും. ഞാനിങ്ങനെ അവരെ നോക്കും, അവരും നോക്കും. എന്നാല് ഒരു കാരണവരാണ്, എന്താ ചേട്ടാ സുഖമാണോ എന്ന് ആരും തന്നെ ഒരുവാക്ക് ചോദിക്കാറില്ല'.
പിന്നെ ഞാന് ഈ പിള്ളേരുടെ അടുത്ത് ചെന്നിട്ട് മോനെ എന്നെ അറിയോ, എന്ന് ചോദിക്കേണ്ട കാര്യമില്ല. അവര്ക്ക് മനസിലായില്ലെങ്കില് ഞാനും മനസിലാക്കുന്നില്ല. ഒരുപാട് പടത്തില് അച്ഛന് വേഷം ചെയ്തിട്ടുണ്ട്. ജഗതിയുടെ അച്ഛന് അങ്ങനെ ഒത്തിരി. ജഗതിയൊക്കെയുള്ളപ്പോള് ഭയങ്കര സ്നേഹമായിരുന്നു. ഇന്നസെന്റും വന്ന് സംസാരിക്കാറുണ്ട്. എന്നാല് ചിലരെ കാണുമ്പോള് ജാഡ എന്നൊക്കെ പറഞ്ഞാല് ഇതാണോ എന്ന് ഞാന് ചിന്തിച്ചിട്ടുണ്ട്'' അദ്ദേഹം പറയുന്നു.
