പിടികിട്ടാപ്പുള്ളി സുകുമാരക്കുറുപ്പായി ദുല്ഖര് സല്മാന് വേഷമിടുന്ന ചിത്രത്തിലേക്ക് അഭിനേതാക്കളെ തേടുന്നു. സുകുമാര കുറുപ്പിന്റെ ജീവിതത്തെ ആസ്പദമാക്കി നിരവധി സിനിമകള് ഇതിനു മുന്പും വെള്ളിത്തിരയിലെത്തിയിട്ടുണ്ട്. ശ്രീനാഥ് രാജേന്ദ്രന് സംവിധാനം ചെയ്യുന്ന കുറുപ്പ് സിനിമയുടെ ചിത്രീകരണം ഒറ്റപ്പാലത്ത് ആരംഭിക്കുകയാണ്.
ഇതിനായുള്ള കാസ്റ്റിംഗ് കോളാണ് ദുല്ഖര് സല്മാന് തന്റെ പേജിലൂടെ പുറത്ത് വിട്ടിരിക്കുന്നത്. ദുല്ഖറിന്റെ ആദ്യ ചിത്രമായ സെക്കന്റ് ഷോ ഒരുക്കിയ ശ്രീനാഥ് രാജേന്ദ്രന് തന്നെയാണ് കുറുപ്പും ഒരുക്കുന്നതും. ഒരു രാത്രി തിരുത്തിയ ആയുസിന്റെ ചരിത്രം എന്നാണ് ചിത്രത്തിന്റെ ടാഗ് ലൈന്. ചിത്രത്തിന്റെ ടൈറ്റില് പോസ്റ്റര് നേരത്തെ പുറത്തിറങ്ങിയിരുന്നു.
'ശ്രീനാഥ് രാജേന്ദ്രന് സംവിധാനം ചെയ്യുന്ന കുറുപ്പ് സിനിമയുടെ ചിത്രീകരണം ഒറ്റപ്പാലത്ത് ആരംഭിക്കുന്നു. എണ്പതുകളിലെ ഗ്രാമാന്തരീക്ഷമാണ് ഒറ്റപ്പാലത്തും പരിസരങ്ങളിലുമായി പുനര്സൃഷ്ടിക്കുന്നത്.. ഈ ഗ്രാമത്തിലെ കഥാപാത്രങ്ങളാകാന് താല്പര്യമുള്ളവര്ക്ക് ആഗസ്റ്റ് 10 ശനിയാഴ്ച രാവിലെ 9:30 മുതല് 4:30 വരെ ഷൊര്ണ്ണൂര് കുളപ്പുള്ളി റീജന്സിയില് നടക്കുന്ന ഒഡിഷനില് പങ്കെടുക്കാം. പ്രായ പരിധിയില്ല...പാലക്കാട് പരിസരത്തുള്ളവര്ക്കും മുടി നീട്ടി വളര്ത്തിയവര്ക്കും മുന്ഗണന..' ചിത്രത്തിന്റെ കാസ്റ്റിംഗ് കോളില് പറയുന്നു.
