കൊച്ചി: തീവ്രവാദ ഭീഷണിയെ തുടര്‍ന്ന് കസ്റ്റഡിയിലെടുത്ത് വിട്ടയച്ച തൃശ്ശൂര്‍ കൊടുങ്ങല്ലൂര്‍ സ്വദേശി അബ്ദുള്‍ ഖാദര്‍ റഹിം വീണ്ടും കസ്റ്റഡിയില്‍. തീവ്രവാദ ബന്ധം സംശയിച്ച് കസ്റ്റഡിയിലെടുത്ത അബ്ദുള്‍ ഖാദര്‍ റഹിമീനെ 24 മണിക്കൂര്‍ ചോദ്യം ചെയ്തതിനു ശേഷമാണ് ഇന്നലെ വിട്ടയച്ചത്. എന്നാല്‍ ഇന്നലെ രാത്രിയോടെ തന്നെ ഇയാളെ വീണ്ടും പോലീസ് കസ്റ്റഡിയിലെടുക്കുകയായിരുന്നു.
തമിഴ്‌നാട് പോലീസ് ഇന്നലെ പിടികൂടിയ മതിലകം സ്വദേശി സിദ്ദിഖുമായുളള ബന്ധമാണ് ഇയാളോട് ചോദിച്ചറിയുന്നത്. കഴിഞ്ഞ വെള്ളിയാഴ്ച പുലര്‍ച്ചെ രണ്ടിന് എന്തിനാണ് സിദ്ദിഖുമായി സംസാരിച്ചത് എന്നതാണ് പോലീസ് ചോദിച്ചറിയാന്‍ ശ്രമിക്കുന്നത്. എന്നാല്‍ സിദ്ദിഖിനെ ബഹ്‌റൈനില്‍ വെച്ച് അറിയാമെന്നും മറ്റ് ഒരു ബന്ധവുമില്ലെന്നുമാണ് റഹീമിന്റെ മൊഴി. ചെന്നൈയില്‍ സ്വകാര്യ കമ്പനി ജീവനക്കാരനാണ് തമിഴ്‌നാട് പോലീസിന്റെ ക്യൂ ബ്രാഞ്ച് അറസ്റ്റ് ചെയ്ത സിദ്ദിഖ്.
ശനിയാഴ്ച സിജെഎം കോടതിയില്‍ ഹാജരാകാനെത്തിയപ്പോഴാണ് അബ്ദുള്‍ ഖാദര്‍ റഹീമിനെ കൊച്ചി പോലീസ് കസ്റ്റഡിയിലെടുത്തത്. ശ്രീലങ്കയിലോ പാക്കിസ്ഥാനിലോ പോയിട്ടില്ലെന്നും, ലഷ്‌കര്‍ കമാന്‍ഡര്‍ ആണെന്ന് കേന്ദ്ര ഏജന്‍സികള്‍ സംശയിക്കുന്ന അബു ഇല്യാസിനെ പരിചയമില്ലെന്നും റഹീം പോലീസിനോട് ആവര്‍ത്തിച്ചിരുന്നു. തീവ്രവാദ ബന്ധം കണ്ടെത്താന്‍ സാധിക്കാത്തതിനെ തുടര്‍ന്നാണ് ഇന്നലെ റഹീമിനേയും ഇയാളുടെ ഒപ്പമുണ്ടായിരുന്ന യുവതിയേയും പോലീസ് വിട്ടയച്ചത്. ദക്ഷിണേന്ത്യയിലെ പ്രമുഖ ക്ഷേത്രങ്ങളിലും പള്ളികളിലും ഭീകരര്‍ സ്‌ഫോടനം ലക്ഷ്യമിട്ടതായി കേന്ദ്ര അന്വേഷണ ഏജന്‍സികള്‍ മുന്നറിയിപ്പ് നല്‍കിയിരുന്നു.
Comments