ന്യൂഡല്ഹി : പാക് ചാരസംഘടനയായ ഐഎസ്ഐ ഇന്ത്യയുടെ പുതിയ രണ്ടായിരം രൂപയുടെ കള്ളനോട്ടുകള് അടിച്ചിറക്കുന്നതായി റിപ്പോര്ട്ട്. ഡല്ഹി പോലീസിലെ സ്പെഷ്യല് സെല്ലിനാണ് ഇതുസംബന്ധിച്ച വിവരം കിട്ടിയത്.
കള്ളനോട്ട് നിര്മ്മിക്കുന്നതിനായി ഹൈടെക് ഒപ്റ്റിക്കല് വേരിയബിള് മഷി ഉപയോഗിക്കുന്നതായാണ് വിവരം. കറാച്ചിയിലെ മാലിര് ഫാര്ട്ടിലുള്ള പാകിസ്ഥാന് സെക്യൂരിറ്റി പ്രസില് ആണ് കളളനോട്ട് അച്ചടിക്കുന്നത്.
നോട്ടുകള് പാകിസ്ഥാനില് അച്ചടിച്ച ശേഷം ഇന്ത്യയിലേയ്ക്ക് കടത്തുകയാണ് ചെയ്യുന്നത്. 2000 രൂപ നോട്ടിന്റെ ഏതാണ്ട് എല്ലാ സവിശേഷതകളും ഈ കള്ളനോട്ടിലും ഉണ്ട്. പാകിസ്ഥാനികള് ഉപയോഗിച്ച ഹൈടെക് ഒപ്റ്റിക്കല് വേരിയബിള് മഷി ഏറ്റവും ഉയര്ന്ന നിലവാരത്തിലുള്ളതാണ്. ഐഎസ്ഐയിലെ ഉന്നത ഉദ്യോഗസ്ഥരുടെ മേല്നോട്ടത്തിലാണ് നോട്ട് പ്രിന്റ് ചെയ്യുന്നതെന്നാണ് വിവരം. ദാവൂദ് ഇരബാഹിമിന്റെ ഡി കമ്പനിയാണ് ഈ നോട്ട് ഇന്ത്യയില് വിതരണം ചെയ്യുന്നത്.
നോട്ടിന്റെ ഇടതും വലതും ഭാഗത്തുള്ള ബ്ലീഡ് ലൈനുകളും അവര് പ്രിന്റ് ചെയ്തിട്ടുണ്ട്. കണ്ണ് കാണാത്തവര്ക്കു കൂടി ഉപയോഗിക്കാന് കഴിയുന്ന തരത്തിലാണ് ഇത് തയ്യാറാക്കിയിരിക്കുന്നത്.
ആറു മാസം മുന്പ് പിടിച്ച കള്ളനോട്ടുകളില് ഇത്തരം ഉയര്ന്ന സാങ്കേതിക വിദ്യകളൊന്നു ഉണ്ടായിരുന്നില്ല. ഈ വര്ഷം ജൂണ് ആദ്യം നേപ്പാളിലെ കാഠ്മണ്ഠുവിലെ ത്രിഭുവന് എയര്പോര്ട്ടില് 7.67 കോടി രൂപയുടെ കള്ളനോട്ടാണ് നേപ്പാള് പോലീസ് പിടിച്ചത്.
