കൊല്ക്കത്ത: ബിജെപിയുടെ തള്ളിക്കയറ്റത്തില് പറിഞ്ഞുകൊണ്ടിരിക്കുന്ന കാല് അമര്ത്തിച്ചവിട്ടാന് ബംഗാളിലെ ഏറ്റവും വലിയ ഉത്സവങ്ങളില് ഒന്നായ ദുര്ഗാപൂജയെ തന്ത്രമാക്കി തൃണമൂല് കോണ്ഗ്രസും മമതാ ബാനര്ജിയും. നികുതി അടയ്ക്കുന്നതുമായി ബന്ധപ്പെട്ട് ദുര്ഗാ പൂജാ ക്ലബ്ബുകളും പരിപാടി നടത്തുന്ന ഇവന്റ് മാനേജ്മെന്റുകളും വലിയ വിവാദം നേരിടുമ്പോള് ഒക്ടോബര് 4 ന് തുടങ്ങുന്ന ദുര്ഗാപൂജയില് ബിജെപിയ്ക്ക് മേല് മേല്ക്കൈ നേടാന് നികുതിയിളവും സാമ്പത്തീക സഹായവും ഒക്കെ പ്രഖ്യാപിച്ച് രംഗത്ത് വരികയാണ് മമതാബാനര്ജി.
ആള്ക്കാര് കൂട്ടായ്മ ഉണ്ടാക്കി ആഘോഷിക്കാറുള്ള ദുര്ഗാപൂജയില് തൃണമൂല് നേതാക്കളും പങ്കെടുക്കാറുണ്ട്. ഇത്തരം 28,000 ല് പരം കൂട്ടമെങ്കിലും ദുര്ഗാപൂജ ആഘോഷത്തില് എല്ലാവര്ഷവും പങ്കെടുക്കാറുണ്ടെന്നാണ് കണക്ക്. ഇത്തവണ ദുര്ഗാ പൂജ സംഘടിപ്പിക്കുന്ന കൂട്ടായ്മകള്ക്ക് മമത സാമ്പത്തീക സഹായം കൂട്ടി. കഴിഞ്ഞ വര്ഷം വരെ നല്കിയിരുന്ന സാമ്പത്തീക സഹായം 10,000 ല് നിന്നും 25,000 ആക്കിലാണ് ഇത്തവണ ഉയര്ത്തിയത്. സ്ത്രീകളുടെ കൂട്ടായ്മകളാണ് സംഘടിപ്പിക്കുന്നതെങ്കില് 5000 രൂപ കൂടി അധികമായി നല്കും.
വലിയ ദീപാലങ്കാരങ്ങള് വരുന്ന ദുര്ഗാപൂജയില് വൈദ്യുതി ബില്ലില് 25 ശതമാനം കുറവും പ്രഖ്യാപിച്ചിട്ടുണ്ട്. പൂജാ ക്ളബ്ബുകള് സ്വാഗതം ചെയ്ത തീരുമാനം പക്ഷേ ബിജെപിയ്ക്ക് ഇഷ്ടപ്പെട്ടിട്ടില്ല. രാഷ്ട്രീയ ലാഭത്തിന് മമതാബാനര്ജി പൂജാ കമ്മറ്റികള്ക്ക് അപ്പക്കഷ്ണങ്ങള് വെച്ചു നീട്ടുകയാണെന്നാണ് ബിജെപിയുടെ ആക്ഷേപം. ഇതുകൊണ്ടൊന്നും ഭാവിയിലെ തെരഞ്ഞെടുപ്പില് രക്ഷപ്പെടാന് കഴിയുമെന്ന് വിചാരിക്കേണ്ടെന്നും അവര് പറയുന്നു.
ഈ വര്ഷം ദുര്ഗാപൂജയ്ക്ക് മുമ്പായി കേന്ദ്ര ആദായ നികുതി വിഭാഗം അസോസിയേഷനുകളുടെ പരിപാടികള് ഏറ്റെടുത്ത് നടത്താന് കരാറായ ഇവന്റ് മാനേജ് മെന്റുകള്ക്കും കരാര് എടുത്തിരിക്കുന്നവര്ക്കും നോട്ടീസ് നല്കിയിരിക്കുന്ന നടപടിയെ മമത വിമര്ശിച്ചിരിക്കുകയാണ്. ആരും ആദായ നികുതി അടയ്ക്കരുതെന്നും കേന്ദ്രത്തിലെ ബിജെപി സര്ക്കാര് രാഷ്ട്രീയ എതിരാളികളെ കേന്ദ്ര ഏജന്സികളെ കൊണ്ടു ദ്രോഹിക്കുകയാണെന്ന് ആരോപിച്ചു.
കാവി പാര്ട്ടി നേതാക്കളുടെ സമ്മര്ദ്ദത്തിന് വഴങ്ങി ആദായ നികുതി വിഭാഗം ബംഗാളിലെ ഏറ്റവും വലിയ ആഘോഷത്തില് പൂജാകമ്മറ്റികളെ ലക്ഷ്യമിടുകയാണെന്നും ആരോപിച്ചു. അതേസമയം മമതയുടെ നീക്കത്തെ പ്രതിരോധിക്കാന് ബിജെപിയും ശ്രമം തുടങ്ങിയിരിക്കുകയാണ്.
സംഘടനകളില് നിന്നും നികുതി ഈടാക്കുമെന്ന് നികുതി വിഭാഗം ആഗസ്റ്റ് 13 ന് നോട്ടീസ് നല്കിയിരുന്നു. ദുര്ഗാ പൂജ നടത്തുന്ന സംഘടനകളും പരിപാടി നടത്തുന്ന കരാറുകാരും ഇവന്റ്മാനേജ്മെന്റ് ഗ്രൂപ്പുകളും നികുതി അടയ്ക്കുന്നില്ലെന്ന വിവരം കഴിഞ്ഞ വര്ഷം തന്നെ കിട്ടിയിരുന്നതായിട്ടാണ് നികുതി വിഭാഗം പറയുന്നത്. നോട്ടീസ് നല്കുന്നത് പുതിയ കാര്യമല്ലെന്നും കഴിഞ്ഞ ഡിസംബറില് നോട്ടീസ് നല്കിയരുന്നതായും പറഞ്ഞു.
