ഒമര് ലുലു സംവിധാനം ചെയ്യുന്ന പുതിയ സിനിമ 'ധമാക്ക'യ്ക്കെതിരെ ടെലിവിഷന് സീരിയല് 'ശക്തിമാനിലെ' നടനും നിര്മ്മാതാവുമായ മുകേഷ് ഖന്നയുടെ പരാതി. ധമാക്ക സിനിമയില് ഒമര് ലുലു തനിക്ക് കോപ്പി റൈറ്റുള്ള 'ശക്തിമാന്' കഥാപാത്രത്തെ ഉപയോഗിച്ചുവെന്നും ഫെഫ്ക ഡയറക്ടേഴ്സ് യൂണിയന് പ്രസിഡന്റ് രജ്ഞി പണിക്കര്ക്ക് അയച്ച പരാതിയില് മുകേഷ് ഖന്ന ആവശ്യപ്പെട്ടു.
ശക്തിമാന് കഥാപാത്രവും അതിന്റെ വേഷവും തീം മ്യൂസിക്കും തനിക്ക് കോപ്പിറൈറ്റുള്ളതാണെന്നും അനുമതിയില്ലാതെയാണ് ഈ കഥാപാത്രത്തെ സിനിമയില് ഉള്പ്പെടുത്തിയതെന്നും മുകേഷ് ഖന്നയുടെ പരാതിയില് പറയുന്നു. 1997കളില് ദൂരദര്ശനില് ഹിറ്റായിരുന്ന സീരിയലായിരുന്നു ശക്തിമാന്.
ധമാക്ക സിനിമയിലെ ചില രംഗങ്ങളില് മുകേഷ് ശക്തിമാന്റെ വേഷത്തിലെത്തുന്നുണ്ട്. ഇതിന്റെ ചിത്രങ്ങള് സംവിധാനയകന് നേരത്തേ പുറത്ത് വിട്ടിരുന്നു. സിനിമില് ചില രംഗങ്ങളില് മാത്രമുള്ള ഒരു കോമഡി കഥാപാത്രമാണ് ധമാക്കയിലെ ശക്തിമാനെന്ന വിവരം മുകേഷ് ഖന്നയെ ധരിപ്പിക്കുമെന്നും എന്നിട്ടും അനുമതി ലഭിച്ചില്ലെങ്കില് കോപ്പിറൈറ്റിനെ മാനിച്ച് രംഗങ്ങള് ഒഴിവാക്കുമെന്നും ഒമര് ലുലു പറഞ്ഞു.
ഒരു അഡാര് ലവിനു ശേഷം ഒമര് ലുലു സംവിധാനം ചെയ്യുന്ന പുതിയ ചിത്രമാണ് ധമാക്ക. ഒളിമ്പ്യന് അന്തോണി ആദം എന്ന ചിത്രത്തില് മോഹന്ലാലിനൊപ്പം അഭിനയിച്ച അരുണ് ആണ് ധമാക്കയില് കേന്ദ്രകഥാപാത്രത്തെ അവതരിപ്പിക്കുന്നത്. ബാലു വര്ഗീസ്, ഗണപതി, ധര്മജന് ബോള്ഗാട്ടി, തുടങ്ങിയവരാണ് ചിത്രത്തിലെ മറ്റ് പ്രധാനകഥാപാത്രങ്ങള്.
