ന്യൂഡല്ഹി: ലോക ഗുസ്തി ചാമ്പ്യന്ഷിപ്പില് ഇന്ത്യയുടെ ബജ്രംഗ് പൂനിയയും രവി കുമാര് ദഹിയയും മെഡല് ഉറപ്പിച്ചു. ചാമ്പ്യന്ഷിപ്പിന്റെ സെമിഫൈനലില് എത്തിയാണ് ഇരുവരും മെഡല് ഉറപ്പിച്ചത്. മെഡല് ഉറപ്പിച്ചതിനൊപ്പം ടോക്യോ ഒളിമ്പിക്സ് യോഗ്യതയും ഇരുവരും നേടി.
പുരുഷന്മാരുടെ 65 കിലോഗ്രാം ഫ്രീസ്റ്റൈല് ഗുസ്തിയുടെ ക്വാര്ട്ടര് ഫൈനലിലാണ് ഉത്തരകൊറിയയുടെ യോങ് ചോല് സോനിനെ മലര്ത്തിയടിച്ച് ലോക ഒന്നാം നമ്പര് താരമായ ബജ്രംഗ് പൂനിയ സെമിയില് എത്തിയത്. സ്കോര്: 8-1.
പുരുഷന്മാരുടെ 57 കിലോഗ്രാം വിഭാഗത്തില് മുന് ലോക ചാമ്പ്യന് യുകി തകാഹാഷിയെ തോല്പ്പിച്ചാണ് രവി കുമാര് ദഹിയ സെമിയില് കടന്നത്. സ്കോര്: 17-6. ഇതോടെ അടുത്ത വര്ഷം നടക്കുന്ന ടോക്യോ ഒളിമ്പിക്സിന് യോഗ്യത നേടുന്ന ഇന്ത്യന് ഗുസ്തി താരങ്ങളുടെ എണ്ണം മൂന്നായി. വനിതാ ഗുസ്തിയില് നേരത്തെ ഇന്ത്യയുടെ വിനേഷ് ഫോഗട്ട് വെങ്കല മെഡലോടെ യോഗ്യത നേടിയിരുന്നു.
