പഞ്ചവര്ണ്ണ തത്ത എന്ന ചിത്രത്തിന് ശേഷം രമേഷ് പിഷാരടി സംവിധാനം ചെയ്യുന്ന ചിത്രമാണ് ഗാനഗന്ധര്വ്വന്. മമ്മൂട്ടിയാണ് ചിത്രത്തിലെ നായകന്. ചിത്രം റിലീസിനൊരുങ്ങുമ്പോള് കൗതുകകരമായ മറ്റൊരു കാര്യമാണ് സോഷ്യല് മീഡിയ ചൂണ്ടിക്കാട്ടുന്നത്. പന്ത്രണ്ടു വര്ഷങ്ങള്ക്ക് മുന്പ് മമ്മൂട്ടിയുടെ നസ്രാണി എന്ന ചിത്രത്തില് ജൂനിയര് ആര്ട്ടിസ്റ്റായി രമേഷ് പിഷാരടി അഭിനയിച്ചിരുന്നു. ഇപ്പോള് രമേശ് പിഷാരടി മമ്മൂട്ടിയെ നായകനാക്കി സിനിമ സംവിധാനം ചെയ്യുകയാണ്.
ഗാനമേള പാട്ടുകാരനായ കലാസദന് ഉല്ലാസ് എന്ന കഥാപാത്രത്തെയാണ് ഗാനഗന്ധര്വ്വനില് മമ്മൂട്ടി അവതരിപ്പിക്കുന്നത്. പുതുമുഖം വന്ദിതയാണ് ചിത്രത്തിലെ നായിക. രമേഷ് പിഷാരടിയും ഹരി പി നായരും ചേര്ന്നാണ് ചിത്രത്തിന്റെ കഥയും തിരക്കഥയും സംഭാഷണവും ഒരുക്കിയിരിക്കുന്നത്. മുകേഷ്, ഇന്നസെന്റ്, സിദ്ധിഖ്, സലിം കുമാര്, ധര്മജന് ബോള്ഗാട്ടി, ഹരീഷ് കണാരന്, മനോജ് കെ ജയന്, സുരേഷ് കൃഷ്ണ, മണിയന് പിള്ള രാജു, കുഞ്ചന്, അശോകന്, സുനില് സുഖദ, അതുല്യ, ശാന്തി പ്രിയ തുടങ്ങിയവരും ചിത്രത്തില് പ്രധാന കഥാപാത്രങ്ങളെ അവതരിപ്പിക്കുന്നുണ്ട്.
അഴകപ്പന് ഛായാഗ്രഹണവും ലിജോ പോള് എഡിറ്റിംഗും നിര്വഹിക്കുന്ന ഗാനഗന്ധര്വ്വന് സംഗീതമൊരുക്കുന്നത് ദീപക് ദേവാണ്. ഇച്ചായീസ് പ്രൊഡക്ഷന്സും രമേഷ് പിഷാരടി എന്റര്ടൈന്മെന്റ്സും ചേര്ന്നൊരുക്കുന്ന ഗാനഗന്ധര്വ്വന്റെ നിര്മാണം ശ്രീലക്ഷ്മി, ശങ്കര് രാജ്, സൗമ്യ രമേഷ് എന്നിവര് ചേര്ന്നാണ് നിര്വ്വഹിക്കുന്നത്. ആന്റോ ജോസഫ് ഫിലിം കമ്പനിയാണ് ചിത്രത്തിന്റെ വിതരണം നിര്വ്വഹിക്കുന്നത്.
