പൃഥ്വിരാജ് ആദ്യമായി സംവിധായകന്റെ കുപ്പായം അണിഞ്ഞെത്തിയ മോഹന്ലാല് നായകനായ ചിത്രം ലൂസിഫര് സൂപ്പര് ഹിറ്റായിരുന്നു. ലൂസിഫര് 200 കോടി ക്ലബ്ബില് ഇടം നേടുകയും ചെയ്തു. ചിത്രത്തില് വമ്പന് താരനിരയായിരുന്നു അണിനിരന്നിരുന്നത്. സ്റ്റീഫന് നെടുമ്പള്ളിയെന്ന രാഷ്ട്രീയപ്രവര്ത്തകനായിട്ടാണ് മോഹന്ലാല് ചിത്രത്തില് എത്തിയത്. വിവേക് ഒബ്റോയ്, മഞ്ജു വാര്യര്, ഇന്ദ്രജിത്ത്, ടൊവിനോ തോമസ് എന്നിങ്ങനെ നിരവധി താരങ്ങള് ചിത്രത്തില് പ്രധാന വേഷങ്ങള് കൈകാര്യം ചെയ്തു. എമ്പുരാന് എന്ന പേരില് ചിത്രത്തിന്റെ രണ്ടാം ഭാഗവും അണിയറ പ്രവര്ത്തകര് പ്രഖ്യാപിച്ചിരുന്നു.
കഴിഞ്ഞ ദിവസം ആശീര്വാദ് സിനിമാസ് സംഘടിപ്പിച്ച ചടങ്ങില് ലൂസിഫറിന്റെ മൂന്നാം ഭാഗവും എത്തുമെന്ന തരത്തിലുള്ള സൂചനകളാണ് സംവിധായകന് പൃഥ്വിരാജ് നല്കിയിരിക്കുന്നത്. ഒടിയന്, ലൂസിഫര്, ഇട്ടിമാണി എന്നീ ചിത്രങ്ങള്ക്കായുള്ള വിജയാഘോഷത്തിനും വരാനിരിക്കുന്ന ചിത്രങ്ങളെ കുറിച്ച് പറയാനുമായാണ് ആശീര്വാദ് ചടങ്ങ് സംഘടിപ്പിച്ചത്. തിരക്കഥാകൃത്തായ മുരളി ഗോപി ചിത്രത്തിന്റെ മൂന്നാം ഭാഗത്തെ കുറിച്ചാണ് ഇപ്പോള് പലപ്പോഴും തന്നോടു സംസാരിക്കുന്നതെന്നും ആരോടും പറയരുതെന്ന് പറഞ്ഞ രഹസ്യമാണിതെന്നും പൃഥ്വിരാജ് ചടങ്ങില് പറഞ്ഞു.
ലൂസിഫര് ആലോചിച്ചപ്പോള് തന്നെ ഇത് രണ്ട് ഭാഗത്തില് ഒതുക്കാവുന്നതല്ലെന്ന് തോന്നിയിരുന്നു. എന്നാല് ആദ്യ ഭാഗം ചളമായാല് കൂടുതല് വേണ്ടല്ലോ എന്നു കരുതി ഇതുവരെ പുറത്തു പറയാതിരുന്നതാണെന്നും പൃഥ്വിരാജ് പറഞ്ഞു. മുരളി ഗോപി സഹോദര തുല്യനാണെന്നും ആദ്യ ചിത്രത്തിന്റെ വിജയത്തിനായുള്ള പുരസ്കാരം പ്രിയദര്ശനില് നിന്ന് ഏറ്റുവാങ്ങാനായത് ഏറെ സന്തോഷം പകരുന്നുവെന്നും പൃഥ്വി ചടങ്ങില് വ്യക്തമാക്കി.
