ന്യൂദല്‍ഹി: ഗുജറാത്ത് കലാപത്തിന്റെ ഇര ബില്‍ക്കീസ് ബാനുവിന് നല്‍കേണ്ട നഷ്ടപരിഹാരത്തുക ഉടന്‍ നല്‍കണമെന്ന് ഗുജറാത്ത് സര്‍ക്കാരിനോട് സുപ്രീംകോടതി. 50 ലക്ഷം രൂപയും തൊഴിലും താമസ സൗകര്യവും നല്‍കണമെന്ന വിധി രണ്ടാഴ്ചയ്ക്കകം നടപ്പാക്കണമെന്നാണ് സുപ്രീം കോടതിയുടെ ഉത്തരവ്. പുനപരിശോധനാ ഹരജി നല്‍കുമെന്ന ഗുജറാത്ത് സര്‍ക്കാര്‍ നിലപാടും ചീഫ് ജസ്റ്റിസ് രജ്ഞന്‍ ഗൊഗോയ് തള്ളി.
കേസില്‍ 17 വര്‍ഷത്തെ നിയമപോരാട്ടത്തിനൊടുവിലാണ് ബില്‍ക്കിസ് ബാനുവിന് സുപ്രീംകോടതിയില്‍ നിന്ന് അനുകൂല വിധി ഉണ്ടായത്. ഇത്ര നാളായിട്ടും നഷ്ടപരിഹാര തുക നല്‍കാതിരുന്നത് എന്തുകൊണ്ടാണെന്ന് സര്‍ക്കാര്‍ അഭിഭാഷകനോട് ചോദിക്കുകയും ചെയ്തു. നഷ്ടപരിഹാരം നല്‍കുന്നതിന് പകരം ഉത്തരവിനെതിരേ അപ്പീല്‍ നല്‍കാനായിരുന്നു ഗുജറാത്ത് സര്‍ക്കാരിന്റെ ആലോചന. വിവരം സോളിസിറ്റര്‍ ജനറല്‍ തുഷാര്‍ മേത്ത കോടതിയെ അറിയിച്ചുപ്പോള്‍ തന്നെ ആവശ്യം സുപ്രീം കോടതി തള്ളിയ ശേഷമാണ് രണ്ടാഴ്ച കാലാവധി നല്‍കി ഉത്തരവിട്ടത്.
‘‘സര്‍ക്കാരിനെതിരെ ഒന്നും പറയാത്തത് ഭാഗ്യമായി കരുതിയാല്‍ മതി” എന്നായിരുന്നു വിധി പ്രഖ്യാപിച്ചുകൊണ്ട് നല്‍കിയ മറുപടി. 19 വയസ്സുള്ളപ്പോള്‍ 2002 ല്‍ നടന്ന ഗുജറാത്ത് വംശീയകലാപത്തിനിടെയാണ് ബില്‍ക്കിസ് ബാനു കൂട്ടമാനഭംഗത്തിനിരയായത്. ബലാത്സംഗം ചെയ്യപ്പെടുമ്പോള്‍ ഇവര്‍ പൂര്‍ണ്ണ ഗര്‍ഭിണിയായിരുന്നു. ഇവരുടെ മൂന്നു വയസ്സുകാരിയായ മകളെ ഇവരുടെ കണ്‍മുന്നില്‍ അക്രമികള്‍ കൊല്ലുകയും ബന്ധുക്കളെ കൂട്ടക്കുരുതിക്ക് ഇരയാക്കുകയും ചെയ്തിരുന്നു. വലിയ വിവാദം ഉണ്ടാക്കിയ സംഭവം വര്‍ഷങ്ങളോളം നീണ്ട വിചാരണയ്ക്കൊടുവില്‍ 2019 ഏപ്രിലിലാണ് സുപ്രീം കോടതി വിധി വന്നത്.
2002 മാര്‍ച്ച് 3 ന് ഗുജറാത്ത് കലാപത്തിനിടയില്‍ വീട്ടിലെ നാലു സ്ത്രീകളും നാലു കുട്ടികളും ഉള്‍പ്പെടെ കുടുംബത്തിലെ 14 പേരാണ് ബില്‍ക്കീസ് ബാനുവിന്റെ കണ്‍മുന്നില്‍ കൊല്ലപ്പെട്ടത്. ഒടുവില്‍ അക്രമികള്‍ ഇവരെ കൂട്ട ബലാത്സംഗം ചെയ്ത ശേഷം മൃതപ്രായയായി വിട്ടിട്ടു പോകുകയായിരുന്നു. എന്നാല്‍ ക്രൂരതയില്‍ മരണത്തിലേക്ക് വഴുതിവീഴാതെ രക്ഷപ്പെട്ട അവര്‍ തിരികെ വന്ന് നിയമ പോരാട്ടം നടത്തുകയായിരുന്നു. കേസില്‍ പ്രതികളായ 11 പേരെ ബോംബെ ഹൈക്കോടതി ജീവപര്യന്തം തടവിന് ശിക്ഷിച്ചിരുന്നു. കുറ്റവാളികളെ വെറുതേ വിട്ടുകൊണ്ടുള്ള കീഴ്‌ക്കോടതി വിധി തള്ളി തെളിവ് നശിപ്പിക്കാന്‍ കൂട്ടുനിന്ന പോലീസുകാരനെയും ഡോക്ടറെയുമെല്ലാം ശിക്ഷിച്ചു കൊണ്ടായിരുന്നു ബോംബെ ഹൈക്കോടതി വിധി.
ഗോധ്രാ സംഭവത്തിന്റെ നാലാം ദിവസമായിരുന്നു സംഭവം. കലാപം വലിയ നിലയിലേക്ക് എത്തുകയും ഹിന്ദു-മുസ്ഌം വിഭാഗങ്ങളിലായി അനേകം കുടുംബങ്ങള്‍ പാലായനം ചെയ്യുകയും ഉണ്ടായി. സുരക്ഷിതമായ ഇടം തേടിപോകുന്ന സമയത്തായിരുന്നു ബില്‍ക്കീസ് ബാനുവിന്റെ കുടുംബത്തിന് നേരെയും ആക്രമണം ഉണ്ടായത്. കുടുംബത്തിലെ 17 പേര്‍ ഒരു ട്രക്കില്‍ കയറി രക്ഷപ്പെടാന്‍ ശ്രമിക്കുന്നതിനിടയില്‍ അഹമ്മദാബാദിന്റെ സമീപ ജില്ലയായ ദഹോദിലെ രന്ധിക്പൂരിന് സമീപത്ത് വെച്ച് 30-35 പേരോളം വരുന്ന അക്രമി സംഘം ഇവരെ കാണുകയും അക്രമം അഴിച്ചു വിടുകയുമായിരുന്നു. എല്ലാവരേയും ട്രക്കില്‍ നിന്നും ഇറക്കുകയും അടുത്ത മണിക്കൂറില്‍ തന്നെ 14 പേരെ കൊലപ്പെടുത്തുകയും ചെയ്തു. ബില്‍ക്കീസ് ബാനുവിന്റെ കയ്യിലായിരുന്ന രണ്ടു വയസ്സുകാരി മകള്‍ വാഹനത്തില്‍ നിന്നും ഇറങ്ങുന്നതിനിടയില്‍ തലയടിച്ച് താഴെ വീണ് മരിക്കുകയും ചെയ്തു.
ഈ സമയത്ത് ബില്‍ക്കീസ് ബാനു അഞ്ചു മാസം ഗര്‍ഭിണിയായിരുന്നു. ഇവര്‍ ക്രൂരമായി കൂട്ടബലാത്സംഗത്തിന് ഇരയായി. പിന്നീട് ബില്‍ക്കീസിനെ മരിക്കാന്‍ വിട്ടിട്ട് സംഘം പോയി. അബോധാവസ്ഥയില്‍ ആയിപ്പോയ അവര്‍ മൂന്ന് മണിക്കൂറിന് ശേഷം കണ്ണു തുറന്നു. '' കണ്ണു തുറക്കുമ്പോള്‍ ചുറ്റും ചിതറിക്കിടക്കുന്ന ഉറ്റവരുടേയും ഉടയവരുടേയും മൃതദേഹങ്ങള്‍ക്കിയില്‍ താന്‍ പൂര്‍ണ്ണ നഗ്നയായി കിടക്കുകയായിരുന്നു. പേടിച്ചുപോയി. ശരീരം മറയ്ക്കാനായി ഒരു വസ്ത്രത്തിന് വേണ്ടി പരതി. പെറ്റിക്കോട്ട് കണ്ടെത്തി ശരീരം മറച്ചു. അടിവസ്ത്രങ്ങള്‍ തൊട്ടടുത്ത് കുന്നിലായിരുന്നു കിടന്നത്. ഒരു ഗിരിവര്‍ഗക്കാരുടെ വീട്ടിലേക്കാണ് ബില്‍ക്കീസ് ചെന്നത്. സാമ്പത്തീകമായി മെച്ചമല്ലാതിരുന്ന നിരക്ഷരരായ ആള്‍ക്കാരായിരുന്നു അവിടെ ഉണ്ടായിരുന്നത്്. അവര്‍ക്കൊപ്പം നിന്നു കൊണ്ട് ധൈര്യം നേടി പോലീസില്‍ പരാതി നല്‍കി.
സംഭവത്തില്‍ 2003 ഡിസംബറില്‍ സിബിഐ അന്വേഷണത്തിന് സുപ്രീംകോടതി ഉത്തരവിട്ടു. 2004 ജനുവരിയില്‍ ബില്‍ക്കീസ് ബാനു ആരോപിച്ച എല്ലാവരേയും സിബിഐ അറസ്റ്റ ചെയ്തു. വിചാരണയ്ക്കിടയില്‍ അനേകം തവണ ഭീഷണിയും അക്രമസാധ്യതകളും നേരിട്ടതിനാല്‍ രണ്ടു വര്‍ഷത്തിനിടയില്‍ അവര്‍ക്ക് താമസ സ്ഥലം മാറേണ്ടി വന്നത് 20 ലധികം തവണയായിരുന്നു. പിന്നീട് കേസ് ഗുജറാത്തില്‍ നിന്നും മാറ്റണമെന്ന് ബില്‍ക്കീസ് ഹര്‍ജി നല്‍കി. 2004 ആഗസ്റ്റില്‍ സുപ്രീംകോടതി വിചാരണ ഗുജറാത്തില്‍ നിന്നും മുംബൈയിലേക്ക് മാറ്റി. നാല് വര്‍ഷത്തിന് ശേഷം കുറ്റാരോപിതരായ 20 പേരില്‍ 13 പേര്‍ കുറ്റക്കാരാണെന്ന് മുംബൈ കോടതി കണ്ടെത്തി. ഇവരില്‍ 11 പേര്‍ക്ക് ജീവപര്യന്തം ശിക്ഷ വിധിച്ചു.
Comments