ഒമര് ലുലുവിന്റെ പുതിയ ചിത്രം 'ധമാക്ക'യില് മുകേഷ് ശക്തിമാന്റെ വേഷത്തില് എത്തും. ശക്തിമാന് കഥാപാത്രത്തിന്റെ കോപ്പിറൈറ്റ്സ് ഉളള മുകേഷ് ഖന്നയുമവയി പ്രശ്നങ്ങള് പറഞ്ഞുതീര്ത്തതോടെയാണ് വിലക്ക് നീങ്ങിയത്. ഒമര് ലുലുവിന്റെ ഫേസ്ബുക്ക് പോസ്റ്റാണ് ഇക്കാര്യം ശരിവെക്കുന്നത്.
ഒമര് ലുലു മുകേഷ് ഖന്നയ്ക്ക് എഴുതിയ കത്താണ് പോസ്റ്റില് ഉള്പ്പെടുത്തിയിരിക്കുന്നത്. ശക്തിമാനെ സിനിമയില് അവതരിപ്പിക്കാന് മുകേഷ് ഖന്ന അനുവാദം തന്നുവെന്നും തന്റെ അപേക്ഷ സ്വീകരിച്ച അദ്ദേഹത്തോട് ഒരുപാട് കടപ്പെട്ടിരിക്കുന്നുവെന്നും ഒമര് ലുലു ഫെയ്സുബുക്കില് കുറിച്ചു.
ശക്തിമാനായി മിനിസ്ക്രീനില് നിറഞ്ഞു നിന്നിരുന്ന മുകേഷ് ഖന്ന ഫെഫ്ക യൂണിയന് പ്രസിഡന്റ് രഞ്ജി പണിക്കര്ക്ക് പരാതിക്കത്തെഴുതിയിരുന്നു.
ശക്തിമാന് കഥാപാത്രവും അതിന്റെ വേഷവും തീം മ്യൂസിക്കിന്റെയും പകര്പ്പാവകാശം തനിക്കാണെന്നും തന്റെ അനുവാദമില്ലാതെയാണ് ഒമര് ലുലു ചിത്രത്തില് നടന് മുകേഷിനെ ആ വേഷത്തില് അവതരിപ്പിക്കുന്നതെന്നും പരാതിയില് പറഞ്ഞിരുന്നു. ഒമര് ലുലു ഈ നീക്കത്തില് നിന്നും പിന്മാറണമെന്നും ഇല്ലെങ്കില് നിയമത്തിന്റെ വഴി സ്വീകരിക്കുമെന്നും മുകേഷ് ഖന്ന പറഞ്ഞിരുന്നു.
1997 കളില് ദൂരദര്ശനില് ഹിറ്റ് സീരിയലായിരുന്നു ശക്തിമാന്. ധമാക്ക സിനിമയിലെ ചില രംഗങ്ങളില് മലയാള നടന് മുകേഷ് ശക്തിമാന്റെ വേഷത്തില് എത്തുന്നതിന്റെ സ്റ്റില് ചിത്രങ്ങള് നേരത്തേ സംവിധായകന് ഒമര് ലുലു തന്നെയാണ് പുറത്തുവിട്ടത്.
സിനിമയിലെ ചില രംഗങ്ങളില് മാത്രമുളള ഒരു കോമഡി കഥാപാത്രമാണ് ധമാക്കയിലെ ശക്തിമാനെന്ന വിവരം മുകേഷ് ഖന്നയെ ധരിപ്പിക്കുമെന്നും എന്നിട്ടും അനുമതി ലഭിച്ചില്ലെങ്കില് കോപ്പിറൈറ്റിനെ മാനിച്ച് രംഗങ്ങള് ഒഴിവാക്കുമെന്നായിരുന്നു ഒമര് ലുലു അന്ന് പറഞ്ഞത്.
എന്തായാലും പ്രശ്നങ്ങള് പറഞ്ഞു തീര്ത്തതോടെ മുകേഷിന്റെ ശക്തിമാന് വേഷത്തെ കാത്തിരിക്കുകയാണ് മലയാളി പ്രേക്ഷകര്. ഒളിംപ്യന് അന്തോണി ആദത്തിലൂടെ ബാലതാരമായി എത്തിയ അരുണ് ആണ് നായക വേഷത്തില് എത്തുന്നത്. തെന്നിന്ത്യന് താരസുന്ദരി നിക്കി ഗല്റാണിയാണ് നായിക.
